ৰাষ্ট্ৰীয় সেউজ ন্যায়াধিকৰণৰ তথ্য অনুসৰি উত্তৰ প্ৰদেশ চৰকাৰে কাঁৱৰ যাত্ৰাৰ বাবে ১৭,৬০০ গছ কাটিছে। এন জি টিৰ দ্বাৰা গঠিত চাৰিজনীয়া পেনেলে ন্যায়াধিকৰণক জনাইছে যে কাঁৱাৰ যাত্ৰাৰ বাবে নতুন পথ নিৰ্মাণৰ উদ্দেশ্যে উত্তৰ প্ৰদেশৰ গাজিয়াবাদ, মীৰুট আৰু মুজাফ্ফৰনগৰ জিলাত প্ৰায় ১৭,৬০০ গছ কটা হৈছে।
এই প্ৰকল্পৰ বাবে ৰাজ্য চৰকাৰে মুঠ ৩৩,৭৭৬ জোপা গছ কটাৰ পৰিকল্পনা কৰা বুলিও পেনেলে অৱগত কৰে।
২০২৪ চনৰ আৰম্ভণিতে এন জি টিয়ে কাকতৰ প্ৰতিবেদনৰ প্ৰতি ছুঅ’ মত’ লোৱা লৈছিল, য’ত কোৱা হৈছিল যে উত্তৰ প্ৰদেশ চৰকাৰে এই প্ৰকল্পৰ বাবে প্ৰায় ১,১২,৭২২ গছ কাটিবলৈ পৰিকল্পনা কৰিছে।
উল্লেখ্য যে উত্তৰ প্ৰদেশ চৰকাৰে প্ৰস্তাৱ কৰা ১১১ কিলোমিটাৰ দৈৰ্ঘ্যৰ পথটো মুৰাদনগৰৰ পৰা উত্তৰাখণ্ডৰ সমীপৰ পুৰকাজীলৈকে উচ্চ গংগা খালৰ সোঁফালৰ শাখাৰে নিৰ্মাণ কৰা হ’ব। প্রস্তাৱিত কানৱাৰ পথটো গাজিয়াবাদ, মীৰুট আৰু মুজাফ্ফৰনগৰৰ মাজেৰে পাৰ হ’ব৷ ইয়াৰ বাবে ২২২.৯৮ হেক্টৰ সংৰক্ষিত বনাঞ্চলৰ ভূমি ডাইভাৰচন কৰি প্ৰায় ১,১২,৭২২ জোপা গছ কাটিব লাগিব।
দ্য হিন্দুৰ মতে, চলিত বৰ্ষৰ আগষ্ট মাহত এন জি টিয়ে এটা যৌথ পেনেল গঠন কৰিছিল, যিয়ে গছ কটাৰ অভিযোগৰ সৈতে জড়িত গোচৰটোৰ শুনানি গ্ৰহণ কৰি আছিল। এন জি টিৰ তথ্য অনুসৰি, ৬ নৱেম্বৰত চাৰিজনীয়া পেনেলে অন্তৱৰ্তীকালীন প্ৰতিবেদন দাখিল কৰিছে, য’ত কোৱা হৈছে যে জলসিঞ্চন বিভাগে দিয়া তথ্য অনুসৰি ২০২৪ চনৰ ৯ আগষ্টলৈকে তিনিখন জিলাত ১৭,৬০৭ টা গছ কটা হৈছে।
প্রতিবেদনত প্রথমে ১,১২,৭২২জোপা গছ কটাৰ অনুমতি দিয়া হৈছিল যদিও এতিয়া মাত্ৰ ৩৩,৭৭৬ জোপা গছ কটাৰ সিদ্ধান্ত লোৱা হৈছে বুলিও প্রতিবেদনত উল্লেখ কৰা হৈছে৷ উত্তৰ প্ৰদেশৰ গছ সংৰক্ষণ আইন, ১৯৭৬ৰ বিধান অনুসৰি কটাবলগীয়া গছৰ সংখ্যা হিচাপ কৰা হৈছে নে নাই সেয়া স্পষ্ট কৰিবলৈ উত্তৰ প্ৰদেশ চৰকাৰক নিৰ্দেশ দিছে এন জি টিয়ে।
এন জি টিয়ে পৰিবেশ বিভাগৰ অতিৰিক্ত মুখ্য সচিবৰ পৰা শপতনামা দাখিল কৰিবলৈও নিৰ্দেশ দিছে, য’ত কাঁৱৰ যাত্ৰা মাৰ্গ নিৰ্মাণৰ সময়ত কিমান গছৰ সংখ্যা কটাব লাগে তাৰ সঠিক বিৱৰণ দিয়া হৈছে।
এন জি টিয়ে লগতে কয় যে বিষয়টোৰ গুৰুত্বৰ প্ৰতি লক্ষ্য ৰাখি যুটীয়া সমিতিয়ে নিৰ্দেশ অনুসৰি কাম অতি সোনকালে সম্পূৰ্ণ কৰি কোনো পলম নকৰাকৈ চূড়ান্ত প্ৰতিবেদন দাখিল কৰিব বুলি আশা কৰা হৈছে।
