কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ নেতৃত্বত কাৰ্বি আংলং, পশ্চিম কাৰ্বি আংলং আৰু হোজাই জিলাৰ কুঁহিয়াৰ খেতিয়ক সন্থাৰ এক প্ৰতিনিধি দলে আজি মু্খ্য মন্ত্ৰী সৰ্বানন্দ সোণওৱালক সাক্ষাৎ কৰি কুঁহিয়াৰ খেতিয়কসকল সন্মুখীন হৈ অহা সমস্যাসমূহৰ বিষয়ে অৱগত কৰে।
প্ৰতিনিধি দলটোৱে বিশেষকৈ মুখ্য মন্ত্ৰীক গুৰ উৎপাদনকাৰী সকলে সন্মুখীন হোৱা বিভিন্ন সমস্যা অৱগত কৰাৰ লগতে উক্ত সমস্যাসমূহ নিৰাময় কৰি এই ব্যৱসায়ৰ লগত জড়িত স্থানীয় কৃষক সকলৰ উপাৰ্জনৰ পথ সুগম কৰাৰ বাবে ক্ষীপ্ৰভাৱে কাৰ্যকৰী ব্যৱস্থা ল’বলৈ আহ্বান জনায়।
প্ৰতিনিধি দলটোৱে জনোৱা মতে, কুঁহিয়াৰ খেতিয়ক তথা গুৰ উৎপাদনকাৰী সকলে শেহতীয়াকৈ ৰাজ্যৰ বিভিন্ন জিলালৈ তেওঁলোকৰ উৎপাদিত গুৰ ৰপ্তানি কৰাত বিভিন্ন সমস্যাৰ সন্মুখীন হৈছে।
মুখ্য মন্ত্ৰী এইক্ষেত্ৰত ফলপ্ৰসূ পদক্ষেপ গ্ৰহণ কৰা হ’ব বুলি প্ৰতিনিধি দলটোক আশ্বাস প্ৰদান কৰি জনাই যে ইতিমধ্যে ৰাজ্য চৰকাৰে কুঁহিয়াৰ খেতিয়কসকলৰ স্বাৰ্থত এখন চুগাৰ পলিচি ঘোষণা কৰিছে।
মুখ্য মন্ত্ৰীক সাক্ষাৎ কৰা আজিৰ প্ৰতিনিধি দলটোত গুৰ ফাৰ্মাৰচ এছ’চিয়েশ্যনৰ সভাপতি শান্তি শৰ্মা, সম্পাদক ৰঞ্জিত প্ৰসাদ বাৰৈ, স্বায়ত্ত শাসিত পৰিষদৰ কৃষি বিভাগৰ দায়িত্বত থকা কাৰ্যবাহী সদস্য অমৰ টিছুৰ লগতে আন কেইবাগৰাকী কাৰ্যবাহী সদস্য উপস্থিত আছিল।
