বৰ্তমান বিশ্বৰ আটাইতকৈ বুদ্ধিমান ব্ৰিটেইনৰ এগৰাকী শিক্ষাৰ্থী।বয়স মাত্ৰ ১০ বছৰ। এই বিস্ময় বালকৰ আইকিউ ১৬২। আইকিউ ৰেংকিঙত আইনষ্টাইন আৰু ষ্টিফেন হকিঙকো পিছ পেলাই গৈছে।
আচৰিত হৈছে? কৃশ আৰোৰাৰ বয়স দেখি আইকিউ লেভেল মিলাবলৈ গৈ বহুতে হয়তো আচৰিত হৈছে। কিন্তু বাস্তৱত তেওঁ সঁচাকৈয়ে এক বিস্ময়। আইনষ্টাইন, ষ্টিফেন হকিঙৰ আইকিউ ১৬০। কৃশৰ ১৬২। আপুনি দিয়া সকলো অংক সমাধান কৰি দিব। একাদশ বা তাৰ ওপৰৰ শ্ৰেণীৰ অংকও তেওঁৰ বাবে ভাতৰ লগত পানী খোৱাৰ নিচিনা। প্ৰাথমিক বিদ্যালয়ত পঢ়িবলৈও নিবিচাৰে।
কৃশৰ মতে প্ৰাথমিক বিদ্যালয়ত তেওঁ একো শিকিব নোৱাৰে। প্ৰতিদিনে বাক্য গঠন কৰা আৰু লিখাটো তেওঁৰ পছন্দ নহয়। এই বয়সতে ডাঙৰ ক্লাছত পঢ়িব বিচাৰে। বীজগণিত তেওঁৰ প্ৰিয়।
কেৱল যে পঢ়াশুণাতে প্ৰখৰ, সেইটো নহয়। সংগীততো কৃশ সমানেই ভাল। পশ্চিম লণ্ডনৰ বাসিন্দাগৰাকীয়ে পিয়ানোবাদক হিচাপে কেইবাটাও বঁটা লাভ কৰিছে। মাত্ৰ ছমাহতে পিয়ানো শিকাৰ চাৰিটা ঢাপ শিকি পলোৱাৰ বাবে ট্ৰিনিটি কলেজ অৱ মিউজিকৰ ‘হল অৱ ফেম’ত স্থান লাভ কৰিছে।
তেওঁ পিয়ানোত যিকোনো কঠিন গীতৰ স্বৰলিপিও কেৱল মনত ৰাখিয়েই বজায়। এই সন্দৰ্ভত বিস্ময় বালকগৰাকীয়ে কয়, ‘পিয়ানো বজাবলৈ গৈ ক’তো মই নাৰ্ভাছ নহওঁ কাৰণ মই জানো যে মোৰ সকলো মনত থাকিব। একোৱেই ভুল নহয়।’
কৃশৰ পিতৃ-মাতৃ মৌলি আৰু নিশ্চল অভিযন্তা। চাৰি বছৰ বয়সত কৃশৰ বুদ্ধিমত্তাৰ কথা পোহৰলৈ আহিছিল। তেওঁৰ মাতৃয়ে কয়, ‘চাৰি বছৰ বয়সৰ পৰাই সি বহুত ভালকৈ লিখিব পাৰে। সকলো পঢ়িব পাৰে, অংক কৰিব পাৰে। আমি তেতিয়াই বুজি পাওঁ যে সি অলপ বেলেগ। মাত্ৰ চাৰি বছৰ বয়সতে মোৰ লগত বহি গোটেই গণিতৰ কিতাপ এখন তিনি ঘণ্টাত শেষ কৰিছিল। ক্লাছ থ্ৰীত পঢ়ি থাকোঁতে গোটেই বছৰটোৰ হোমৱৰ্ক এদিনতে কৰিছিল।’
কৃশে সংগীত আৰু পঢ়াৰ মাজতে গোটেই দিনটো কটায়। অবসৰৰ সময়তো পাজল আৰু ক্ৰছৱৰ্ড সমাধান কৰে।
