আহি আহি আজি চলিত ২০২৩ বৰ্ষটি অন্তিমটো দিনত ভৰি দিলে। আশা-নিৰাশাৰ মাজেৰেই আজি ২৩ বৰ্ষটিক বিদায় দিবলৈ সাজু হৈছে সকলো। সেই সময়তে চিৰাচৰিতভাৱে বৰ্ষটিক এবাৰ উভতি চোৱাৰ হেঁপাহ কাৰনো নাথাকে!
সম্প্ৰতি ইণ্টাৰনেটৰ দুনীয়াত সকলোৱেই লাভ কৰে প্ৰয়োজনীয় তথ্য। কোনো বিষয় এটি জানিবলৈ তেনেই সহজ পন্থা হিচাপে সকলোৰে হাতত এতিয়া উপলব্ধ গুগল। পিছে এই গুগলত ২০২৩ বৰ্ষত ভাৰতত কাৰ বিষয়ে সৰ্বাধিক চাৰ্চ কৰা হৈছে জানেনে?
এই সন্দৰ্ভত ইতিমধ্যে প্ৰকাশ পাইছে তালিকা। আকাংক্ষিতভাৱেই এই তালিকাত আধিপত্য লাভ কৰিছে ক্ৰিকেটাৰ তথা অভিনেতাসকলে। কিন্তু এই ক্ৰিকেটাৰ তথা অভিনেতাসকলৰ মাজত আকৌ আপুনি আচৰিতভাৱে বিচাৰি নাপাব বহু ৰথী-মহাৰথী তাৰকাক।
আপুনি জানি আচৰিত হ’ব যে, এই তালিকাত নাই দেশৰ তাৰকা ক্ৰিকেটাৰদ্বয় কোহলী-ৰোহিত কিম্বা কিংবদন্তি ধোনী-শচীন। সেইদৰে আপুনি তালিকাত নেদেখে বলীউডৰ কিং খান শ্বাহৰুখ বা আন মহাতাৰকা অভিনেতাক অথবা আন কোনো চৰ্চিত চেলিব্ৰেটিক।
চাওঁচোন আহক এই তালিকাখন:
নম্বৰ ১০: ট্ৰেভিছ হেড
২৩ চনৰ ১৯ নৱেম্বৰ দিনটোক কোনগৰাকী ভাৰতীয়ই পাহৰিব পাৰিব! সেইদিনাই যে আহমেদাবাদত ভংগ হৈছিল দেশবাসীৰ পৰম আকাংক্ষিত স্বপ্ন! ক্ৰিকেট বিশ্বকাপৰ ফাইনেলত ১৩৭ ৰাণৰ এক বিশ্বজয়ী ইনিংছেৰে ট্ৰেভিছ হেডে ভাৰতীয় অনুৰাগীৰ স্বপ্ন চূৰ্ণ অষ্ট্ৰেলিয়াক তুলি দিছিল ষষ্ঠটি বিশ্বকাপ খিতাপ।
তাৰ পূৰ্বে এই ট্ৰেভিছ হেডেই জুন মাহত ১৬৩ ৰাণৰ এক দৰ্শনীয় ইনিংছেৰে ভাৰতৰ বিশ্ব টেষ্ট চেম্পিয়নশ্বিপ জয়ৰো স্বপ্ন ভংগ কৰিছিল। দুবাৰকৈ ভাৰতীয়ৰ স্বপ্ন চূৰ্ণ কৰা এই তাৰকাগৰাকী ভাৰতত সৰ্বাধিক গুগল চাৰ্চত থকা তালিকাৰ ১০ নং স্থানত থাকে।
নম্বৰ ৯: সূৰ্যকুমাৰ যাদৱ
বিশ্ব ক্ৰিকেটৰ নতুন ‘Mr 360°’ হিচাপে খ্যাতি লাভ কৰা ভাৰতৰ ষ্টাইলিছ মিডল অৰ্ডাৰ বেটাৰ সূৰ্যকুমাৰ যাদৱে ২০২৩ চনতো নিজৰ চমকপ্ৰদ উত্থান অব্যাহত ৰাখিছিল। টি-২০ত ভাৰতৰ হৈ বৰ্ষটোত সৰ্বাধিক ৰাণ সংগ্ৰহকাৰী যাদৱ আইচিচি টি-২০ ৰেংকিঙৰ বেটাৰৰ তালিকাত শীৰ্ষস্থানীয় বেটাৰ হিচাপে বৰ্ষটোৰ অন্ত পেলায়।
নম্বৰ ৮: ডেভিড বেকহাম
এফালৰ পৰা চাবলৈ গ’লে এই তালিকাত ইংলেণ্ডৰ প্ৰাক্তন ফুটবল তাৰকা ডেভিদ বেকহামৰ উপস্থিতি আশ্চৰ্যকৰেই। ফুটবলক বিদায় দিয়াৰ পিছত এসময়ৰ এই চুপাৰ ষ্টাইলিছ তাৰকাগৰাকীক লৈ ভাৰতত তেনে কোনো বিশেষ চৰ্চাও নাচিল।
কিন্তু এই বৰ্ষতে বেকহামে ভাৰত ভ্ৰমণ কৰিছিল আৰু তাৰ ফলশ্ৰুতিতেই প্ৰাক্তন তাৰকাগৰাকী ২০২৩ চনত ভাৰতত জনপ্ৰিয় ব্যক্তিত্ব হৈ পৰিল।
নম্বৰ ৭: গ্লেন মেক্সৱেল
২৩ৰ বিশ্বকাপত অষ্ট্ৰেলিয়াৰ অন্তিম চুম্বনৰ কৃতিত্বৰ এক বিশেষ অংশ যায় দলটোৰ তাৰকা অল ৰাউণ্ডাৰ গ্লেন মেক্সৱেললৈ। কেইবাখনো মেচত গুৰুত্বপূৰ্ণ অৱদান আগবঢ়োৱা মেক্সৱেলে দলৰ বাবে এক গুৰুত্বপূৰ্ণ মেচত আফগানিস্তানৰ বিপক্ষে বিষজৰ্জৰ শৰীৰেই খেলা সেই অবিস্মৰণীয় দ্বিশতকীয় ইনিংছটো কোনোবা ক্ৰিকেট প্ৰেমীয়ে জানো পাহৰিব পাৰে।
নম্বৰ ৬: সিদ্ধাৰ্থ মালহোত্ৰা
বলীউডৰ অভিনেতা সিদ্ধাৰ্থ মালহোত্ৰাই এই তালিকাত লাভ কৰিছে ষষ্ঠ স্থান। অৱশ্যে বলীউডৰ ছবিতকৈ বৰ্ষটোত কিয়াৰা আদৱানীৰ সৈতে বিবাহৰ বাবেহে অধিক চৰ্চা লাভ কৰে অভিনেতাগৰাকীয়ে। ২৩ চনত তেওঁৰ মিছন মজনুৰ নামৰ এখন ছবিও মুক্তি পাইছিল।
নম্বৰ ৫: এলভিছ যাদৱ
২০২৩ চনত সামাজিক মাধ্যমত এক পৰিচিত মুখ হৈ পৰা এলভিছ যাদৱে লাভ কৰে বিশেষ চৰ্চা। নিজৰ ইউটিউব চেনেলত এই বৰ্ষত তেওঁৰ চাব্ছক্ৰাইবাৰ ১৪.৮ মিলিয়নলৈ বৃদ্ধি পায়। ৰিয়েলিটি শ্ব’ বিগ বছতো তেওঁ এই বৰ্ষত আছিল চূড়ান্ত বিজয়ী।
নম্বৰ ৪: মহম্মদ ছামি
বিগত বিশ্বকাপত ভাৰতৰ অভিযানৰ এক প্ৰধান নায়ক হৈ পৰিছিল মহম্মদ ছামি। প্ৰথম চাৰিখন মেচত মূল একাদশত সুযোগ নোপোৱা দেশৰ অভিজ্ঞ তাৰকাগৰাকীয়ে প্ৰত্যাৱৰ্তনৰ পিছতে প্ৰতিখন মেচতে আগবঢ়াই আহিছিল অবিস্মৰণীয় প্ৰদৰ্শন। মাত্ৰ ৭খন মেচত ২৪টা উইকেট দখল কৰি এই বিশ্বকাপৰ সৰ্বাধিক উইকেট দখলকাৰী হিচাপে পৰিগণিত হোৱাৰ লগতে বিশ্বকাপৰ ইতিহাসত সৰ্বাধিক উইকেট দখলকাৰী ভাৰতীয় বলাৰ হিচাপেও ইতিহাস ৰচে ছামিয়ে।
নম্বৰ ৩: ৰচিন ৰবীন্দ্ৰ
বিগত বিশ্বকাপত বিশ্ব ক্ৰিকেটৰ এক উদীয়মান সম্ভাৱনা হিচাপে আত্মপ্ৰকাশ কৰি চমকি উঠে নিউজিলেণ্ডৰ অল-ৰাউণ্ডাৰ ৰচিন ৰবীন্দ্ৰ। ভাৰতীয় মূলৰ ৰবীন্দ্ৰ বিশ্বকাপত নিউজিলেণ্ডৰ বাবে আছিল এক গুৰুত্বপূৰ্ণ খেলুৱৈ। বিশ্বকাপৰ মাজতে ৰবীন্দ্ৰই বাংগালুৰুত থকা আইতাকক সাক্ষাৎ কৰাৰ দৃশ্যই লাভ কৰিছিল ব্যাপক চৰ্চা।
নম্বৰ ২: শুভমন গিল
ভাৰতৰ লগতে বিশ্ব ক্ৰিকেটৰ আগন্তুক তাৰকা হিচাপে ইতিমধ্যে চৰ্চিত হৈ পৰিছে উদীয়মান তাৰকা শুভমন গিল। এই যুৱ তাৰকাগৰাকীয়ে ২০২৩ চনত নিজকে প্ৰতিষ্ঠা কৰে সম্ভাৱ্য মহা তাৰকা হিচাপে। লগতে আগন্তুক ছিজনৰ ইণ্ডিয়ান প্ৰিমিয়াৰ লীগত গুজৰাট টাইটানছৰ অধিনায়ক হিচাপে নিযুক্তি পোৱাৰ পিছত গিলক লৈ হোৱা চৰ্চা যথেষ্ট বৃদ্ধি পায়।
নম্বৰ ১: কিয়াৰা আদৱানী
একপ্ৰকাৰে আচৰিতভাৱেই ২০২৩ চনত ভাৰতত সৰ্বাধিক গুগল কৰা লোকৰ তালিকাত শীৰ্ষস্থানত আহিছে বলীউডৰ অভিনেত্ৰী কিয়াৰা আদৱানীৰ নাম। বহু চৰ্চিত ৰথী-মহাৰথীতকৈ বৰ্ষটোত নেটিজেনৰ উৎসুকতাৰ কাৰণ হৈ পৰে অভিনেত্ৰীগৰাকী। মূলত: ফেব্ৰুৱাৰী মাহত অভিনেতা সিদ্ধাৰ্থ মালহোত্ৰাৰ সৈতে তেওঁৰ বহু চৰ্চিত বিবাহেই হৈছে এই উৎসুকতাৰ কাৰণ। বৰ্ষটোত তেওঁৰ অভিনীত ‘সত্যপ্ৰেম কি কথা’ নামৰ এখন ছবিও মুক্তি পাইছিল।
