পৃথিৱীৰ ‘আটাইতকৈ মোটা মেকুৰী’ হিচাপে পৰিচিত ক্ৰাম্ব্ছৰ মৃত্যু হৈছে। ৰাছিয়াৰ মেকুৰী ক্ৰাম্ব্ছৰ ওজন আছিল ১৭ কিলোগ্ৰাম। শেহতীয়াকৈ খাদ্য নিয়ন্ত্ৰণৰ জৰিয়তে ওজন হ্ৰাসৰ প্ৰক্ৰিয়া আৰম্ভ হৈছিল। ওজন যথেষ্ট কমি গ’ল। কিন্তু এই প্ৰক্ৰিয়া আৰম্ভ কৰাৰ কেইসপ্তাহমানৰ ভিতৰতে তাৰ মৃত্যু হয়। ৰোগৰ কোনো লক্ষণ দেখা নগ’লেও টিউমাৰৰ বাবে তাৰ হঠাৎ মৃত্যু হোৱা বুলি জানিব পৰা গৈছে।
ক্ৰাম্ব্ছক ক্ৰছিক বুলিও জনা গৈছিল। ব্যতিক্ৰমী ওজনৰ বাবে সি বিশ্বজুৰি দৃষ্টি আকৰ্ষণৰ সৃষ্টি কৰিছিল। ৰাছিয়াৰ এখন চিকিৎসালয়ৰ বেছমেণ্টৰ পৰা উদ্ধাৰ কৰা হৈছিল তাক। কিন্তু সেই সময়লৈকে সি চূপ, হুইস্কি আৰু বিস্কুটৰ প্ৰতি আসক্ত হৈ পৰিছিল।
ইয়াৰ পিছতে তাক এটা পশু আশ্ৰয় শিবিৰত গতাই দিয়া হয়। শেহতীয়াকৈ ক্ৰাম্ব্ছৰ ওজন কমোৱাৰ বাবে কঠোৰ ডায়েট প্লেন লোৱা হৈছিল। ওজন কমিছিল তিনি কিলোতকৈও অধিক। কিন্তু হঠাতে তাৰ মৃত্যু হ’ল।
ক্ৰাম্ব্ছৰ মৃত্যুৰ পিছত চিকিৎসকে তাৰ শৰীৰ পৰীক্ষা কৰি কেন্সাৰ সৃষ্টিকাৰী টিউমাৰ হোৱা বুলি গম পায়। যাৰ বাবে তাৰ অংগ-প্ৰত্যংগবোৰ হঠাতে বিকল হ’বলৈ আৰম্ভ কৰে। আশ্ৰয় শিবিৰৰ মালিকে ক্ৰাম্ব্ছৰ মৃত্যুৰ বাবে শোক প্ৰকাশ কৰি কয় যে মেকুৰীটোৰ অসুস্থতাৰ কোনো লক্ষণ নাছিল।
তেওঁ কয় যে ‘’আমি আল্ট্ৰাছাউণ্ড কৰিব পৰা নাছিলো। কিন্তু আমি তাৰ স্বাস্থ্যৰ ওপৰত অহৰহ নিৰীক্ষণ কৰি আছিলো। মোৰ বেয়া লাগিছে যে মই আগতে তাৰ ৰোগ ধৰিব নোৱাৰিলো। নহ’লে হয়তো তাক ৰক্ষা কৰিব পৰা গ’লহেঁতেন।‘’
