দিল্লীৰ মুখ্যমন্ত্ৰী তথা আম আদমী পাৰ্টিৰ মুৰব্বী অৰবিন্দ কেজৰিৱালে আপাততঃ উচ্চতম ন্যায়ালয়ত সকাহ নাপালে। বুধবাৰে কেজৰিৱালৰ অন্তৱৰ্তীকালীন জামিন আবেদনৰ শুনানি গ্ৰহণ নকৰিলে উচ্চতম ন্যায়ালয়ে। এই গোচৰত কেন্দ্ৰীয় তদন্তকাৰী সংস্থা চিবিআইৰ বক্তব্য বিচাৰিছে উচ্চতম ন্যায়ালয়ে। এই গোচৰৰ পৰৱৰ্তী শুনানি ২৩ আগষ্টত হ’ব। সেইদিনা কেজৰিৱালৰ জামিন সন্দৰ্ভত চিবিআইয়ে বিবৃতি দিব লাগিব।
দিল্লী আবকাৰী গোচৰত কেজৰিৱালক গ্ৰেপ্তাৰ কৰিছিল ইডিয়ে। জেলত থকাৰ সময়তে একেটা গোচৰতে চিবিআইয়ে গ্ৰেপ্তাৰ কৰিছিল। সেই গোচৰৰ জামিন বিচাৰি দিল্লী উচ্চ ন্যায়ালয়ৰ কাষ চাপিছিল কেজৰিৱালে। ৫ আগষ্টত কেজৰিৱাল গোচৰৰ শুনানিৰ সময়ত ন্যায়াধীশ নীনা বংছাল কৃষ্ণৰ বিচাৰপীঠে পৰ্যবেক্ষণ কৰিছিল যে গ্ৰেপ্তাৰৰ আঁৰত চিবিআইৰ ‘ন্যায্য’ কাৰণ আছে। গতিকে কেন্দ্ৰীয় তদন্তকাৰী সংস্থাৰ এই কাৰ্যক কেতিয়াও অবৈধ বুলি ক’ব নোৱাৰি। একে সময়তে দিল্লী উচ্চ ন্যায়ালয়ে কেজৰিৱালৰ জামিন আৱেদনৰ গোচৰটো নিষ্পত্তি কৰিছে।
উচ্চ ন্যায়ালয়ে তেওঁৰ জামিন আবেদন নাকচ কৰাৰ পিছতে যোৱা ১২ আগষ্টত উচ্চতম ন্যায়ালয়ৰ কাষ চাপিছিল দিল্লীৰ মুখ্যমন্ত্ৰীগৰাকীয়ে। বুধবাৰে উচ্চতম ন্যায়ালয়ৰ ন্যায়াধীশ সূৰ্য্য কান্তৰৰ বিচাৰপীঠত কেজৰিৱালৰ অধিবক্তা অভিষেক মনু সিংভীয়ে কয় যে ১০ মে’ত আবকাৰী গোচৰত কেজৰিৱালক অন্তৱৰ্তীকালীন জামিন দিয়া হৈছিল। পিছত জুলাই মাহত তেওঁ একেটা গোচৰতে জামিন লাভ কৰে। আনকি নিম্ন আদালতেও চিবিআইৰ গোচৰত কেজৰিৱালক জামিন মঞ্জুৰ কৰিছিল। ইয়াৰ উপৰিও চিবিআইৰ গ্ৰেপ্তাৰক উচ্চতম ন্যায়ালয়ত ‘অবৈধ’ বুলিও উল্লেখ কৰা হৈছিল।
আদালতত কেজৰিৱালৰ অধিবক্তাই কয় যে আবকাৰী গোচৰ ৰুজু হোৱাৰ এবছৰ ১০ মাহৰ পাছত চিবিআইয়ে তেওঁৰ ক্লায়েণ্টক গ্ৰেপ্তাৰ কৰে। ইয়াৰ পিছত কেজৰিৱালেকে অন্তৱৰ্তীকালীন জামিনৰ বাবে আবেদন জনায়। উচ্চতম ন্যায়ালয়ে নাকচ কৰিলে। ন্যায়াধীশ সূৰ্য্য কান্তৰৰ বিচাৰপীঠে কয়, ‘অন্তৱৰ্তীকালীন জামিনৰ কথা নক’ব। আমি কোনো অন্তৱৰ্তীকালীন জামিন নিদিওঁ।”
মন কৰিবলগীয়া যে দিল্লীৰ আবকাৰী গোচৰত ২১ মাৰ্চত ইডিয়ে গ্ৰেপ্তাৰ কৰিছিল দিল্লীৰ মুখ্যমন্ত্ৰীক। তেতিয়াৰ পৰাই তেওঁ জেলত আছে। লোকসভা নিৰ্বাচনৰ সময়ত উচ্চতম ন্যায়ালয়ৰ নিৰ্দেশত অন্তৱৰ্তীকালীন জামিনত কিছুদিন বাহিৰত আছিল। ২ জুনত পুনৰ আত্মসমৰ্পণ কৰে কেজৰীয়ে। আনহাতে, তেওঁ নিম্ন আদালতৰ পৰাও কেইবাবাৰো জামিন বিচাৰি উচ্চতম ন্যায়ালয়লৈ আবেদন জনাইছিল। কিছুদিন পূৰ্বে উচ্চতম ন্যায়ালয়ে ইডি গোচৰত কেজৰিৱালক জামিন মঞ্জুৰ কৰিছিল। অৱশ্যে কাৰাগাৰত থকাৰ সময়তে এই গোচৰত চিবিআইয়ে গ্ৰেপ্তাৰ কৰে। চিবিআইৰ গোচৰত জামিন বিচাৰি দিল্লী উচ্চ ন্যায়ালয়ৰ কাষ চাপিছিল কেজৰীয়ে। খাৰিজ হোৱাৰ পিছত উচ্চতম ন্যায়ালয়ত আবেদন জনায়।
