আমেৰিকা ভ্ৰমণলৈ যোৱা বিৰোধী নেতা ৰাহুল গান্ধীক পুনৰ লক্ষ্য কৰি লৈছে বিজেপিয়ে। পাকিস্তান দখল কৰা কাশ্মীৰ পাকিস্তানৰ অংশ আৰু তীব্ৰ ভাৰত বিৰোধী বুলি দাবী কৰা আমেৰিকাৰ কংগ্ৰেছৰ ডেম’ক্ৰেটিক সদস্য ইলহান ওমৰৰ সৈতে ৰাহুলৰ বৈঠকত সমালোচনাত্মক হৈ পৰিছে বিজেপি। বুধবাৰে পুৱা বিজেপিৰ আই টি চেলৰ মুৰব্বী অমিত মালব্যই এক সাক্ষাৎকাৰত কংগ্ৰেছৰ সাংসদ ৰাহুলক গৰিহণা দিয়ে।
মালব্যই অভিযোগ কৰে যে ৰাহুল গান্ধী পাকিস্তানী সমৰ্থিত ভাৰত বিৰোধী আমেৰিকা নেতা ইলহান ওমৰৰ সৈতে যোগাযোগত আছিল। আমেৰিকাত অনুষ্ঠিত হোৱা এক অনুষ্ঠানতো দুয়োকে একেলগে দেখা গৈছিল। অমিতৰ মতে, ভাৰতৰ বিৰোধী নেতা ৰাহুল গান্ধীয়ে ইলহান ওমৰক আমেৰিকাত সাক্ষাৎ কৰিছিল। ওমৰ হৈছে পাকিস্তানী সমৰ্থিত ভাৰত বিৰোধী কণ্ঠ। তেওঁ এজন উগ্ৰ ইছলামিক আৰু আজাদ কাশ্মীৰৰ সমৰ্থক। কেৱল সেয়াই নহয়, ওমৰৰ বিৰুদ্ধে হামাছক সমৰ্থন কৰাক লৈও দেশত বিতৰ্কৰ সৃষ্টি হৈছে।
অমিতে আৰু অভিযোগ কৰে যে পাকিস্তানী নেতাসকলেও শেহতীয়াকৈ উগ্ৰপন্থীৰ সৈতে গোপন বুজাবুজি কৰাৰ ক্ষেত্ৰত সতৰ্কতাৰে ভৰি দিছে। তাত কংগ্ৰেছে ভাৰতৰ বিৰুদ্ধে কাম কৰি আছে। প্ৰসংগক্ৰমে ইলহান ওমৰক লৈ হোৱা বিতৰ্ক নতুন নহয়। আমেৰিকাৰ কংগ্ৰেছৰ ডেম’ক্ৰেটিক সদস্য ইলহান মিনেছ’টাৰ পৰা কংগ্ৰেছৰ সদস্য। ১৯৯১ চনত ছোমালিয়াৰ গৃহযুদ্ধৰ সময়ত তেওঁ পৰিয়ালসহ পলায়ন কৰে। চাৰি বছৰ কেনিয়াৰ শৰণাৰ্থী শিবিৰত কটায়। তাৰ পৰা ১৯৯৫ চনত তেওঁ আমেৰিকালৈ গুচি যায়।
তেওঁ আমেৰিকাৰ কংগ্ৰেছৰ প্ৰথমজন ছোমালি-আমেৰিকান সদস্য। তেওঁ বিভিন্ন সময়ত ভাৰত বিৰোধী আৰু পাক সমৰ্থক মন্তব্যৰ বাবে বিতৰ্কৰ কেন্দ্ৰবিন্দু হৈ আহিছে। ২০২২ চনত পাকিস্তান দখলত থকা কাশ্মীৰলৈ অহাৰ সময়ত তেওঁক তীব্ৰ নিন্দা আৰু সমালোচনা কৰা হৈছিল। ২০২৩ চনৰ ফেব্ৰুৱাৰী মাহত ৰিপাব্লিকান নিয়ন্ত্ৰিত কংগ্ৰেছৰ বৈদেশিক পৰিক্ৰমা সমিতিৰ পৰা ইলহানক অপসাৰণ কৰা হয়। তেওঁৰ বিৰুদ্ধে ইজৰাইল বিৰোধী আৰু ইহুদী বিৰোধী মন্তব্য কৰাৰ অভিযোগ উত্থাপন হৈছিল।
২০২২ চনৰ জুন মাহত আমেৰিকাৰ হাউছ অৱ ৰিপ্ৰেজেণ্টেটিভছতো ওমৰে এটা প্ৰস্তাৱ উত্থাপন কৰিছিল। য’ত তেওঁ ভাৰতত মানৱ অধিকাৰ উলংঘা আৰু ধৰ্মীয় স্বাধীনতাৰ অধিকাৰ উলংঘাৰ অভিযোগ উত্থাপন কৰে। তাত তেওঁ দেশখনে মুছলমান, খ্ৰীষ্টান, শিখ, দলিত, জনজাতীয় আৰু অন্যান্য ধৰ্মীয় আৰু সাংস্কৃতিক সংখ্যালঘুৰ অধিকাৰ খৰ্ব কৰাৰ অভিযোগ উত্থাপন কৰি প্ৰস্তাৱ দাখিল কৰে। ওমৰৰ সৈতে একেলগে ৰাহুলৰ ছবি ভাইৰেল হোৱাৰ পিছৰে পৰা বিজেপিয়ে তীব্ৰ সমালোচনা কৰিছে।
