এইবাৰ পুনৰ উচ্চতম ন্যায়ালয়ৰ ককৰ্থনাৰ সন্মুখীন হ’ল বলৱৎকাৰী সংস্থা চমুকৈ ইডি। ঝাৰখণ্ডৰ মুখ্যমন্ত্ৰী হেমন্ত ছৰেনৰ জামিন নাকচৰ বাবে উচ্চতম ন্যায়ালয়ৰ ওচৰত আবেদন জনাইছিল ইডিয়ে।
ইডিৰ এই আবেদন নাকচ কৰাই নহয়, উচ্চতম ন্যায়ালয়ে সতৰ্ক কৰিও দিয়ে ইডিক।
উল্লেখ কৰাৰ প্ৰয়োজন নাই যে লোকসভা নিৰ্বাচনৰ ঠিক পূৰ্বেই অবৈধ লেনদেনৰ অভিযোগত ঝাৰখণ্ডৰ মুখ্যমন্ত্ৰী হেমন্ত ছৰেনক ইডিয়ে গ্ৰেপ্তাৰ কৰিছিল।
আগতীয়াকৈ গ্ৰেপ্তাৰ উমান পাই মুখ্যমন্ত্ৰীৰ পদৰ পৰা পদত্যাগ কৰিছিল ছৰেনে। ইয়াৰ পিছতে ৰাজভৱনৰ পৰা ওলাই অহাৰ সময়ত ইডিৰ বিষয়াই ছৰেনক গ্ৰেপ্তাৰ কৰে। কিন্তু নিৰ্বাচনত অন্তত ঝাৰখণ্ড উচ্চ ন্যায়ালয়ে হেমন্ত ছৰেনক জামিন প্ৰদান কৰে।
ইয়াৰ পিছত উচ্চ ন্যায়ালয়ৰ জামিনৰ নিৰ্দেশ অবৈধ বুলি দাবী কৰি ইডিয়ে উচ্চতম ন্যায়ালয়ত গোচৰ তৰে।
কিন্তু সোমবাৰে উচ্চতম ন্যায়ালয়ে কয় যে ঝাৰখণ্ড উচ্চ ন্যায়ালয়ে দিয়া ৰায় অতি উপযুক্ত। এই ৰায়ত কোনো অবৈধ কথা নাই। উচ্চতম ন্যায়ালয়ৰ ন্যায়াধীশসকলে কয় যে ইডিয়ে যদি এই বিষয়ত জোৰ দিয়ে তেন্তে উচ্চতম ন্যায়ালয়ে কঠোৰ পদক্ষেপ গ্ৰহণ কৰিব।
উচ্চ ন্যায়ালয়ে কয় যে আমি আৰু কোনো পৰ্যবেক্ষণ কৰিব নিবিচাৰো, আৰু যদি আমি পৰ্যবেক্ষণ কৰিবলগীয়া হয় তেন্তে ই ই ডিৰ কঠিন হৈ পৰিব।
উল্লেখ্য যে যোৱা ৪ জুনত ঘোষণা কৰা হৈছিল লোকসভা নিৰ্বাচনৰ ফলাফল। ইয়াৰ পিছত ঝাৰখণ্ড উচ্চ ন্যায়ালয়ৰ নিৰ্দেশত ২৮ জুনত ৰাঁচীৰ বিৰছা মুণ্ডা কাৰাগাৰৰ পৰা জামিনত মুকলি কৰি দিয়া হয় হেমন্ত ছৰেনক।
হেমন্ত ছৰেনক জামিনত মুকলি কৰি দিয়াৰ পিছতে ঝাৰখণ্ডৰ মুখ্যমন্ত্ৰীৰ পদৰ পৰা পদত্যাগ কৰে ছম্পাই ছৰেনে। পুনৰ হেমন্ত ছৰেনে ৰাজ্য বিধানসভাত আস্থা প্ৰস্তাৱ দাখিল কৰি জয়ী হৈ মুখ্যমন্ত্ৰী হিচাপে শপত গ্ৰহণ কৰে।
উল্লেখ্য যে এই অবৈধ লেনদেনৰ গোচৰত হেমন্ত ছৰেনৰ উপৰিও প্ৰায় ২৫ জন লোকক গ্ৰেপ্তাৰ কৰা হৈছে। সকলোৰে বিৰুদ্ধে এতিয়াও তদন্ত আৰু আইনী ব্যৱস্থা চলি আছে।
