পশ্চিমবংগৰ প্ৰাক্তন মুখ্যমন্ত্ৰী তথা চিপিআই(এম) দলৰ শীৰ্ষস্থানীয় নেতা কমৰেড বুদ্ধদেৱ ভট্টাচাৰ্যৰ (৮০ বছৰ) বিয়োগত পাৰ্টিৰ অসম ৰাজ্যিক কমিটিয়ে গভীৰ শোক প্ৰকাশ আৰু নেতা গৰাকীৰ প্ৰতি শ্ৰদ্ধা নিবেদন কৰিছে।
দীৰ্ঘদিন তেখেতে বিভিন্ন অসুখত ভুগি আছিল। ৰাজ্যিক কমিটিয়ে কমৰেড ভট্টাচাৰ্যৰ পত্নী-পুত্ৰ সমন্বিতে শোকবিহ্বল পৰিয়াল আৰু অগণন গুণমুগ্ধৰ প্ৰতি জ্ঞাপন কৰিছে সমবেদনা।
কমৰেড বুদ্ধদেৱ ভট্টাচাৰ্যই ছাত্ৰাৱস্থাতে ১৯৬৬ চনত পাৰ্টিত যোগদান কৰি প্ৰগতিশীল ছাত্ৰ-যুৱ আন্দোলনৰ নেতৃত্ব দিয়ে আৰু ১৯৬৮ চনত পশ্চিমবংগৰ গণতান্ত্ৰিক যুৱ ফেডাৰেচনৰ সম্পাদকৰ দায়িত্ব বহন কৰে। চিপিআই(এম)ৰ পশ্চিমবংগ ৰাজ্যিক কমিটিৰো নেতৃত্বলৈ নিৰ্বাচিত হোৱাৰ পাছত ভট্টাচাৰ্যই ১৯৮৫ চনত পাৰ্টিৰ কেন্দ্ৰীয় কমিটিৰ সদস্য আৰু ২০০০ চনত পলিটব্যুৰোৰ সদস্য হিচাপে নিৰ্বাচিত হয়। ২০১৫ চনলৈ পলিটব্যুৰোৰ সদস্য হৈ থকাৰ সময়ছোৱাত তেখেতে পাৰ্টিৰ নীতি নিৰ্ধাৰণৰ ক্ষেত্ৰত গুৰুত্বপূৰ্ণ অৱদান আগবঢ়ায়।
স্বাস্থ্যজনিত কাৰণত তেখেতে পাছত পাৰ্টিৰ শীৰ্ষস্থানীয় পদবীৰ পৰা অব্যাহতি লয়। পশ্চিমবংগৰ বাওঁমৰ্চা চৰকাৰ ক্ষমতাত থকাৰ সময়ত প্ৰায় তিনি দশক কাল তেওঁ বিভিন্ন বিভাগৰ মন্ত্ৰিত্বৰ দায়িত্ব দক্ষতাৰে পালন কৰে আৰু জ্যোতি বসুয়ে মুখ্যমন্ত্ৰীৰ পদৰ পৰা অব্যাহতি লোৱাৰ পাছত ২০০০ চনৰ পৰা ২০১১ চনলৈ বাওঁমৰ্চা চৰকাৰৰ মুখ্যমন্ত্ৰীৰ পদত কাৰ্যনিৰ্বাহ কৰে। বাওঁমৰ্চা চৰকাৰৰ জনমুখী নীতিসমূহ নিৰ্ধাৰণ তথা প্ৰৱৰ্তনৰ ক্ষেত্ৰত বুদ্ধদেৱ ভট্টাচাৰ্যৰ আছিল অসামান্য অৱদান।
পশ্চিমবংগত সাহিত্য-সংস্কৃতিৰ বহু অনুষ্ঠান-প্ৰতিষ্ঠান গঢ়ি তোলা আৰু প্ৰগতিশীল সাংস্কৃতিক মূল্যবোধক প্ৰসাৰিত কৰাৰ ক্ষেত্ৰত তেখেতে উল্লেখযোগ্য অৱদান এৰি গৈছে। তেখেত একেধাৰে আছিল এজন বিশিষ্ট কবি, নাট্যকাৰ আৰু লেখক। বিদেশী ভাষাৰ বহু কেইখন উচ্চমানৰ গ্ৰন্থও তেখেতে বঙালী ভাষালৈ অনুবাদ কৰে।
কমিউনিষ্ট আদৰ্শ আৰু আন্দোলনৰ প্ৰতি এক উৎসৰ্গিত প্ৰাণ বুদ্ধদেৱ ভট্টাচাৰ্যই অতি সহজ-সৰল জীৱন যাপন কৰিছিল। মুখ্যমন্ত্ৰী হৈ থকাৰ সময়ৰ পৰাই মৃত্যু পৰ্যন্ত দুটা কোঠালীৰ এটা সৰু ঘৰতে তেওঁৰ পৰিয়ালটোৱে বসবাস কৰি আছিল।
অসমৰ পাৰ্টি সংগঠনৰ বিকাশ আৰু শ্ৰীবৃদ্ধিৰ বাবেও তেখেতে সময়ে সময়ে বিভিন্ন দিহা-পৰামৰ্শ আগবঢ়াইছিল। ২০০১ চনত পাৰ্টিৰ ৰাজ্যিক সন্মিলনত অংশগ্ৰহণ কৰি ভট্টাচাৰ্যই গুৱাহাটীৰ লতাশিল খেলপথাৰত অনুষ্ঠিত ৰাজহুৱা সভাতো ভাষণ প্ৰদান কৰিছিল। তেখেতৰ বিয়োগত পশ্চিমবংগৰ লগতে সমগ্ৰ দেশৰ বাঁওপন্থী আৰু কমিউনিষ্ট আন্দোলনৰ অপূৰণীয় ক্ষতি হ’ল।
চিপিআই(এম)ৰ অসম ৰাজ্যিক কমিটিয়ে তেখেতক শ্ৰদ্ধাৰে স্মৰণ কৰিছে। কমৰেড বুদ্ধদেৱ ভট্টাচাৰ্যৰ প্ৰতি শ্ৰদ্ধাঞ্জলি জ্ঞাপন আৰু অন্তিম বিদায় অনুষ্ঠানত ভাগ লোৱাৰ উদ্দেশ্যে আজি আবেলি পাৰ্টিৰ ৰাজ্যিক সম্পাদক সুপ্ৰকাশ তালুকদাৰ কলকাতালৈ ৰাওনা হৈছে। কাইলৈ ৯ জুলাইৰ দুপৰীয়া ৰাজহুৱা শ্ৰদ্ধাঞ্জলি আৰু শেষকৃত্য সম্পন্ন হ’ব।
