এইবাৰ নিউয়ৰ্ক আৰু ৱেষ্ট ইণ্ডিজে যৌথভাৱে টী-২০ বিশ্বকাপ ২০২৪ আয়োজন কৰিছে। জো বাইডেনৰ দেশৰ মানুহ ক্ৰিকেটৰ প্ৰতি একেবাৰেই উৎসাহী নহয়। বিশ্বৰ এক নম্বৰ দেশৰ নাগৰিকে খেল বুলিলে মূলতঃ বাস্কেটবল আৰু ৰাগবীকহে বুজে। কিছু পৰিমানে অন্ততঃ ফুটবল। ক্ৰিকেট খায় নে মূৰত পিন্ধে এতিয়াও বহুতেই নাজানে।
দেশখনত ক্ৰিকেটৰ প্ৰচাৰৰ বাবে আইচিচিয়ে আমেৰিকাক বাছি লৈছে। ইয়াত এই প্ৰথম বিশ্বকাপ ইভেণ্ট আৰম্ভ হৈছে। ৱেষ্ট ইণ্ডিজত অনুষ্ঠিত হ’ব ছুপাৰ এইট। তাৰ আগতে আমেৰিকাত মুঠ ১৬খন মেচ। তিনিটা স্থান বাছনি কৰা হৈছে। ইয়াৰে প্ৰথমটো হ’ল নিউয়ৰ্কৰ আইজেনহাৱাৰ পাৰ্ক ওৰফে নাছাউ কাউন্টি ক্ৰিকেট ষ্টেডিয়াম, দ্বিতীয়টো হ’ল ফ্ল’ৰিডাৰ ব্ৰ’ৱাৰ্ড কাউন্টি ক্ৰিকেট ষ্টেডিয়াম আৰু তৃতীয়টো হৈছে টেক্সাছৰ গ্ৰেণ্ড প্ৰেৰি ষ্টেডিয়াম।
ইয়াৰ ভিতৰত আটাইতকৈ বেছি চৰ্চাত আছে নাছাউ কাউন্টি ক্ৰিকেট ষ্টেডিয়াম। কাৰণ এই স্থানত উদ্বোধনী মেচ আৰু ভাৰত-পাক মহাৰণকে ধৰি মুঠ আঠখন খেল অনুষ্ঠিত হৈছে। যিহেতু এই দেশত ক্ৰিকেটৰ আন্তঃগাঁথনি প্ৰায় নাই, গতিকে ইয়াত বিশ্বকাপৰ বাবে আমেৰিকাই অস্থায়ী নিৰ্মাণৰ ওপৰত নিৰ্ভৰ কৰিবলগীয়া হৈছে।
বিশ্বকাপৰ আগতে আইজেনহাৱাৰ পাৰ্কত অৱস্থিত নাছাউ কাউন্টি ক্ৰিকেট ষ্টেডিয়াম আছিল একেবাৰে মুকলি এখন খেলপথাৰ। য’ত কেবল সেই স্থানীয় ক্ৰিকেট খেলা সম্ভৱ হৈছিল। আইচিচিয়ে ভেন্যু হিচাপে আগবাঢ়ি যাবলৈ সেউজ সংকেত দিয়াৰ লগে লগে এই খেলপথাৰখন বিশ্বকাপৰ বাবে সাজু হ’বলৈ আৰম্ভ কৰে। ১০৬ দিনত নিৰ্মাণ কৰা হয় এই ষ্টেডিয়ামখন। মুঠতে যিটোক পপ আপ ষ্টেডিয়াম বুলি কোৱা হয়। ৩৪ হাজাৰ দৰ্শকৰ বহাৰ বাবে ব্যৱস্থাও কৰা হৈছে।
ইয়াত আন্তঃৰাষ্ট্ৰীয় ক্ৰিকেট খেলিবলৈ কোনো পিটচ নাছিল। অষ্ট্ৰেলিয়ান টাৰ্ফ ক্ৰিকেট এছ’চিয়েশ্যনে আমেৰিকাৰ পিটচ নিৰ্মাণৰ কাম লাভ কৰি ড্ৰপ-ইন পিটচ নিৰ্মাণ কৰিছিল। চাৰিখন মূল পিটচ আৰু আধা ডজন ড্ৰপ ইন ছাৰ্ফেচ ইনষ্টল কৰিয়েই খেলা হৈছিল। অৰ্থাৎ স্থানান্তৰ কৰিব পৰা পিটচ। কিন্তু এই পিটচক লৈ কেইবাটাও বিতৰ্কৰ সৃষ্টি হৈছে। খেলি থকাৰ সময়তে বহু ক্ৰিকেটাৰ আঘাতপ্ৰাপ্ত হয়। ক্ৰেকেট মহলৰ একাংশই দাবী কৰিছিল যে এই খেলপথাৰত দ্বিপাক্ষিক শৃংখলা কিয় আন্তঃৰাষ্ট্ৰীয় মেচ আয়োজনৰ বাবেও যোগ্য নহয়। কাৰণ এই পিটচ বহি উঠিবলৈ প্ৰয়োজনীয় সময় নাপালে। ফলত বলৰ বাউন্সৰ পৰা আৰম্ভ কৰি স্কিডলৈকে সকলো আছিল সম্পূৰ্ণ অপ্ৰত্যাশিত।
লগতে পঢ়কঃ৩০০ কোটি টকাৰ সম্পত্তিৰ বাবে শহুৰেকক হত্যা বোৱাৰীয়েকৰ! হিট এণ্ড ৰাণ ঘটনাৰ ৰূপ দিয়াৰ চেষ্টা
কিন্তু ভাৰত-আমেৰিকাৰ খেলৰ পাছতেই নাছাউ ক্ৰিকেট ষ্টেডিয়াম অতীত হৈ গ’ল। ৰোহিত বাহিনীয়ে খেলপথাৰ এৰি যোৱাৰ লগে লগে বুলডজাৰ প্ৰৱেশ কৰি ভাঙিবলৈ আৰম্ভ কৰিলে। নাছাউ পুনৰ আগৰ ঠাইলৈ ঘূৰি যাব। অহা ছয় সপ্তাহৰ ভিতৰত সকলো অস্থায়ী নিৰ্মাণ ভাঙি পুনৰ পূৰ্বৰ স্থানলৈ অনা হ’ব।
