এফালে নৰেন্দ্ৰ মোদীয়ে আত্মনিৰ্ভৰশীল ভাৰতত শ্ল’গান দিছে। মহাকাশলৈ ভাৰতত নিৰ্মিত মহাকাশযান প্ৰেৰণ কৰিছে ইছৰ’ই।
কিন্তু ইমানৰ পিছতো ভাৰতৰ বহুতো ঠাইত নাই উন্নত যাতায়ত ব্যৱস্থা। ভাৰতীয় গ্ৰাম্যঞ্চলৰ পথৰ দুৰাৱস্থাক পুনৰ এবাৰ প্ৰতীয়মান কৰিলে এটা ঘটনাই।
শ্ৰীহৰিকোটাৰ পৰা অলপ দূৰৈত অন্ধ্ৰ প্ৰদেশৰ বিশাখাপট্টনমৰ বোধিগাৰুভু গাঁও। তাত এম্বুলেন্স সোমাব পৰাকৈ কোনো পথ নথকাৰ বাবে এগৰাকী গৰ্ভৱতী মহিলাগৰাকীক সাঙী ভাৰ কৰি চিকিৎসালয়লৈ লৈ যায় আত্মীয়ই।
বোধিগাৰুভু এখন জনজাতীয় প্ৰধান গাঁও। বহুদিন ধৰি তাত কোনো পথ নাই বুলি অভিযোগ উত্থাপন হৈছে। গাড়ী, এম্বুলেন্স বহু দূৰৈৰে কথা। খোজ কাঢ়িবলৈ কোনো পথ নাই।
প্ৰশাসনক বাৰে বাৰে আবেদন দিয়া হৈছে যদিও গাঁওখনলৈ যোৱা পথতো নিৰ্মাণ কৰা নাই।
এনে অৱস্থাত গাঁৱৰ কোনোবা অসুস্থ হ’লে স্থানীয় লোক চিন্তিত হৈ পৰে। সোমবাৰে এগৰাকী মহিলা প্ৰসৱৰ সময়তো একেধৰণৰ পৰিস্থিতিৰ সৃষ্টি হয়।
এম্বুলেন্স আহিব নোৱাৰাৰ বাবে পাহাৰ, হাবি আৰু নদী পাৰ হৈ সাঙী ভাৰ কৰি মহিলাগৰাকীক হাস্পাতাললৈ লৈ যোৱা হয়। এই দৃশ্যই এতিয়া পুনৰবাৰ ভাৰতৰ গ্ৰাম্যাঞ্চলৰ দুৰাৱস্থাৰ কথাই সোৱৰাই দিছে।
