আমেৰিকাত অনুশীলন ক্ষেত্ৰখনৰ পৰাই আৰম্ভ হৈছিল ভাৰতীয় ক্ৰিকেট দলৰ প্ৰত্যাহ্বান । টি-২০ বিশ্বকাপ খেলাৰ সময়ত বিৰাট কোহলী, ৰোহিত শৰ্মাই পথৰ কাষৰ মুকলি পাৰ্কত অনুশীলন কৰিবলগীয়া হৈছিল। এইবাৰ ভাৰতীয় দলটো আন এক সমস্যাৰ সন্মুখেন হৈছে। হোটেলৰ জিম ব্যৱহাৰ কৰিবলৈ সক্ষম হোৱা নাই খেলুৱৈসকল। ফলত ভাৰতীয় ক্ৰিকেটাৰসকলে হোটেলখনৰ সমীপৰ জিমত সদস্যপদ ল’বলৈ বাধ্য হৈছে।
লং আইলেণ্ডৰ এখন হোটেলত থাকি ভাৰতীয় ক্ৰিকেট দলটোৰ এজন বিষয়াই সংবাদ মাধ্যমৰ আগত কয়, “হোটেলৰ জিমটো ব্যৱহাৰৰ বাবে উপযুক্ত নহয়।গতিকে ক্ৰিকেটাৰসকলে ওচৰৰ জিম এটাত সদস্যপদ লৈছে। এই জিমটো আমেৰিকাত অতি বিখ্যাত। সকলো ধৰণৰ সুবিধা আছে।এতিয়া ক্ৰিকেটত শাৰীৰিক ব্যায়াম অতি প্ৰয়োজনীয়। ক্ৰিকেটাৰসকলে প্ৰতিদিনে জিমত সময় কটায়। কিন্তু হোটেলখনৰ জিমত পৰ্যাপ্ত সা-সুবিধাৰ অভাৱত সমস্যাৰ সন্মুখীন হৈছে। আন এটা জিমত নামভৰ্তি কৰিবলৈ বাধ্য হৈছিল।
অনুশীলনৰ ব্যৱস্থাক লৈও বিচলিত হৈ পৰিছে ভাৰতীয় দলটো। প্ৰশিক্ষক ৰাহুল দ্ৰাবিড়ে কয় যে শেষ মুহূৰ্তত সকলো ব্যৱস্থা কৰা হৈছিল। ফলত ব্যৱধানৰ সৃষ্টি হয়। ইমান দিনে ষ্টেডিয়ামত অনুশীলন কৰি থকা ভাৰতীয় ক্ৰিকেটাৰসকলে পাৰ্কত অনুশীলন কৰাৰ সময়ত সমস্যাৰ সন্মুখীন হৈছে। আনকি মিডিয়া চেণ্টাৰত সাংবাদিকৰ বাবেও খাদ্যৰ ব্যৱস্থা কৰা হোৱা নাছিল। ভাৰতীয় ক্ৰিকেট ব’ৰ্ডে নিজা উদ্যোগত দেশৰ সাংবাদিকসকলৰ বাবে খাদ্যৰ ব্যৱস্থা কৰিছে।
