প্ৰধানমন্ত্ৰী নৰেন্দ্ৰ মোদীয়ে ৯ মাৰ্চত অসম ভ্ৰমণত থাকিব। সেইদিনা মহাবীৰ লাচিত বৰফুকনৰ প্ৰতিমূৰ্তি উন্মোচন কৰিবলৈ প্ৰধানমন্ত্ৰী যোৰহাটলৈ আহিব। সদৌ অসম ছাত্ৰ সন্থাই (আছু) সেইদিনা কা-ৰ বিৰুদ্ধে আৰম্ভ কৰা প্ৰতিবাদী কাৰ্যসূচী বন্ধ ৰাখিব। ১০ মাৰ্চত তেওঁলোকে পুনৰ প্ৰতিবাদী কাৰ্যসূচী ৰূপায়ন কৰিব।
আছুৰ সভাপতি উৎপল শৰ্মা আৰু সাধাৰণ সম্পাদক শংকৰজ্যোতি বৰুৱাই এক প্ৰেছ বিজ্ঞপ্তিত এই কথা জানিবলৈ দিছে।
প্ৰেছ বিজ্ঞপ্তিটোত কোৱা হৈছে যে জাতীয় বীৰ লাচিত বৰফুকনৰ সৰ্বোচ্চ প্ৰতিমূৰ্তি উন্মোচন উপলক্ষে সদৌ অসম টাই ছাত্ৰ সন্থা আৰু টাই অসম যুৱ পৰিষদে কৰা অনুৰোধৰ প্ৰতি সন্মান জনাই অহা ৯ মাৰ্চ তাৰিখে সদৌ অসম ছাত্ৰ সন্থা আৰু ৩০ জনগোষ্ঠীয় সংগঠনে আহ্বান জনোৱা কা-বিৰোধী প্ৰতিবাদী কাৰ্যসূচীটো ১০ মাৰ্চ তাৰিখে ৰূপায়ন কৰা হ’ব। ১০ মাৰ্চ তাৰিখে পুৱা ৬ বজাৰ পৰা সন্ধিয়া ৬ বজালৈ প্ৰতিখন জিলা সদৰত ১২ ঘন্টীয়া অনশন কাৰ্যসূচী ৰূপায়ন কৰা হ’ব।
উল্লেখ্য যে কেন্দ্ৰীয় চৰকাৰে লোকসভা নিৰ্বাচনৰ পূৰ্বেই নাগৰিকত্ব সংশোধনী আইন (কা) ৰূপায়ন কৰাৰ কথা সদৰী কৰাৰ পিছতে অসমত বিভিন্ন দল-সংগঠনে পুনৰ কা-বিৰোধী আন্দোলন আৰম্ভ কৰাৰ কথা ঘোষণা কৰিছে।
ইতিমধ্যে বুধবাৰে শিৱসাগৰৰ ৰংঘৰ বাকৰিত ১১ টা জাতীয় সংগঠনে মানৱ শৃংখল কাৰ্যসূচী ৰূপায়ন কৰে। তেওঁলোকে কোনো কাৰণতে জাতিধ্বংসী আইন মানি নোলোৱাৰ হুংকাৰ দিয়ে।
ইপিনে, মুখ্যমন্ত্ৰী হিমন্ত বিশ্ব শৰ্মাই বুধবাৰে লাচিত বৰফুকনৰ প্ৰতিমূৰ্তি উন্মোচনৰ বাবে প্ৰধানমন্ত্ৰী ভ্ৰমণৰ দিনা প্ৰতিবাদৰ আহ্বান দিয়া সংগঠনৰ প্ৰতি কটাক্ষ কৰি কয় যে কোনো অসমীয়াই এই সময়ছোৱাত আন্দোলন নকৰে। তেওঁ কয় যে `আন্দোলন আমি ৮ মাৰ্চ বা ১০ মাৰ্চতো কৰিব পাৰো।‘
