শিৱসাগৰৰ বিধায়ক তথা ৰাইজৰ দলৰ মুৰব্বী অখিল গগৈয়ে কংগ্ৰেছ দলে আগন্তুক উপ-নিৰ্বাচনত স্বতন্ত্ৰভাৱে প্ৰতিদ্বন্দ্বিতা কৰাৰ সিদ্ধান্তক তীব্ৰ গৰিহণা দিছে।
বঙাইগাঁৱত সাংবাদিকৰ সৈতে হোৱা এক সাক্ষাৎকাৰত গগৈয়ে এনে পদক্ষেপৰ অসাৰতাৰ সম্পৰ্কে কয়, “যদি কংগ্ৰেছ দলে আগন্তুক উপ-নিৰ্বাচনত অকলে প্ৰতিদ্বন্দ্বিতা কৰাৰ কথা চিন্তা কৰিছে, তেন্তে কংগ্ৰেছে মূৰ্খৰ স্বৰ্গত বাস কৰিছে।”
তেওঁ আৰু কয়, ‘কংগ্ৰেছে উপ-নিৰ্বাচনত আকলে খেলি জয়ী হ’ব পাৰিব বুলি ভাবিলে ই এক ঐতিহাসিক ভুল হ’ব।’
কংগ্ৰেছৰ এই অহং ভাব সম্পৰ্কে গগৈয়ে মন্তব্য কৰে যে লোকসভা নিৰ্বাচনত বিৰোধী দলৰ ঐক্যৰ বাবে যদি কংগ্ৰেছে ৰাইজৰ পৰা পোৱা সামান্য সঁহাৰিৰে অহংকাৰ কৰিছে, তেন্তে ৰাইজৰ দলে তেওঁলোকক উপযুক্ত কাউণ্টাৰ দিব।”
উল্লেখ্য যে মঙলবাৰে অসম প্ৰদেশ কংগ্ৰেছৰ সভাপতি ভূপেন কুমাৰ বৰাই উপ-নিৰ্বাচন অনুষ্ঠিত হ’বলগীয়া পাঁচখন বিধানসভাৰ দলটোৱে অকলে প্ৰতিদ্বন্দ্বিতা কৰিব বুলি মন্তব্য কৰিছিল।
বৰাই উল্লেখ কৰিছিল যে সোমবাৰে কংগ্ৰেছৰ সাধাৰণ সম্পাদক জিতেন্দ্ৰ সিঙৰ সভাপতিত্বত জিলা পৰ্যায়ৰ দলীয় নেতাসকলৰ সৈতে হোৱা বৈঠকত এই সিদ্ধান্ত লোৱা হৈছে।
দলৰ স্থিতি পুনৰ দৃঢ় কৰি বৰাই এক্সত লিখে, “উপনিৰ্বাচন অনুষ্ঠিত হ’বলগীয়া ৫খন আসনত অসম প্ৰদেশ কংগ্ৰেছে অকলে প্ৰতিদ্বন্দ্বিতা কৰিব। আমি ৫টা জ্যেষ্ঠ নেতাৰ দল গঠন কৰিম যিয়ে তৃণমূল পৰ্যায়লৈ হাত আগবঢ়াব।”
স্মৰ্তব্য, উপ-নিৰ্বাচন অনুষ্ঠিত হ’বলগীয়া বিধানসভাৰ সমষ্টি কেইটা হৈছে =- চামগুৰি, বিহালী, ঢলাই , ছিদলী, আৰু বঙাইগাঁও।
