কলকাতাৰ অভয়াকাণ্ডক লৈ দেশজুৰি প্ৰতিবাদ অব্যাহত থকাৰ সময়তে অসমৰ নগাঁও জিলাৰ ধিঙত সংঘটিত হৈছে এক জঘন্য ঘটনা। এগৰাকী নাবালিকাক ৩ দুর্বৃত্তই ধৰ্ষণ কৰি পথৰ দাঁতিত পেলাই থৈ যোৱাৰ যি ভয়ংকৰ অভিযোগ উত্থাপন হৈছে তাৰ তদন্ত আৰু ভুক্তভোগীৰ ন্যায়ৰ দাবী উত্থাপন কৰিছে জাতীয় যুৱ বাহিনীয়ে। আজি ৰাইজৰ দলৰ মঠঘৰীয়াস্থিত মুখ্য কাৰ্যালয়ৰ পৰা সংবাদমেল সম্বোধন কৰি জাতীয় নাৰী বাহিনীৰ পিংকী বৰপূজাৰী, মুখপাত্র তথা তথ্য প্ৰচাৰ সম্পাদক অংকুমান বৰদলৈ, সহ সাধাৰণ সম্পাদক চেমুৱেল পেণ্ডকে ধৰি জাতীয় যুৱ বাহিনী আৰু নাৰী বাহিনীৰ বিষয়ববীয়াসকলে এই জঘন্য ঘটনাক তীব্র ভাষাৰে নিন্দা কৰে। সংবাদ মাধ্যমক উদ্দেশ্য কৰি সাধাৰণ সম্পাদক বিকাশ ডেকাই কয় যে, নাৰীক সুৰক্ষা দিয়াৰ ক্ষেত্ৰত চূড়ান্তভাবে ব্যৰ্থ হৈছে বিজেপি চৰকাৰ। ভাৰতৰ প্ৰেক্ষাপটতেই হওঁক বা অসমৰ প্ৰেক্ষাপটতেই হওঁক আজি নাৰীৰ সুৰক্ষা যেন কেৱল শ্লোগানতেই সীমাবদ্ধ।
আজিও ভাৰত নাৰীৰ বিৰুদ্ধে সংঘটিত কৰা অপৰাধৰ চতুৰ্থ স্থানত আছে। নেশ্যনেল ক্রাইম ৰেকৰ্ডছ ব্যুৰোৰ ২০২১ চনৰ বাৰ্ষিক প্রতিবেদন অনুসৰি সমগ্র দেশতে ৩১,৬৭৭ টা ধৰ্ষণৰ গোচৰ পঞ্জীয়ন হৈছিল, অর্থাৎ দৈনিক গড়ে ৮৬ টা গোচৰ পঞ্জীয়ন কৰা হৈছিল, যিটো ২০২০ চনৰ তুলনাত ২৮,০৪৬ টা গোচৰ বৃদ্ধি পাইছে। আনহাতে ২০১৯ চনত ৩২,০৩৩ টা গোচৰ পঞ্জীয়ন হৈছিল। সময়ৰ পৰিৱৰ্তনৰ লগে লগে মানুহৰ মানসিকতা সলনি হ‘ব লাগিছিল যদিও লাহে লাহে আমাৰ সমাজত এনেকুৱা ঘটনাবোৰ বৃদ্ধি পাবলৈ ধৰিছে। অৱশ্যে যিখন দেশত খোদ চৰকাৰী পক্ষৰ নেতৃত্বত ধৰ্ষণকাৰীক মালা পিন্ধাই আদৰণি জনোৱা হয় সেইখন দেশত ন্যায় বিচাৰি ৰাজপথত ওলোৱাটোও অনর্থক বুলি উল্লেখ কৰে সংগঠনটোৱে। নৰেন্দ্ৰ মোদী আৰু বিজেপি চৰকাৰৰ বেটী বচাওঁ, বেটী পঢ়াওঁ কেবল শ্লোগানতেই আবদ্ধ হৈ ৰৈছে। বাস্তৱত কোনো ফলাফল নাই।
