এয়াই হৈছে মোদী চৰকাৰৰ উন্নয়নৰ স্বৰূপ। এজাক বৰষুণতে খহি পৰিল দেশৰ ৰাজধানীৰ আন্তঃৰাষ্ট্ৰীয় বিমান বন্দৰৰ টাৰ্মিনেলৰ চালি। প্ৰকাণ্ড প্ৰকাণ্ড লোৰ ৰেলিং পৰি থিতাতে মৃত্যু তিনিজনকৈ লোকৰ। আহত হৈছে কেবাজনো লোক।
এক ভয়াৱহ দুৰ্ঘটনা সংঘটিত হৈছে দিল্লীৰ ইন্দিৰা গান্ধীৰ আন্তঃৰাষ্ট্ৰীট বিমানবন্দৰত। শুকুৰবাৰে পুৱা ইন্দিৰা গান্ধী আন্তঃৰাষ্ট্ৰীয় বিমানবন্দৰৰ টাৰ্মিনেল-১ ডিৰ এখন চাল ভাঙি কমেও তিনিজন লোকৰ মৃত্যু হোৱাৰ লগতে ৬ লোক আহত হয়। ৰৈ থকা বাহনৰ ওপৰত প্ৰকাণ্ড লোৰ ৰেলিং খহি পৰাৰ ফলতে ৩ জনকৈ লোকৰ মৃত্যু হৈছে। ডিপাৰ্চাৰ লেনৰ বাহিৰত শাৰী পাতি থকা গাড়ী আৰু টেক্সিৰ ওপৰত লোৰ খুঁটা ছালি আৰু ৰেলিং খৰে পৰে। জানিব পৰা মতে, পুৱা প্ৰায় ৫:৩০ বজাত অগ্নিনিৰ্বাপক বাহিনীয়ে ভাঙি পৰা চালখনৰ বিষয়ে ফোন লাভ কৰে। এই দুৰ্ঘটনাৰ পাছতে সুৰক্ষাৰ বাবে বিমানবন্দৰৰ চেক-ইন কাউণ্টাৰসমূহ বন্ধ কৰি দিয়া হয়। লগতে বিমানবন্দৰ এলেকাৰ চাৰিওফালে ব্যাপক যান-জঁটৰ সৃষ্টি হয়। ইফালে দুপৰীয়া ১ বজালৈকে যাত্ৰা কৰা সকলো বিমানৰ উৰণো বাতিল কৰা হৈছে।
ইফালে বৃহস্পতিবাৰে গভীৰ নিশা আৰু শুকুৰবাৰে নিশালৈকে হোৱা প্ৰচণ্ড বৰষুণৰ ফলত দিল্লীৰ ৰাজপথ পানীৰে ভৰি পৰিছে। আৰু শুকুৰবাৰে পুৱা কেইবাটাও আৱাসিক অঞ্চল বানপানীত বুৰ গৈছে।
উল্লেখ্য দীৰ্ঘদিনীয়া প্ৰচণ্ড গ্ৰীষ্ম প্ৰৱাহৰ পাছতে ৰাজধানী মহানগৰীত মুষলধাৰাৰ বৃষ্টিপাত হৈছে। এই বৃষ্টিপাতৰ পূৰ্বে প্ৰচণ্ড গৰমৰ বাবে ৰাজধানী চহৰখনত অতি কমেও ২৭৭ জন লোকৰ মৃত্যু হোৱা বুলি জানিব পৰা গৈছে।
ইফালে বিমানবন্দৰ দিল্লীৰ ইন্দিৰা গান্ধীৰ আন্তঃৰাষ্ট্ৰীয় বিমানবন্দৰ হৈছে বিশ্বৰে আটাইতকৈ ব্যস্ত বিমানবন্দৰসমূহৰ এটা। এনে আন্তঃৰাষ্ট্ৰীয় বিমানবন্দৰৰ ছালি খহি পৰি তিনিজনকৈ লোকৰ মৃত্যু হোৱা ঘটনাই প্ৰমাণ কৰিছে যে দেশৰ উন্নয়নৰ ফোঁপোলা স্বৰূপ।
