ভাৰতৰ বতৰ বিজ্ঞান বিভাগে (IMD) প্ৰকাশ কৰা অনুসৰি দেওবাৰে নিশা পশ্চিম বংগ আৰু বাংলাদেশৰ উপকূলৰ মাজত স্থলপথত প্ৰৱেশ কৰা ঘূৰ্ণীবতাহ ৰেমাল সোমবাৰে ক্ৰমান্বয়ে দুৰ্বল হৈ ঘূৰ্ণীবতাহ সৃষ্ট ধুমুহালৈ পৰিণত হ’ব। কিন্তু পশ্চিম বংগত গছ-গছনি উভালি, ঘৰ-দুৱাৰ ভাঙি, বাটত থকা বিদ্যুতৰ খুঁটা উভালি পেলাই ধ্বংসৰ ৰেশ এৰি থৈ গৈছে।
বাতৰি অনুসৰি, ঘূৰ্ণীবতাহৰ ফলত কলকাতাত ঘৰৰ পিৰালি ভাঙি এজন লোকৰ মৃত্যু হৈছে। সুন্দৰবনৰ গোছাবা অঞ্চলত ধ্বংসাৱশেষৰ খুন্দাত এজন লোক আহত হোৱাৰ বিপৰীতে কলকাতাৰ বিবীৰ বাগান এলেকাত দেৱাল ভাঙি আন এজন ব্যক্তি আহত হোৱা বুলি জানিব পৰা গৈছে।
কৰ্তৃপক্ষই পশ্চিম বংগৰ দুৰ্যোগপূৰ্ণ অঞ্চলৰ পৰা ১ লাখৰো অধিক লোকক উলিয়াই আনিছে।
দেওবাৰে নিশা প্ৰায় ৮.৩০ বজাত ৰাজ্যখনৰ সাগৰ দ্বীপ আৰু বাংলাদেশৰ খেপুপাৰাৰ মাজত ঘূৰ্ণীবতাহৰ গতিবেগ ঘণ্টাত ১৩৫ কিলোমিটাৰ পৰ্যন্ত হয়।
লগতে পঢ়কঃ লোকসভা নিৰ্বাচন চলি থকাৰ মাজতে বৃদ্ধি পালে সেনাধ্যক্ষ মনোজ পাণ্ডেৰ কাৰ্যকাল
আইএমডিৰ শেহতীয়া বুলেটিন অনুসৰি, ঘূৰ্ণীবতাহ ৰেমাল “অহা তিনি ঘণ্টাৰ ভিতৰত উত্তৰ-উত্তৰ-পূব দিশলৈ গতি কৰি ক্ৰমান্বয়ে ঘূৰ্ণীবতাহ সৃষ্ট ধুমুহালৈ দুৰ্বল হোৱাৰ সম্ভাৱনা আছে”। ইয়াৰ পিছত ই উত্তৰ-পূব দিশলৈ আগবাঢ়িব আৰু ক্ৰমান্বয়ে আৰু দুৰ্বল হ’ব বুলিও টুইটযোগে প্ৰকাশ কৰা হৈছে।
অসমৰ সাতখন জিলাত প্ৰবল বৰষুণৰ বাবে ৰেড এলাৰ্ট জাৰি কৰা হৈছে, আৰু ১১খন জিলাত ‘অৰেঞ্জ এলাৰ্ট’ জাৰি কৰা হৈছে, কিয়নো সোমবাৰে ৰেমাল ঘূৰ্ণীবতাহ উত্তৰ-পূব দিশলৈ গতি কৰাৰ লগতে ক্ৰমান্বয়ে ঘূৰ্ণীবতাহৰ সৃষ্ট ধুমুহালৈ পৰিণত হোৱাৰ সম্ভাৱনা আছে।
সোমবাৰ আৰু মঙলবাৰে অসমৰ লগতে উত্তৰ-পূৰ্বাঞ্চলৰ অন্যান্য ৰাজ্যৰ ওপৰত ব্যাপক বৰষুণৰ সতৰ্কবাণী প্ৰদান কৰা হৈছে। আনহাতে, আজি দক্ষিণ অসম আৰু মেঘালয়ৰ ওপৰেৰে ঘণ্টাত ৪০-৫০ কিলোমিটাৰৰ পৰা ৬০ কিলোমিটাৰ বেগত ধুমুহা বতাহৰ সম্ভাৱনা আছে।
সোমবাৰে পুৱা ভাৰতীয় উপকূলৰক্ষী বাহিনীয়ে কয় যে তেওঁলোকে “ঘূৰ্ণীবতাহ ৰেমালৰ স্থলভাগৰ ওপৰত প্ৰভাৱৰ পিছৰ প্ৰত্যাহ্বানৰ প্ৰতি সঁহাৰি জনাবলৈ দুৰ্যোগ সঁহাৰি দল, জাহাজ, হ’ভাৰক্ৰাফ্ট ষ্টেণ্ডবাইৰ সৈতে নিবিড়ভাৱে নিৰীক্ষণ কৰি আছে”।
লগতে পঢ়কঃ IPL 2024 Final: ফাইনেলত হায়দৰাবাদৰ অসহায় আত্মসমৰ্পন; ১০ বছৰ পিছত পুনৰ চেম্পিয়ন কলকাতা
ইপিনে, বাংলাদেশত দেশৰ দক্ষিণ-পশ্চিম উপকূলৰ নিম্নভূমি অঞ্চলৰ পৰা ৮ লাখৰো অধিক লোকক খালী কৰা হৈছে। বিষয়াসকলে জনোৱা মতে, পটুৱাখালিত জোৱাৰ-ভাটাই এজন লোক উটুৱাই নিয়াৰ লগতে কেইবাজনো লোক আহত হয়।
বাংলাদেশৰ উপকূলীয় জিলাসমূহ যিবোৰ বৰ্তমান ঘূৰ্ণীবতাহৰ ভাবুকিৰ সন্মুখীন হৈছে, সেইবোৰ হ’ল খুলনা, সাতখিৰা, বাগেৰহাট, পিৰোজপুৰ, ঝালাকাঠি, বৰগুনা, বৰিশাল, ভোলা, পতুৱাখালি, চট্টগং, কক্স বজাৰ, ফেনী, কোমিলা, নোয়াখালি, লক্ষ্মীপুৰ আৰু চান্দপুৰ।
