এক বিশাল হীৰাৰ ভাণ্ডাৰ পোৱা গৈছে। কিন্তু ইমান বৃহৎ পৰিমাণৰ হীৰা সম্ভাৰ এই পৃথিৱীলৈ অনা সম্ভৱ নহয়। এই বিশাল হীৰাৰ ভাণ্ডাৰ পোৱা গৈছে বুধ গ্ৰহত। এই গ্ৰহটোৰ ওপৰত আছে ১৪.৪৮ কিলোমিটাৰ ডাঠ হীৰাৰ স্তৰ।
পৃথিৱীতকৈ সৰু এই গ্ৰহটোৰ চুম্বকীয় ক্ষেত্ৰ যথেষ্ট দুৰ্বল, আনকি ভৌগোলিকভাৱেও সকলোতে সক্ৰিয় নহয়। অৱশ্যে বুধ গ্ৰহত এই হীৰাৰ স্তৰৰ কথা শেহতীয়াকৈ নেচাৰ কমিউনিকেশ্যন নামৰ আলোচনীত প্ৰকাশিত এক প্ৰতিবেদনত প্ৰকাশ পাইছে ।
বেইজিঙৰ চেণ্টাৰ ফৰ হাই প্ৰেচাৰ চাইন্স এণ্ড টেকন’লজি এডভান্সড ৰিচাৰ্চৰ বিজ্ঞানী য়ানহাও লিয়ে কয় যে বুধ (Mercury)ৰ গোপনীয়তা অধ্যয়ন কৰিবলৈ হ’লে ইয়াৰ ভিতৰৰ স্তৰ আৰু গঠন অধ্যয়ন কৰাটো প্ৰয়োজনীয়। আমি অনুমান কৰোঁ যে এই গ্ৰহটোও আন গ্ৰহৰ দৰে মেগমা গলি যোৱাৰ পিছত গঠন হৈছিল। কিন্তু বুধ গ্ৰহৰ এই মেগমাৰ সাগৰখন নিশ্চয় কাৰ্বন আৰু চিলিকেটৰ দ্বাৰা সমৃদ্ধ আছিল, যাৰ বাবে তাত ইমানবোৰ শক্তিশালী হীৰা পোৱা গৈছে।
লগতে পঢ়কঃ ৰাছিয়াৰ হৈ যুদ্ধ কৰি ইউক্ৰেইনত নিহত হাৰিয়ানাৰ যুৱক; পুটিনৰ দেশত বিচাৰি গৈছিল চাকৰি
মন কৰিবলগীয়া যে বুধ গ্ৰহৰ পৃষ্ঠত উপস্থিত থকা ক’লা ৰং নাছাৰ MESSENGER য়ে গ্ৰেফাইট বুলি চিনাক্ত কৰিছে, যিটো কাৰ্বনৰ এক প্ৰকাৰ। ২০১৯ চনৰ এক অধ্যয়ন অনুসৰি বুধ গ্ৰহৰ আৱৰণ পূৰ্বতে ভবাতকৈ ৫০ কিলোমিটাৰ গভীৰ। অৰ্থাৎ বুধ গ্ৰহৰ কোৰ আৰু মেণ্টেলৰ মাজত বহুত চাপ প্ৰস্তুত হ’ব। আৰু সেই চাপৰ প্ৰভাৱত বুধ গ্ৰহত থকা কাৰ্বনটো হীৰালৈ ৰূপান্তৰিত হৈছে। সেয়েহে বুধ গ্ৰহত এনে হীৰা স্তৰ পোৱা গৈছে। কিন্তু এই বিপুল পৰিমাণৰ হীৰা ইয়াত থাকিলেও ইয়াৰ পৰা এই হীৰাবোৰ পৃথিৱীলৈ অনাটো সম্ভৱ নহয়।
