শিৱসাগৰ জিলাৰ নামতিবাসীৰ বাবে এটা ভাল খবৰ ॥
আন্তঃৰাষ্ট্ৰীয় পৰ্যায়ত অনুষ্ঠিত হোৱা যোগ প্ৰতিযোগিতাত অংশ লৈ বৃহত্তৰ নামতি অঞ্চললৈ গৌৰৱ কঢ়িয়া আনিবলৈ সক্ষম হৈছে এগৰাকী কণমানি ছাত্ৰী জ্যোতিস্মা দত্তই ॥
নামতি মাইগুৰিৰ মাখন দত্ত আৰু নিতালী দত্তৰ কন্যা জ্যোতিস্মা দত্তই পাঞ্জাৱৰ মাণ্ডী গোবিন্দগড়ৰ দেশ ভগত বিশ্ববিদ্যালয়ৰ প্ৰাঙ্গনত ২৪ অক্টোবৰৰ পৰা ২৭ অক্টোবৰলৈকে আন্তঃৰাষ্ট্ৰীয় পৰ্যায়ত অনুষ্ঠিত হোৱা যোগ প্ৰতিযোগিতাত অংশগ্ৰহণ কৰি ব্ৰঞ্জৰ পদক অৰ্জনেৰে সন্মান লাভ কৰিছে ॥
ছাত্ৰী গৰাকীয়ে এই সন্মান লাভ কৰি বৃহত্তৰ নামতি অঞ্চলৰ লগতে শিৱসাগৰ জিলাখনলৈও কঢ়িয়াই আনিছে গৌৰৱ ॥
চতুৰ্থ শ্ৰেণীত অধ্যয়ন কৰি থকা ছাত্ৰী জ্যোতিস্মা দত্তই প্ৰায় দুবছৰ ধৰি ভাস্কৰ গগৈৰ তত্বাৱধানত প্ৰশিক্ষণ লৈ আছে ॥
কণমানি ছাত্ৰী জ্যোতিস্মা দত্তই পিতৃ-মাতৃৰ সৈতে শুক্ৰবাৰে পুৱা জন্মভূমি নামতিত উপস্থিত হোৱা লগে লগে সকলোৱে জনায় উষ্ম আদৰণি ॥
তদুপৰি কণমানি এই সফলতাত উৎসাহ যুগুৱাৰ উদ্দেশ্যে নামতি আঞ্চলিক ছাত্ৰ সন্থাই ৰাজহুৱা ভাৱে সম্বৰ্ধনা জ্ঞাপন কৰাৰ সমান্তৰালভাৱে বিভিন্ন অনুষ্ঠান প্ৰতিষ্ঠান আৰু পৰিয়ালৰ জ্যেষ্ঠ সকলে ফুলাম গামোচা আৰু ফুলৰ থোপাৰে শুভেচ্ছা জ্ঞাপন কৰে ॥
