সংসদত ৰাহুল গান্ধীয়ে দুই বিজেপি সংসদক আঘাত কৰাৰ অভিযোগৰ ভিত্তিত দিল্লী আৰক্ষীয়ে তদন্ত আৰম্ভ কৰিছে।
ঘটনাৰ তদন্ত দিল্লী অপৰাধ শাখাৰ হাতত অৰ্পণ কৰা হৈছে। ঘটনাৰ তদন্তৰ বাবে গঠন কৰা হৈছে সাতজনীয়া তদন্তকাৰী দল। লোকসভাৰ বিৰোধী দলপতি ৰাহুল গান্ধীৰ বিৰুদ্ধে ভাৰতীয় দণ্ডবিধিৰ কেইবাটাও ধাৰাত গোচৰ ৰুজু কৰা হৈছে।
সংসদত সংবিধান নিৰ্মাতা বাবাছাহেব আম্বেদকাৰক লৈ অমিত শ্বাহে প্ৰদান কৰা বিতৰ্কিত মন্তব্যৰ পিছত মঙলবাৰে এই ঘটনাৰ আৰম্ভণি হয়।
লোকসভাৰ শীতকালীন অধিৱেশনত সংবিধান সন্দৰ্ভত এক বিতৰ্কত কেন্দ্ৰীয় গৃহমন্ত্ৰী অমিত শ্বাহে মন্তব্য কৰে যে, “এতিয়া এটা ফেশ্বন, আম্বেদকাৰ, আম্বেদকাৰ, আম্বেদকাৰ, আম্বেদকাৰ…… ইমানবাৰ প্ৰভুৰ নাম স্মৰণ কৰিলে সাতটা জন্মৰ বাবে স্বৰ্গলৈ যাব। তেওঁ আৰু কয়, ‘জৱাহৰলাল নেহৰুৰ সৈতে আম্বেদকাৰৰ বহু মতানৈক্য আছিল। সেইবাবেই তেওঁ নেহৰুৰ মন্ত্ৰীসভাৰ পৰা পদত্যাগ কৰিছিল।
এই মন্তব্যৰ পিছত বুধবাৰৰ পৰা কাৰ্যতঃ উত্তপ্ত হৈ পৰে সংসদ। কংগ্ৰেছকে ধৰি বিৰোধীয়ে অমিত শ্বাহক আম্বেদকাৰক অপমান কৰাৰ অভিযোগ উত্থাপন কৰি পদত্যাগ দাবী কৰে। বৃহস্পতিবাৰে এই প্ৰতিবাদ শাৰীৰিক সংঘৰ্ষলৈ ৰূপান্তৰিত হয়।
সংসদৰ মূল দুৱাৰ মকৰ দ্বাৰৰ সমীপত বিজেপিৰ সাংসদসকলৰ সৈতে বিৰোধীয়ে বাকযুদ্ধত লিপ্ত হয়। অভিযোগ অনুসৰি সেই সময়ত বিজেপিৰ সাংসদ প্ৰতাপ শাৰংগী আৰু মুকেশ ৰাজপুতক ৰাহুল গান্ধীয়ে শাৰীৰিকভাবে আক্ৰমণ কৰে। বৰ্তমান দুয়োজন চিকিৎসালয়ত চিকিৎসাধীন হৈ আছে।
ইয়াৰ পিছতে বিজেপিৰ সাংসদ বনছুৰী স্বৰাজ, হেমাং যোশী আৰু অনুৰাগ ঠাকুৰে ৰাহুল গান্ধীৰ বিৰুদ্ধে ষ্ট্ৰীট থানাত এজাহাৰ দাখিল কৰে। জানিব পৰা মতে ভাৰতীয় ন্যায় সংহিতাৰ ১১৭, ১১৫, ১২৫, ১৩১, ১৫১ আৰু ৩(৫) ধাৰাত ৰাহুল গান্ধীৰ বিৰুদ্ধে গোচৰ ৰুজু কৰা হয়।
শুকুৰবাৰৰ পৰা দিল্লী আৰক্ষীৰ ক্ৰাইম ব্ৰাঞ্চে এই গোচৰৰ তদন্ত আৰম্ভ কৰে। এই গোচৰৰ তদন্তৰ বাবে আৰক্ষীয়ে বিশেষ দল গঠন কৰিছে। সেই দলটোত আছে দুজন সহকাৰী আৰক্ষী আয়ুক্ত, দুজন পৰিদৰ্শক, তিনিজন উপ পৰিদৰ্শক। এই ৭ জনীয়া দলটোৱে তদন্তৰ প্ৰতিবেদন পোনপটীয়াকৈ আৰক্ষী উপ আয়ুক্তক দাখিল কৰিব।
সূত্ৰ অনুসৰি আৰক্ষীয়ে চিচিটিভি ফুটেজ পৰীক্ষা কৰিছে।
ইফালে কংগ্ৰেছেও বিজেপিৰ বিৰুদ্ধে এজাহাৰ দাখিল কৰিছে। তেওঁলোকৰ মতে, বিজেপিৰ সাংসদসকলৰ ঠেলাত কংগ্ৰেছৰ সভাপতি মল্লিকাৰ্জুন খাৰ্গে আঘাতপ্ৰাপ্ত হয়। দিল্লী আৰক্ষীৰ অপৰাধ শাখাই জনাইছে যে কংগ্ৰেছৰ এই অভিযোগৰো তদন্ত কৰা হ’ব।
