এপিএছচিত কৃষি বিষয়া নিযুক্তিক লৈ হোৱা কেলেংকাৰিৰ বিৰুদ্ধে দিয়া বিশেষ আদালতৰ ৰায়ক আদৰণি জনাইছে ৰাইজৰ দলৰ সভাপতি অখিল গগৈয়ে।
এই ৰায়ে ৰাকেশ কুমাৰ পালৰ দিনত এপিএছচিৰ নিযুক্তিত যে ব্যাপক কেলেংকাৰী সংঘটিত হৈছিল সেয়া প্রমাণিত কৰি দিলে। ৰাকেশ কুমাৰ পাল অধ্যক্ষ হৈ থকা সময়ত এপিএছচিৰ বিভিন্ন নিযুক্তিত যে ব্যাপক কেলেংকাৰী হৈছিল এয়া ৰাজহুৱাভাৱে প্ৰথমবাৰলৈ উত্থাপন কৰিছিল অখিল গগৈয়ে।
আৰটিআইৰ অধীনত সংগ্ৰহ কৰা তথ্য, নিজস্ব অনুসন্ধান আৰু বিভিন্নজনৰ পৰা পোৱা তথ্যৰ ভিত্তিত কৃষক মুক্তি সংগ্ৰাম সমিতিৰ সভাপতি হিচাপে অখিল গগৈয়ে এপিএছচিৰ কেলেংকাৰীৰ তথ্য ৰাজহুৱা কৰিছিল।
কৃষক মুক্তি সংগ্রাম সমিতিৰ উদ্যোগত ৰাকেশ কুমাৰ পালৰ দিনত হোৱা নিযুক্তিৰ কেলেংকাৰীৰ তদন্ত বিচাৰি ৰাজপথত চলিছিল ধাৰাবাহিক আন্দোলন। আন্দোলন কৰি অখিল গগৈয়ে আন কেইবাগৰাকীও সতীৰ্থৰ সৈতে গ্ৰেপ্তাৰ বৰণ কৰি কাৰাবাসো খাতিব লগা হৈছিল।
কিন্তু তদানীন্তন তৰুণ গগৈ চৰকাৰে নিযুক্তি কেলেংকাৰীক লৈ কোনো তদন্ত ঘোষণা কৰা নাছিল। সেয়েহে প্রমাণিক তথ্য প্রমাণ লৈ অখিল গগৈয়ে গুৱাহাটী উচ্চ ন্যায়ালয়ত দাখিল কৰিছিল ৰাজহুৱা স্বাৰ্থজড়িত গোচৰ।
এই গোচৰৰ ওপৰত ভিত্তি কৰিয়েই গুৱাহাটী উচ্চ ন্যায়ালয়ে এপিএছচিৰ নিযুক্তি কেলেংকাৰীৰ চিবিআই তদন্ত আৰু গুৱাহাটী উচ্চ ন্যায়ালয়ৰ অৱসৰপ্ৰাপ্ত ন্যায়াধীশৰ দ্বাৰা তদন্ত কৰোৱাৰ ৰায় প্রদান কৰিছিল।
অখিল গগৈয়ে কয় যে ২০১৫ চনৰ পৰা এপিএছচিৰ এই নিযুক্তি কেলেংকাৰীৰ বিৰুদ্ধে চলাই অহা সংগ্রামখনে আজি আদালতৰ ৰায়ত ন্যাৰ্য্যতা লাভ কৰিছে। তেখেতে লগতে এপিএছচিৰ নিযুক্তি কেলেংকাৰীৰ বিৰুদ্ধে ২০১৫ চনৰ পৰাই ধাৰাবাহিকভাৱে লাগি থকা সকলোকে ধন্যবাদ আৰু শুভেচ্ছা জনায়।
