এটা ন্যস্ত স্বাৰ্থজড়িত গোটে বিভিন্ন প্ৰক্ৰিয়াৰে ন্যায়পালিকাক হেঁচা প্ৰয়োগ কৰিবলৈ চেষ্টা কৰিছে। বিশেষকৈ ৰাজনৈতিক নেতাৰ বিৰুদ্ধে দুৰ্নীতিৰ গোচৰত। সমগ্ৰ দেশৰ ৬০০ অধিবক্তাই এনে অভিযোগ উত্থাপন কৰি উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচুদলৈ এখন পত্ৰ লিখিছে। ইয়াৰ ভিতৰত আছে জ্যেষ্ঠ অধিবক্তা হৰিশ ছালভে আৰু পিংকি আনন্দকে ধৰি বহু বিশিষ্ট আইনজীৱী।
গণতান্ত্ৰিক গাঁথনি আৰু ন্যায়িক প্ৰক্ৰিয়াৰ ওপৰত যি আস্থা বৰ্তি আছে একাধিক পদক্ষেপত সেয়া ভাঙি পেলোৱাৰ ষড়যন্ত্ৰ চলি আছে বুলি পত্ৰখনত উল্লেখ কৰা হৈছে। অধিবক্তাসকলৰ অভিযোগ যে ন্যস্ত স্বাৰ্থজড়িত গোটসমূহে ন্যায়পালিকাৰ সোণালী যুগ নোহোৱা হৈ গৈছে আৰু এতিয়া দুৰ্বল হোৱাৰ পথত বুলি প্ৰচাৰ চলাইছে। তেওঁলোকৰ উদ্দেশ্য হৈছে আদালতত সাধাৰণ জনতাৰ আস্থা ভংগ কৰা।
লগতে পঢ়কঃ দিল্লীৰ আপত্তি আওকাণ কৰি কেজৰিৱালৰ পক্ষতে আমেৰিকা; কংগ্ৰেছৰ একাউণ্ট ফ্ৰীজকলৈও সৰৱ
মুখ্য ন্যায়াধীশলৈ লিখা পত্ৰখনত উল্লেখ কৰা হৈছে যে এই স্বাৰ্থান্বেষী গোটসমূহে নিজৰ ৰাজনৈতিক সুবিধা আৰু কৌশল অনুসৰি ন্যায়পালিকাৰ সিদ্ধান্তক গৰিহণা বা প্ৰশংসা কৰিছে।
৬০০ জন অধিবক্তাৰ পত্ৰত পোনপটীয়াকৈ লিখা হৈছে, “দিনত একাংশ অধিবক্তাই ৰাজনীতিবিদক সুৰক্ষা দি আছে, ৰাতি সংবাদ মাধ্যমৰ জৰিয়তে আদালত আৰু ন্যায়াধীশক প্ৰভাৱিত কৰিবলৈ চেষ্টা কৰিছে।” লগতে কোৱা হৈছে যে দুৰ্নীতিৰ অভিযোগত অভিযুক্ত হ’লে নিজকে ৰক্ষা কৰিবলৈ ৰাজনীতিকসকল আদালতলৈ আহিছে। আদালতৰ সিদ্ধান্ত তেওঁলোকৰ বিৰুদ্ধে গ’লে ন্যায়পালিকাৰ সমালোচনা কৰিছে৷
ছচিয়েল মিডিয়াৰ জৰিয়তেও বহু লোকে ন্য়ায়াধীশসকলক হেঁচা প্ৰয়োগ কৰাৰ চেষ্টা চলাইছে বুলি পত্ৰখনত অভিযোগ উত্থাপন কৰা হৈছে। অধিবক্তাসকলে উচ্চতম ন্যায়ালয়ক ৰাজনৈতিক নেতাৰ এনে কাৰ্যৰ বিৰুদ্ধে কঠোৰ ব্যৱস্থা গ্ৰহণ কৰিবলৈ অনুৰোধ জনাইছে।
লগতে পঢ়কঃ নিবনুৱা সমস্যাৰ সমাধান চৰকাৰৰ বাবে সম্ভৱ নহয়; নিৰ্বাচনৰ পূৰ্বে উপদেষ্টাৰ মন্তব্যত অস্বস্তিত মোডী!
কোৱা বাহুল্য যে লোকসভা নিৰ্বাচনৰ পূৰ্বে সমগ্ৰ দেশৰ অধিবক্তাই উচ্চতম ন্যায়ালয়ৰ মুখ্য ন্যায়াধীশলৈ লিখা এনে চিঠি তাৎপৰ্যপূৰ্ণ। উল্লেখ্য যে এই মুহূৰ্তত অৰবিন্দ কেজৰিৱাল, নিৰ্বাচনী বণ্ড, আয়ুক্ত নিযুক্তি, উচ্চতম ন্যায়ালয়ত কেইবাটাও গোচৰ চলি আছে। প্ৰতিটো গোচৰ আগন্তুক লোকসভা নিৰ্বাচনৰ লগত কোনো নহয় কোনো প্ৰকাৰে জড়িত।
