অৰুণাচল প্ৰদেশত বৰ্তমান ৩৬টা তুষাৰফুটুকী প্ৰজাতিৰ বাঘৰ সন্ধান পোৱা গৈছে। মঙলবাৰে অৰুণাচল প্ৰদেশৰ বনমন্ত্ৰী ৱাংকি লোৱাঙে এই তথ্য প্ৰকাশ কৰে।
ডব্লিউ ডব্লিউ এফ ইণ্ডিয়াৰ সহযোগত পৰিৱেশ, বন আৰু জলবায়ু পৰিৱৰ্তন বিভাগে এক অধ্যয়ন চলাই তুষাৰফুটুকীৰ জনসংখ্যাৰ তথ্য প্ৰকাশ কৰিছে।
বৈজ্ঞানিকভাৱে Panthera uncia নামেৰে জনাজাত এই তুষাৰফুটুকী হিমালয় অঞ্চলৰ এবিধ বাঘ। সংখ্যাত তাকৰ হ’লেও এই বাঘ সাধাৰণতে হিমালয় পাদদেশৰ বৰফাঞ্চলত পোৱা যায়।
এই প্ৰজাতিটোৰ লগত হিমালয়ৰ বিভিন্ন জনগোষ্ঠীৰ স্থানীয় লোককথা, সংস্কৃতি আৰু পৰম্পৰাৰ এক সম্পৰ্ক আছে।
২০০৮ চনত ভাৰত চৰকাৰে পাহাৰত এই জন্তুটোৰ জনসংখ্যা বৃদ্ধি, ইহঁতৰ বাসস্থান সুৰক্ষিত আৰু প্ৰাকৃতিক ঐতিহ্য সংৰক্ষণ আৰু সুৰক্ষাৰ বাবে ‘স্নো লেপাৰ্ড’ নামৰ প্ৰকল্প এটা আৰম্ভ কৰে।
উল্লেখ্য যে, অৰুণাচলৰ বহু জনগোষ্ঠীয়ে এই বাঘটোক আধ্যাত্মিক তাৎপৰ্য হিচাপে গ্ৰহণ কৰে। বহু জনগোষ্ঠীৰ বাবে ই এক জাতীয় টোটেম(প্ৰতীক)।
শান্ত, সুন্দৰ এই বাঘটো আটাইতকৈ ৰহস্যময় বাঘবোৰৰ ভিতৰত অন্যতম। ইয়াক ‘মাউণ্টেন গোষ্ট’ বুলিও কোৱা হয়।
ভাৰতত লাডাখ, জম্মু-কাশ্মীৰ, উত্তৰাখণ্ড, হিমাচল প্ৰদেশ, অৰুণাচল প্ৰদেশ আৰু ছিকিমত তু্ষাৰফুটুকী পোৱা যায়।
অৰুণাচল প্ৰদেশৰ ১৫ হাজাৰ বৰ্গ কিলোমিটাৰতকৈও অধিক অঞ্চলত এই বাঘসমূহে বিচৰণ কৰে।
প্ৰতিবেদন অনুসৰি ২০২১ চনত পৰিৱেশ বন আৰু জলবায়ু পৰিৱৰ্তন বিভাগে এক প্ৰকল্প আৰম্ভ কৰিছে। বিভাগটোৱে ২০২১ চনৰ ২৪ জুনৰ পৰা ৯ ডিচেম্বৰলৈকে সমগ্ৰ ৰাজ্যতে ১১৫টা তুষাৰফুটুকীৰ বাসস্থান সংৰক্ষণৰ বাবে পদক্ষেপ গ্ৰহণ কৰিছে। এই বিভাগটোৱেই প্ৰথমবাৰৰ বাবে তুষাৰফুটুকীৰ জনসংখ্যাৰ জৰীপ সম্পন্ন কৰিছে।
