কংগ্ৰেছ সভানেত্ৰী তথা ৰাজ্যসভাৰ সদস্য ছোনিয়া গান্ধীকে ধৰি বিৰোধী দলৰ প্ৰতি অসংসদীয় ভাষা ব্যৱহাৰ কৰি লোকসভাত মোডী মন্ত্ৰীসভাৰ মন্ত্ৰীৰ বিৰুদ্ধে ভাবুকিমূলক মন্তব্য কৰাৰ অভিযোগ উত্থাপন হৈছে। এই ক্ষেত্ৰত কংগ্ৰেছ সাংসদ গৌৰৱ গগৈয়ে লোকসভাৰ অধ্যক্ষ ওম বিৰলালৈ পত্ৰ প্ৰেৰণ কৰি তেওঁৰ হস্তক্ষেপৰ দাবী জনাইছে।
অধ্যক্ষলৈ লিখা এখন পত্ৰত কেন্দ্ৰীয় মন্ত্ৰী ৰাজীৱ ৰঞ্জন সিং আৰু ৰৱনীত সিং বিট্টুৱে হাৰিয়ানাৰ প্ৰাক্তন মুখ্যমন্ত্ৰী ক্ৰমে ভূপিন্দৰ সিং হুদা আৰু ছোনিয়া গান্ধীৰ বিৰুদ্ধে ভাবুকি আৰু অসংসদীয় ভাষা ব্যৱহাৰ কৰাৰ অভিযোগ উত্থাপন কৰে।
লগতে পঢ়কঃ গুৱাহাটীত ভূমি দখলৰ অভিযোগত গ্ৰেপ্তাৰ বেংকৰ মেনেজাৰ
যোৰহাটৰ সাংসদ গৌৰৱ গগৈয়ে অধ্যক্ষ বিৰলালৈ প্ৰেৰণ কৰা পত্ৰত লিখিছে, ‘২৬ জুলাইত কেন্দ্ৰীয় মন্ত্ৰী ৰাজীৱ ৰঞ্জন সিঙে সংসদত হাৰিয়ানাৰ প্ৰাক্তন মুখ্যমন্ত্ৰী ভূপেন্দৰ সিং হুডাৰ (যি সাংসদ সদস্য নহয়) বিৰুদ্ধে ভাবুকিমূলক ভাষা ব্যৱহাৰ কৰিছিল। একেদৰে ২৫ জুলাইত কংগ্ৰেছ সংসদীয় দলৰ অধ্যক্ষ তথা ৰাজ্যসভাৰ সাংসদ ছোনিয়া গান্ধীৰ বিষয়ে সংসদত অসংসদীয় ভাষা ব্যৱহাৰ কৰিছিল কেন্দ্ৰীয় ৰাজ্যিক মন্ত্ৰী ৰৱনীত সিং বিট্টুৱে। আনকি বিজেপিৰ সাংসদ নিশিকান্ত ডুবেই সংসদত সাম্প্ৰদায়িকভাৱে উচটনিমূলক ভাষণ দিছিল। সংসদীয় পৰিক্ৰমা মন্ত্ৰীৰ উপস্থিতিতে এই কাণ্ড সংঘটিত হৈছিল।’
পত্ৰখনত কংগ্ৰেছৰ সাংসদগৰাকীয়ে অধ্যক্ষলৈ লগতে লিখিছে যে, ‘সংসদৰ ভিতৰত ভাবুকি আৰু অসংসদীয় ভাষা ব্যৱহাৰ কৰি বিৰোধীৰ কণ্ঠ দমনৰ চেষ্টা চলোৱাটো অতি দুৰ্ভাগ্যজনক।’ একে সময়তে গৌৰৱে এই ক্ষেত্ৰত অধ্যক্ষৰ হস্তক্ষেপ বিচাৰিছে।
লগতে পঢ়কঃ অনবদ্য ৰিয়ান! ৮টা বলত ৫ ৰান দি ৩টা উইকেট দখল; শ্ৰীলংকাৰ বিৰুদ্ধে টিম ইণ্ডিয়াৰ মসৃন জয়
তেওঁ অধ্যক্ষক আবেদন জনায়, “মই আশা কৰিছো যে আপুনি শীঘ্ৰে হস্তক্ষেপ কৰি এই নিন্দনীয় বক্তব্য দিয়া সংসদ সদস্যসকলৰ বিৰুদ্ধে ক্ষিপ্ৰ ব্যৱস্থা গ্ৰহণ কৰিব”। এতিয়া অধ্যক্ষই কি পদক্ষেপ লয় সেয়া লক্ষ্যণীয় হৈ পৰিছে।
