তৃণমূলৰ বিজয়ী প্ৰাৰ্থী তথা প্ৰাক্তন ক্ৰিকেটাৰ ইউছুফ পাঠানৰ বিৰুদ্ধে ভূমি দখলৰ অভিযোগ উত্থাপন হৈছে। গুজৰাটৰ বৰোদা পৌৰসভাৰ এখন মাটি অবৈধভাৱে দেৱাল গাঁঠি ঘেৰাও কৰা বুলি অভিযোগ উত্থাপন হৈছে। সংবাদ সংস্থা পিটিআইয়ে প্ৰকাশ কৰা অনুসৰি বৰোদা পৌৰসভাইও এই সন্দৰ্ভত পাঠানলৈ জাননী প্ৰেৰণ কৰিছে। তেওঁক শীঘ্ৰে দেৱালখন আঁতৰাবলৈ কোৱা হৈছে।
এই লোকসভা নিৰ্বাচনত বহাৰমপুৰ সমষ্টিৰ পৰা তৃণমূলৰ টিকটত জয়লাভ কৰে ইউছুফে। পাঁচবাৰৰ সাংসদ তথা ৰাজ্যিক কংগ্ৰেছৰ সভাপতি অধীৰ চৌধুৰীক পৰাস্ত কৰি তেওঁ এক নজিৰ গঢ়ি তুলিছিল। পিটিআইয়ে জনোৱা মতে, বৰোদা পৌৰসভাই যোৱা ৬ জুনত পাঠানলৈ জাননী প্ৰেৰণ কৰিছিল। কাকতলীয়াকৈ ৪ জুনত এই সমীক্ষাৰ ফলাফল প্ৰকাশ পাইছিল। অৰ্থাৎ বাহাৰমপুৰ জয়ী হোৱাৰ ৪৮ ঘণ্টাৰ ভিতৰতে বিজেপি পৰিচালিত পৌৰসভাৰ পৰা ইউছুফে জাননী লাভ কৰে।
ইউছুফে যি মাটি দখল কৰাৰ অভিযোগ উত্থাপন হৈছে, সেই মাটি পৌৰসভাৰ মালিকানাধীন। বৰোদাৰ বিজেপিৰ এজন কাউন্সিলাৰ বিজয় পাৱাৰে কয় যে ২০১২ চনত ইউছুফে এই মাটি ক্ৰয় কৰিবলৈ চেষ্টা কৰিছিল। সেই সময়ত তেওঁ পৌৰসভাৰ অনুমতি লৈ গৈছিল। কিন্তু তেতিয়াৰ গুজৰাট চৰকাৰে পৌৰসভাৰ প্ৰস্তাৱ নাকচ কৰিছিল। পাৱাৰে কয় যে মাটিখিনি ইউছুফৰ ঘৰৰ ওচৰত। তেওঁৰ মন্তব্যৰ পিছতে বৰোদা পৌৰসভাইও ইউছুফক জাননী দিয়াৰ বিষয়টো স্বীকাৰ কৰিছে।
ইয়াৰ পূৰ্বে বিজেপিৰ কাউন্সিলাৰগৰাকীয়ে কয় যে ২০১২ চনত যেতিয়া ইউছুফৰ ঘৰ নিৰ্মাণৰ কাম চলি আছিল তেতিয়া তেওঁ এই কাষৰীয়া মাটিখিনি অধিক মূল্যত ক্ৰয় কৰিব বিচাৰিছিল। লগতে তেওঁ প্ৰতি বৰ্গমিটাৰত ৫৭ হাজাৰ টকা দিয়াৰ প্ৰস্তাৱ আগবঢ়ায়। পৌৰসভাৰ ব’ৰ্ডৰ বৈঠকত এই প্ৰস্তাৱ গৃহীত হয়। কিন্তু চৰকাৰে অৱশেষত মাটি বিক্ৰীৰ অনুমতি নিদিলে। কাউন্সিলাৰগৰাকীয়ে কয় যে তেওঁৱেই পৌৰসভাক জনাইছিল যে মাটি বেদখল কৰা হৈছে। লগতে এই সন্দৰ্ভত তদন্তৰ দাবী জনায়।
মন কৰিবলগীয়া যে এই নিৰ্বাচনত তৃণমূলৰ অন্যতম চমক আছিল ইউছুফ। তৃণমূলৰ সৰ্বভাৰতীয় সাধাৰণ সম্পাদক অভিষেক বেনাৰ্জীয়ে গুজৰাটৰ পৰা বংগলৈ আনি টিকট দিছিল। অধীৰ ৰঞ্জনৰ ‘গড়’ বেহৰমপুৰত তেওঁ হৈ পৰিছে দলৰ ট্ৰাম্প কাৰ্ড। ৫২ হাজাৰৰো অধিক ভোটত তেওঁ অধীৰক পৰাস্ত কৰে। এই জয়ৰ বাবে দলৰ নেত্ৰী মমতা বেনাৰ্জীয়ে ঘৰুৱা বৈঠকত তেওঁক ‘জায়ান্ট কিলাৰ’ বুলি অভিহিত কৰে।
