ভাৰতীয় ফুটবলত উত্তৰ পূব ভাৰতক প্ৰতিনিধিত্ব কৰা অন্যতম জনপ্ৰিয় ক্লাব হৈছে নৰ্থ-ইষ্ট ইউনাইটেড এফচি। বলীউডৰ প্ৰাক্তন তাৰকা জন আব্ৰাহামৰ দ্বাৰা প্ৰতিষ্ঠা কৰা এই ক্লাবটোৱে দীৰ্ঘদিন ধৰি ভাৰতীয় ফুটবলত নিজৰ স্থান সুদৃঢ় কৰাৰ বাবে অদম্য প্ৰচেষ্টা চলাই আহিছে।
আই এছ এলত বিশেষ সফলতা লাভ নকৰিলেও শেহতীয়াকৈ ডুৰাণ্ড কাপ জয় কৰি তেওঁলোকে নিজৰ সম্ভাৱনা আৰু প্ৰতিভাৰ আভাস দেখুৱাইছে। এতিয়া তেওঁলোকে অৰুণাচল প্ৰদেশৰ সৈতে বিশেষ চুক্তি কৰি যুৱ ফুটবল প্ৰতিভাসমূহ উলিয়াই অনাৰ বাবে এক নতুন দৃষ্টান্ত স্থাপন কৰিছে।
নৰ্থ ইষ্ট ইউনাইটেডে দীৰ্ঘদিন ধৰি নিজৰ অঞ্চলৰ ফুটবলাৰসকলৰ বিকাশৰ বাবে বিশেষ পদক্ষেপ গ্ৰহণ কৰি আহিছে। কিন্তু এইবাৰ এই পদক্ষেপ বৃহৎ আৰু দীৰ্ঘম্যাদী। শেহতীয়াকৈ অৰুণাচল প্ৰদেশ ফুটবল এছ’চিয়েশ্যনৰ সৈতে এক বিশেষ চুক্তি স্বাক্ষৰিত হৈছে, যাৰ লক্ষ্য হৈছে কেৱল ব্যক্তিগত ক্লাবৰ উন্নয়নেই নহয়, সমগ্ৰ অঞ্চলটোৰ ফুটবল আন্তঃগাঁথনিৰ মান উন্নত কৰা।
সোমবাৰে অৰুণাচল প্ৰদেশৰ ইটানগৰৰ গোল্ডেন জুবিলী ষ্টেডিয়ামত স্বাক্ষৰিত হয় এই চুক্তি। এই উপলক্ষে অৰুণাচল প্ৰদেশৰ মুখ্যমন্ত্ৰী তথা এপিএফএৰ সভাপতি পেমা খাণ্ডু, নৰ্থ ইষ্ট ইউনাইটেডৰ চিইঅ’ জন আব্ৰাহাম, ক্লাবৰ থিংক টেংক মন্দাৰ তাম্হানে আৰু ফুটবল বিশেষজ্ঞ কৃপা অজয় উপস্থিত থাকে।
এই পদক্ষেপৰ জৰিয়তে অৰুণাচল প্ৰদেশৰ দুৰ্গম অঞ্চলত ফুটবল প্ৰতিভাৰ সন্ধান চলোৱা হ’ব। একে সময়তে স্থানীয় পর্যায়ত ফুটবল প্রশিক্ষক, প্রশিক্ষণ শিবিৰ আৰু ঘৰুৱা প্রতিযোগিতা আয়োজন কৰি যুৱক-যুৱতীৰ বিকাশৰ পথ প্রশস্ত কৰাৰ পৰিকল্পনা কৰা হৈছে৷
এই চুক্তিৰ অধীনত ৬ৰ পৰা ১২ বছৰ আৰু ১৩ৰ পৰা ১৫ বছৰ বয়সৰ দুটা শাখাৰ ফুটবলাৰৰ বাবে সুকীয়া প্ৰশিক্ষণ ব্যৱস্থা প্ৰৱৰ্তন কৰা হ’ব। এই পদক্ষেপৰ জৰিয়তে যুৱ ফুটবলাৰসকলৰ শাৰীৰিক আৰু মানসিক বিকাশৰ বাবে বিশেষ কাৰ্যসূচী সৃষ্টি কৰা হ’ব। প্ৰতিভা বিকাশৰ বাবে প্ৰশিক্ষণ শিবিৰ আৰু প্ৰতিযোগিতামূলক প্ৰতিযোগিতাৰ আয়োজন কৰা হ’ব। ইয়াৰ দ্বাৰা নতুন প্ৰজন্মৰ ফুটবলাৰসকলে আই এছ এল আৰু ৰাষ্ট্ৰীয় পৰ্যায়ত প্ৰতিদ্বন্দ্বিতা কৰিবলৈ সাজু হ’ব পাৰিব।
যদিও অৰুণাচল প্ৰদেশ ফুটবলৰ ক্ষেত্ৰত আপেক্ষিকভাৱে পিছপৰা, তথাপিও ৰাজ্যৰ নৱপ্ৰজন্মৰ মাজত যোৱা কিছু বছৰত ফুটবলৰ প্ৰতি আগ্ৰহ বাঢ়িছে। মুখ্যমন্ত্ৰী পেমা খাণ্ডুৰ ভাষাত, “এই পদক্ষেপে কেৱল ৰাজ্যখনৰ ফুটবলৰ বিকাশেই নহয়, উত্তৰ-পূব ভাৰতৰ প্ৰতিভাৱান ফুটবলাৰসকলেও ইয়াক আন্তঃৰাষ্ট্ৰীয় পৰ্যায়লৈ লৈ যোৱাৰ পথ প্ৰশস্ত কৰিব।”
ইফালে, নৰ্থ-ইষ্ট ইউনাইটেডৰ মুৰব্বী জন আব্ৰাহামে এই চুক্তিক এক অনন্য মাইলৰ খুঁটি বুলি অভিহিত কৰে। তেওঁৰ মতে, ‘ফুটবল কেৱল খেল নহয়, ই এক সংস্কৃতি। ই অৰুণাচল প্ৰদেশৰ যুৱ প্ৰতিভাৱান ফুটবলাৰসকলৰ বাবে এক নতুন দিগন্ত মুকলি কৰিব।”
প্ৰথম পৰ্যায়ত গোল্ডেন জুবিলি ষ্টেডিয়ামত আৰম্ভ হ’ব ফুটবল প্ৰশিক্ষণ শিবিৰ। পিছত এই পদক্ষেপ নামছাই, ইউপিয়া আৰু অৰুণাচলৰ অন্যান্য অঞ্চললৈ সম্প্ৰসাৰিত কৰা হ’ব। লক্ষ্য হৈছে অৰুণাচল প্ৰদেশৰ প্ৰতিখন জিলাৰ পৰা প্ৰতিভাৱান ফুটবলাৰক বিচাৰি উলিয়াই পেছাদাৰী ফুটবলৰ জগতলৈ অনা।
এই চুক্তিয়ে যুৱ প্ৰজন্মৰ বাবে এক অভূতপূৰ্ব সুযোগ কঢ়িয়াই আনিব। প্ৰতিভাৱান ফুটবলাৰসকলক নৰ্থ ইষ্ট ইউনাইটেডৰ ফুটবল একাডেমীত প্ৰশিক্ষণৰ সুযোগ দিয়া হ’ব। কেৱল সেয়াই নহয় শ্ৰেষ্ঠ প্ৰতিভাই নৰ্থ-ইষ্ট ইউনাইটেডৰ যুৱ দলত খেলাৰ সুযোগ পাব আৰু ভৱিষ্যতে ছিনিয়ৰ দলতো খেলাৰ সুযোগ পাব।
