ধৰমশালাত আজি পঞ্চমখন টেষ্টৰ তৃতীয় দিনাই ভাৰতে ইংলেণ্ডক এক ইংনিছ ৬৪ ৰাণত শোচনীয়ভাৱে পৰাস্ত কৰি পাঁচখনীয়া টেষ্ট শৃংখলাটোত ৪-১ ব্যৱধানত বিজয় সাব্যস্ত কৰে। এনে অদম্য প্ৰদৰ্শনৰ সময়তে ভাৰতীয় ক্ৰিকেট নিয়ন্ত্ৰণ ব’ৰ্ডৰ সচিব জয় শ্বাহে এক বৃহৎ ঘোষণা কৰিছে। যাৰ ফলত ভাৰতীয় পুৰুষ টেষ্ট ক্ৰিকেট খেলুৱৈসকল আৰ্থিকভাৱে হ’ব লাভান্বিত।
টেষ্ট ক্ৰিকেটৰ প্ৰসাৰৰ বাবে ভাৰতীয় ক্ৰিকেট নিয়ন্ত্ৰণ ব’ৰ্ডে এই নতুন পদক্ষেপ গ্ৰহণ কৰিছে। শনিবাৰে ব’ৰ্ডে ঘোষণা কৰে ‘টেষ্ট ক্ৰিকেট ইনচেন্টিভ আঁচনি’। ইয়াৰ অধীনত মেচ ফী উপৰিও খেলুৱৈসকলক আকু অধিক ধন দিয়াৰ সিদ্ধান্ত লোৱা হৈছে। বিচিচিআইৰ সচিব জয় শ্বাহে তেওঁৰ ছ’চিয়েল মিডিয়া হেণ্ডেল এক্স (পূৰ্বৰ টুইটাৰ)ৰ জৰিয়তে এই কথা ঘোষণা কৰিছে।
বি চি চি আইৰ সচিব জয় শ্বাহে লিখিছে, “২০২২-২৩ বৰ্ষৰ ছিজনৰ পৰা আৰম্ভ কৰি আমাৰ সন্মানীয় খেলুৱৈসকলক আৰ্থিক বৃদ্ধি আৰু স্থিৰতা প্ৰদানৰ লক্ষ্যৰে ছিনিয়ৰ পুৰুষৰ বাবে ‘টেষ্ট ক্ৰিকেট ইনচেন্টিভ আঁচনি’ আৰম্ভ কৰাৰ কথা ঘোষণা কৰি আনন্দিত হৈছো। ‘টেষ্ট ক্ৰিকেট ইনচেন্টিভ আঁচনি’য়ে টেষ্ট মেচৰ বাবে বৰ্তমানৰ ১৫ লাখ টকাৰ মেচ ফী উপৰিও অতিৰিক্ত ধন দিয়া হ’ব খেলুৱৈক।
এতিয়া প্ৰশ্ন উত্থাপন হৈছে যে কোন খেলুৱৈয়ে এই আঁচনিৰ সুবিধা লাভ কৰিব। ইয়াৰ উত্তৰ দিছে বি চি চি আইৰ সচিব শ্বাহে কয় যে এটা ছিজনত ৯ খন টেষ্ট মেচ অনুষ্ঠিত হয়। যদি কোনো খেলুৱৈয়ে চাৰিখনতকৈ কম মেচ খেলে তেন্তে তেওঁ এই আঁচনিৰ সুবিধা ল’ব নোৱাৰিব।
একে সময়তে পাঁচ-ছয়খন টেষ্ট অৰ্থাৎ ৫০ শতাংশতকৈ অধিক টেষ্ট খেলা খেলুৱৈয়ে প্ৰতিখন খেলৰ বাবেদ লাভ কৰিব ৩০ লাখকৈ টকা। মূল একদাশত অন্তৰ্ভুক্ত নোহোৱা খেলুৱৈয়ে প্ৰতিখন মেচত ১৫ লাখ টকা। ইফালে যিসকল খেলুৱৈয়ে সাতখনতকৈ অধিক মেচ অৰ্থাৎ ৭৫ শতাংশতকৈ অধিক খেলিছে তেওঁলোকক প্ৰতিখন মেচত ৪৫ লাখ টকা ইনচেন্টিভ প্ৰদান কৰা হ’ব।
সেইদৰে মূল একাদশত নথকা খেলুৱৈয়ে লাভ কৰিব ২২ লাখ টকা। ‘টেষ্ট ক্ৰিকেট ইনচেন্টিভ আঁচনি’ৰ জৰিয়তে ব’ৰ্ডে টেষ্ট ক্ৰিকেটৰ প্ৰতি খেলুৱৈসকলক আকৰ্ষণ কৰাৰ চেষ্টা কৰিছে।
উল্লেখ্যে যে আইপিএলৰ প্ৰাৰ্দুভাৱত ভাৰতীয় ক্ৰিকেটাৰসকলে ৰেড বল অৰ্থাৎ ৰঞ্জী মেচ আৰু টেষ্টৰ প্ৰতি অনাগ্ৰহী হোৱা বুলি চৰ্চা লাভ কৰি আহিছে। তেনে সময়তে বিচিচিআইৰ এই পদক্ষেপে ক্ৰিকেটাৰসকলক টেষ্ট ক্ৰিকেটৰ প্ৰতি অধিক আগ্ৰহী কৰি তুলিব।
