শিৱসাগৰত অ’এনজিচি বিষয়াৰ ঘৰত আৰক্ষীৰ অভিযান সন্দৰ্ভত আৰু বকতাত একাউন্টাৰ৷
শিৱসাগৰত অ এন জি চিৰ বিষয়া অপহৰণৰ ভয়ংকৰ ব্লুপ্ৰিন্ট।
শিৱসাগৰৰ আৰক্ষী অধীক্ষকে স্পষ্ট কৰিলে সংবাদমেল যোগে।
২০২৪ চনৰ মে মাহৰ পৰাই অপহৰণৰ পৰিকল্পনা আলফা স্বাধীনৰ।
খোদ অ এন জি চিৰ বিষয়াৰ জৰিয়তেই অপহৰণৰ চেষ্টা। অ এন জি চিৰ বিষয়া তাহিৰুল হুছেইন জড়িত এই সমগ্ৰ পৰিকল্পনাত।
আৰক্ষীৰ অভিযানত আটক সমগ্ৰ পৰিকল্পনাৰ আঁৰৰ ব্যক্তি।
আৰক্ষীৰ জিম্মাত ঈৰচাদ লটিফ ওৰফে মিঠু আৰু ছালফা ৰাহুল হাজৰিকা ওৰফে লাডেন।
উল্লেখ্য, মঙ্গলবাৰে পুৱাৰেপৰা শিৱসাগৰ আৰক্ষীয়ে অভিযান চলায় তাহিৰুল হুছেইন আৰু ইৰচাদ লটিফৰ বাসগৃহত। অভিযানকালত আৰক্ষীয়ে জব্দ কৰে বহু আপত্তিজনক সা-সামগ্ৰী।
এই সন্দৰ্ভত সমগ্ৰ ঘটনা সদৰি কৰিলে শিৱসাগৰৰ আৰক্ষী অধীক্ষক শুভ্ৰজ্যোতি বৰাই।
আৰক্ষীয়ে আটক কৰা ইৰচাদ লটিফক সোধপোচৰ অন্তত পোহৰলৈ আহে সমগ্ৰ পৰিকল্পনাৰ কথা।
৬ অক্টোবৰ তাৰিখে বকতাত থকা অ এন জি চিৰ এটা ৰিগৰপৰা সন্ধিয়া ৫ঃ৩০ ৰ পৰা ৬ঃ৩০ বজাৰ ভিতৰত তাত কৰ্মৰত দুই বা ততোধিক উচ্চপদস্থ অ এন জি চিৰ বিষয়াক অপহৰণৰ পৰিকল্পনা কৰিছিল ৰাহুল হাজৰিকা ওৰফে লাডেন, তাহিৰুল হুছেইন আৰু ইতিমধ্যে আটকাধীন হৈ থকা ইৰচাদ লটিফে।
একেটা ৰিগতে এচিষ্টেন্ট ইঞ্জিনিয়াৰ হিচাপে কাম কৰিছিল তাহিৰুল হুছেইনে। আৰু ৰিগটোত কৰ্মৰত সকলো উচ্চপদস্থ বিষয়াৰ তথ্যপাতি যোগান ধৰিছিল তাহিৰুল হুছেইনে। আনহাতে এই সমগ্ৰ অপহৰণ সংঘটিত কৰিবৰ কাৰণে ৫ তাৰিখেই তাহিৰুলৰ ঘৰত বাহৰ পাতিছিল ছালফা লাডেনে।
আৰু ৬ তাৰিখে পুৱা এখন ইনভা গাড়ীৰে তিনিও চৰাইদেউৰৰ সমীপৰ অসম নগালেণ্ড সীমান্তৰ পৰা চাৰিজন আলফা কেডাৰক গাড়ীত উঠাই আহি দিনৰ ভাগত ঘূৰি ফুৰিছিল শিৱসাগৰৰ ৩৭ নং ৰাষ্ট্ৰীয় ঘাইপথত। আৰু সন্ধিয়া নিদিষ্ট সময়ত অপহৰণৰ পৰিকল্পনা কৰি হৈছিল যদিও এই পৰিকল্পনা বিফল হয়।
সমগ্ৰ ঘটনাৰ পম খেদি আৰক্ষীয়ে ছালফা ৰাহুল হাজৰিকাক মৰাণৰ পৰা পুৱতি নিশা আটক কৰে। আৰু বকতাৰ নেমুগুৰিৰ নিদিষ্ট ৰিগলৈ অনুসন্ধানৰ বাবে লৈ যোৱা অৱস্থাত এনকাউন্টাৰ কৰে। ভৰিত আঘাতপ্ৰাপ্ত হোৱা লাডেনক ইতিমধ্যে প্ৰেৰণ কৰা হৈছে ডিব্ৰুগড় মেডিকেল কলেজলৈ।
ইফালে অ এন জি চিৰ বিষয়া তাহিৰুল হুছেইন বৰ্তমানেও পলাতক। আৰক্ষীয়ে তাহিৰুলক বিচাৰি অব্যাহত ৰাখিছে অভিযান।
সমগ্ৰ ঘটনা সন্দৰ্ভত নেমুগুৰি আৰক্ষী থানাত 11/2024 নম্বৰত গোচৰ ৰুজু কৰি তদন্ত অব্যাহত ৰাখিছে।
