পশ্চিম বংগত এগৰাকী প্ৰশিক্ষাৰ্থী চিকিৎসকক ধৰ্ষণ আৰু হত্যাৰ অভিযোগৰ বিৰুদ্ধে প্ৰতিবাদৰ মাজতে ২০১২ চনৰ দিল্লী দলবদ্ধ ধৰ্ষণ কাণ্ডৰ বলি হোৱা নিৰ্ভয়াৰ মাতৃয়ে শনিবাৰে পশ্চিম বংগৰ মুখ্যমন্ত্ৰী মমতা বেনাৰ্জীয়ে পদত্যাগ কৰাৰ দাবী জনায় আৰু কয় যে তেওঁ পৰিস্থিতিটো চম্ভালিবলৈ ব্যৰ্থ হৈছে।
নিজৰ ক্ষমতা ব্যৱহাৰ কৰি দোষীৰ বিৰুদ্ধে কাম কৰাৰ পৰিৱৰ্তে মুখ্যমন্ত্ৰীয়ে প্ৰতিবাদ কৰি মানুহৰ দৃষ্টি আকৰ্ষণ কৰিবলৈ চেষ্টা কৰিছে বুলি আশা দেৱীয়ে পিটিআইক জনায়।
যোৱা ৯ আগষ্টত কলকাতাৰ আৰ জি কৰ মেডিকেল কলেজ এণ্ড হস্পিতালত কৰ্তব্যৰত অৱস্থাত ধৰ্ষণ কৰি হত্যা কৰাৰ অভিযোগ উত্থাপন হোৱা ভুক্তভোগীগৰাকী ৩১ বছৰীয়া স্নাতকোত্তৰ প্ৰশিক্ষাৰ্থী ।
মমতা বেনাৰ্জীক সমালোচনা কৰি আশা দেৱীয়ে কয় যে মমতা বেনাৰ্জীয়ে নিজৰ কৰ্তৃত্ব ব্যৱহাৰ কৰি দোষীৰ বিৰুদ্ধে ব্যৱস্থা গ্ৰহণ কৰাৰ পৰিৱৰ্তে জনসাধাৰণক বিপথে পৰিচালিত কৰাৰ চেষ্টা কৰিছে।
বেনাৰ্জীৰ নেতৃত্বত শুকুৰবাৰে মৌলালিৰ পৰা কলকাতাৰ ড’ৰিনা ক্ৰছিঙলৈ প্ৰতিবাদী সমদল উলিয়াই মহিলা চিকিৎসকগৰাকীক ন্যায়ৰ দাবী জনায়। দোষীক ফাঁচী দিবলৈ দাবী জনাই মমতাই।
আশা দেৱীয়ে কয় যে যেতিয়ালৈকে কেন্দ্ৰ আৰু ৰাজ্য চৰকাৰে ধৰ্ষণকাৰীৰ বাবে আদালতৰ পৰা ক্ষিপ্ৰ শাস্তি বিচৰাৰ ক্ষেত্ৰত গুৰুত্ব নিদিয়ে তেতিয়ালৈকে দেশৰ বিভিন্ন প্ৰান্তত প্ৰতিদিনে এনে বৰ্বৰতা সংঘটিত হৈ থাকিব।
কলকাতাৰ চিকিৎসা মহাবিদ্যালয়ত যেতিয়া ছোৱালী নিৰাপদ নহয় আৰু তেওঁলোকৰ বিৰুদ্ধে এনে বৰ্বৰতা সংঘটিত হয়, তেতিয়া দেশৰ মহিলাৰ সুৰক্ষাৰ অৱস্থা বুজিব পাৰি বুলিও কয়।
প্ৰশিক্ষাৰ্থী চিকিৎসকগৰাকীক ধৰ্ষণ কৰি হত্যা কৰাৰ অভিযোগ উত্থাপন হোৱাৰ এদিন পাছতে পশ্চিম বংগ আৰক্ষীয়ে এই অপৰাধৰ সৈতে জড়িত এজন ব্যক্তিক গ্ৰেপ্তাৰ কৰে। পাছত আৰক্ষীৰ তদন্তৰ ভুলৰ উদাহৰণ দি কলিকতা উচ্চ ন্যায়ালয়ে গোচৰটো কেন্দ্ৰীয় তদন্তকাৰী ব্যুৰো (চিবিআই)লৈ হস্তান্তৰ কৰে।
