অৱশেষত সন্ধান ওলাল বিশাল ফুকনৰ ট্ৰেডিং প্ৰৱঞ্চনাৰ অন্যতম সহযোগী অভিনেত্ৰী চুমি বৰাৰ! কণ্ঠশিল্পী দীক্ষুৰ গুৱাহাটীৰ ঘৰত লুকাই আছিল চুমি বৰা আৰু স্বামী তাৰ্কিক বৰা। কণ্ঠশিল্পী দীক্ষুৱে নিজেই স্বীকাৰ কৰিলে এই কথা।
বুধবাৰে সংবাদ মাধ্যমৰ আগত কণ্ঠশিল্পী দীক্ষুৱে জনায় যে চুমি বৰা আৰু তাৰ্কিক বৰা মঙলবাৰে তেওঁলোকৰ ঘৰলৈ আহিছিল। নিউ গুৱাহাটীৰ গণেশ নগৰৰ তেওঁলোকৰ ঘৰলৈ আহিছিল চুমি আৰু তেওঁৰ স্বামী।
দীক্ষুৱে সংবাদ মাধ্যমৰ আগত জনোৱা মতে চুমি আৰু তাৰ্কিক তেওঁলোকৰ ঘৰত থাকোতেই তাৰ্কিকলৈ আৰক্ষীৰ ফোন আহিছিল। মঙলবাৰে দিনৰ ১ বজাত আহি নিশা ১২ বজাৰ পিছতহে দুয়োজনে দীক্ষুৰ ঘৰৰ পৰা ওলাই গৈছিল।
কিন্তু চুমি বৰা আৰু তাৰ্কিকৰ বিৰুদ্ধে আৰক্ষীয়ে অভিযান চলাই থকাৰ কথা জনাৰ পিছতো দীক্ষুৱে কিয় আৰক্ষীক খবৰ দিয়া নাছিল তাক লৈও ৰহস্যৰ সৃষ্টি হৈছে হৈছে।
লগতে পঢ়কঃ বিশাল ফুকনৰ পিছত আন এজন অনলাইন প্ৰৱঞ্চক ৰঞ্জিত কাকতিক গ্ৰেপ্তাৰ; আৰক্ষীৰ ব্যাপক অভিযান
অৱশ্যে দীক্ষুৱে কয় যে তেওঁলোকে পূৰ্বে কথাটো গম পোৱা নাছিল। কিন্তু যেতিয়া আচল কথাটো গম পায়, তেতিয়া তেওঁলোকক যাবলৈ কৈছিল আৰু আৰক্ষীৰ ওচৰত আত্মসমৰ্পণ কৰিবলৈ কৈছিল।
কণ্ঠশিল্পী দীক্ষু আৰু তেওঁৰ পত্নী বিজিয়েতাৰ সৈতে চুমি আৰু তাৰ্কিকৰ ভাল সম্পৰ্ক আছিল। আগতেও তেওঁলোক দীক্ষুহঁতৰ ঘৰলৈ আহিছিল। এইবাৰ বিপদত পৰা সময়ত পুনৰ তেওঁলোকৰ ঘৰলৈ আহিল যদিও তেওঁলোকৰ বাবে বিপদো সৃষ্টি কৰি গ’ল।
উল্লেখ্য যে মহাপ্ৰৱঞ্চক বিশাল ফুকনক গ্ৰেপ্তাৰ কৰাৰ পিছৰে পৰা পলাতক হৈ আছিল চুমি বৰা। চুমিক বিচাৰি মহানগৰ আৰক্ষীয়ে অভিযান চলাইছিল যদিও ক’তো কোনো শুংসূত্ৰ পোৱা নাছিল।
কিন্তু এইবাৰ কণ্ঠশিল্পী দীক্ষুৱে তেওঁলোকৰ ঘৰলৈ অহাৰ কথা সদৰী কৰাৰ লগে লগে নতুন জল্পনা-কল্পনা আৰম্ভ হৈছে।
জানিব পৰা মতে, দীক্ষুহঁতৰ ঘৰলৈ অহাৰ পিছতে চুমি আৰু স্বামীয়ে মবাইল অফ কৰিছিল। তেতিয়াৰ পৰাই আৰক্ষীয়ে তেওঁলোকৰ সন্ধান বিচাৰি হাবাথুৰি খাইছে।
লগতে পঢ়কঃ চিনেমাৰ নায়িকা কৰাৰ নামত হোটেলত মহিলাক ধৰ্ষণ? দক্ষিণৰ জনপ্ৰিয় তাৰকাৰ বিৰুদ্ধে অভিযোগ!
দীক্ষু আৰু পত্নীয়ে তাৰ্কিক-চুমিৰ সৈতে মিউজিক ভিডিঅ’ও কৰিছে। গতিকে তেওঁলোকৰ সম্পৰ্ক ভালেই। আনকি চুমি বৰাৰ বিয়াতো তেওঁলোক উপস্থিত আছিল। মাত্ৰ তেওঁলোকৰ এই কাৰনামা কিমানদূৰ জানিছিল সেয়াহে ৰহস্যৰ আৱৰ্তত।
এতিয়া ইয়াৰ পৰাই আৰক্ষীয়ে বহু চৰ্চিত প্ৰৱঞ্চক দম্পতি চুমি আৰু স্বামী তাৰ্কিক কেনেদৰে জালত পেলাবলৈ সক্ষম হয় সেয়া লক্ষ্যণীয় হ’ব।
