স্বামীৰ লগত তৰ্কাতৰ্কিত লিপ্ত হ’ল এগৰাকী পত্নী। কাজিয়াত বিষণ্ণ হৈ চাৰিটা সন্তানৰ সৈতে ঘৰৰ পৰা ওলাই গ’ল মাতৃ। ইয়াৰ পাছত মহিলাগৰাকী কুঁৱাত জপিয়াই পৰিল। চুবুৰীয়াই দৌৰি আহি মহিলাগৰাকীক উদ্ধাৰ কৰিবলৈ সক্ষম হয় যদিও চাৰিটা সন্তানক ৰক্ষা কৰিব পৰা নগ’ল। কুঁৱাত পৰি চাৰিটা শিশুৰ মৃত্যু হয়। দেওবাৰে মধ্যপ্ৰদেশত সংঘটিত হয় এই শোকাৱহ ঘটনা।
আৰক্ষীৰ সূত্ৰ অনুসৰি স্থানীয় লোকে সুগনা বাই নামৰ এগৰাকী ৪০ বছৰীয়া মহিলাক কুঁৱাৰ পৰা উদ্ধাৰ কৰে। কিন্তু তেওঁৰ চাৰিওটি সন্তানৰ মৃত্যু হ’ল। আৰক্ষীয়ে উদ্ধাৰ কৰে ১১ বছৰীয়া অৰবিন্দ, ৯ বছৰীয়া অনুষা, ছয় বছৰীয়া বিট্টু আৰু তিনি বছৰীয়া কাৰ্তিকৰ মৃতদেহ।
প্ৰাথমিক তদন্তৰ অন্তত শনিবাৰে সুগনা আৰু তেওঁৰ স্বামী ৰোডু সিঙৰ মাজত অশান্তিৰ সৃষ্টি হোৱা বুলি জানিব পৰা গৈছে। ৰোডুৱে পত্নীক মাৰপিট কৰিছিল। ইয়াৰ পাছতে মহিলাগৰাকীয়ে চাৰিটা সন্তানৰ সৈতে ঘৰৰ পৰা ওলাই যায়। শনিবাৰে চাৰিটা সন্তানৰ সৈতে প্ৰাথমিক বিদ্যালয়ৰ বেলকনিত আশ্ৰয় লয় সুগনাই। তাতে ৰাতিটো কটোৱাৰ পাছত দেওবাৰে পুৱা প্ৰায় ৬ বজাত সন্তানৰ সৈতে কুঁৱাটোত জপিয়াই পৰে এগৰাকী ৪০ বছৰীয়া মহিলাগৰাকী।
সংবাদ মাধ্যমৰ আগত আৰক্ষীয়ে জনোৱা মতে, চাৰি নাবালকৰ মৃতদেহ মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰা হৈছে।
