ৰাজ্যৰ চৰকাৰী চিকিৎসালয়সমূহত ২০ শতাংশকৈ মাচুল বৃদ্ধি কৰিবলৈ লোৱা সিদ্ধান্তক ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে জনস্বাৰ্থ বিৰোধী আখ্যা দি এই সিদ্ধান্ত তৎকালে প্ৰত্যাহাৰ কৰিবলৈ দাবী জনাইছে।
চৰকাৰৰ এক নিৰ্দেশনা অনুসৰি ১ আগষ্টৰ পৰা চৰকাৰী চিকিৎসালয়সমূহে মাচুল বৃদ্ধি কৰিব লাগিব। ইয়াৰ ফলত চৰকাৰী চিকিৎসা খণ্ডৰ ওপৰত নিৰ্ভৰশীল ৰাজ্যৰ গৰিষ্ঠ সংখ্যক লোক ভীষণভাৱে ক্ষতিগ্ৰস্ত হ’ব।
চৰকাৰী চিকিৎসা ব্যৱস্থাটোৰ বিৰুদ্ধে নানা অভিযোগ আছে আৰু বিভিন্ন দল-সংগঠনৰ লগতে ৰাইজে ইয়াৰ সংশোধনী বিচাৰি আহিছে। কিন্তু চৰকাৰে এই যুক্তিসংগত দাবী মানি লোৱাৰ সলনি সম্পূৰ্ণ ব্যৱসায়ীক মনোবৃত্তিৰে মাচুল বৃদ্ধিৰ দৰে চূড়ান্ত জনবিৰোধী সিদ্ধান্ত কাৰ্যকৰী কৰিবলৈহে ওলাইছে।
যি সময়ত মুখ্যমন্ত্ৰীয়ে ৰাজ্যখনৰ অৰ্থনৈতিক অৱস্থা শক্তিশালী বুলি দাবী কৰি আহিছে সেই সময়ত ৰাজ্যৰ গৰিব জনতাৰ ওপৰত অতিৰিক্ত মাচুলৰ বোজা জাপি দিব বিচৰাটো দুৰ্ভাগ্যজনক। ইতিমধ্যে ৰাইজক মূল্যবৃদ্ধিয়ে জুৰুলা কৰিছে। এনে অৱস্থাত চিকিৎসা মাচুল বৃদ্ধি মানে বহু গৰিব পৰিয়ালক চিকিৎসাহীন অৱস্থালৈ ঠেলি দিয়াহে হ’ব। সেয়ে এনে জনবিৰোধী সিদ্ধান্ত প্ৰত্যাহাৰ কৰিবলৈ ডি ৱাই এফ আইয়ে দাবী কৰিছে।
