লোকেল কুংফু নামটো অসমৰ প্ৰায়বোৰ দৰ্শক ৰাইজৰে বিদিত। এই ৫ ছেপ্তেম্বৰত মুক্তি লাভ কৰিছে লোকেল কুংফু-৩ য়ে। একচন-ক’মেডি(সমৰকলা আৰু হাস্যৰস)ধৰ্মী এই ছবিখনৰ পৰিচালনা কৰিছে কেনী দেউৰী বসুমতাৰীয়ে। কাহিনী,চিত্ৰনাট্যও লিখিছে কেনী দেউৰী বসুমতাৰীয়েই। ২০১৩ চনত আৰু ২০১৭ চনত ক্ৰমান্বয়ে মুক্তি লাভ কৰা লোকেল কুংফু-১ আৰু ২ ৰ পিছত এইবাৰ মুক্তি লভিলে লোকেল কুংফু-৩ য়ে। ছবিখন বৰ্তমানে অসমৰ ভিন্ন ছবিগৃহত চলি আছে।
ছবিৰ আৰম্ভণি হয় এটি ৱাইড এংগল শ্বটেৰে। এখন বিদ্যালয়ত তিনি কিশোৰ ছাত্ৰই লুকাই-চুৰকৈ ধূম্ৰপান কৰিবলৈ লওঁতেই শিক্ষকে ধৰা পেলাইহি। পৰৱৰ্তী অংশত সেই কিশোৰ কেইজনক শিক্ষকজনে বিশেষভাৱে পঢ়া-শুনাত চকু দিয়াত তিনিওৱে মেট্ৰিক পৰীক্ষাত উত্তীৰ্ণ হয়। সময় বাগৰে,তিনি কিশোৰ ডাঙৰ হৈ নিজ জীৱিকা আৰ্জন কৰিবলৈ ধৰে। আৰু শিক্ষকজনেও জৰুৰী শিক্ষাৰ অভাৱত থকা ল’ৰা-ছোৱালীক নিজৰ মাটিতে ঘৰ এটি সাজি বিনামূলীয়াকৈ পঢ়োৱাই থাকে। কাহিনীয়ে গতি সলাই যেতিয়া সেই মাটিখিনি বেদখল কৰিবলৈ গুণ্ডাবাহিনী আহে। ছবিখনৰ কাহিনী আৰম্ভণিৰে পৰাই গতিশীল,ক’তো ৰৈ যাবলগীয়া বিধৰ নহয়। আৰু চিত্ৰনাট্যখনো সু-সংৰচিত। ছবিখনৰ মূল উপাদান কি সেয়া আৰম্ভণিৰে পৰাই সুস্পষ্ট। আৰম্ভণিৰ পৰাই মৃদু-মধুৰ হাস্যৰসৰ উপস্থাপন কৰা হৈছে। সমৰকলা বা একচনৰ দৃশ্যসমূহ আন এক ভাল লগা অংশ ছবিখনৰ। তিনি ছাত্ৰই কিদৰে শিক্ষকজনক তেওঁৰ মাটি টুকুৰা ঘূৰাই পোৱাত সহায় কৰে,তাক লৈয়েই ছবিখনৰ পৰৱৰ্তী অংশ আগবাঢ়ে। তাৰ মাজতে চাৰ্লি(কেনী)ৰ চৰিত্ৰটোৰ প্ৰবেশ ঘটে ছবিত। লগতে ৰিম্পী দাসৰো এটি সৰু চৰিত্ৰ আছে ছবিখনত। কেনী বসুমতাৰীৰ আন দুখনমান ছবিৰ দৰে এইখন ছবিতো নাৰীবাদ সম্পৰ্কে শক্তিশালী সংলাপ আছে। একেদৰেই লোকেল কুংফু-৩ ত আছে জাতীয়তাবাদী আৱেগৰ উপস্থাপনো। সুৰুয ডেকাৰ চিনেমেট’গ্ৰাফীৰ কাম ভাল লগা। লগতে কেনী বসুমতাৰীৰ সুন্দৰ সম্পাদনাৰ দিশটোও উল্লেখনীয়। ট’নী বসুমতাৰীৰ আৱহ সংগীতো পৰিস্থিতি সাপেক্ষ।
লোকেল কুংফু-৩ ৰ অভিনয়শিল্পীসকল প্ৰায়ভাগেই পূৰ্বৰ লোকেল কুংফুত অভিনয় কৰা শিল্পী। উৎকল হাজুৱাৰী,বিভাস সিনহা,বিভূতি ভূষণ হাজৰিকা,বনী দেউৰী,ট’নী দেউৰী,কেনী দেউৰী বসুমতাৰী,মন্টু দেউৰীৰ লগতে সকলোৰে অভিনয় সহজ তথা প্ৰাকৃতিক। বিশেষভাৱে উল্লেখ কৰিব লাগিব বিভূতি ভূষণ হাজৰিকাৰ সুন্দৰ অভিনয়ৰ কথা। লোকেল কুংফু-৩ অন্তও ভাললগা। মুঠতে হাস্যৰসধৰ্মী সমৰকলাৰ এই ছবিখন চাই আপুনি নিৰাশ নহয়।
-ৰিমলী বৰকটকী
mail- [email protected]
