নাগৰিকত্ব সংশোধনী বিধেয়ক, ২০১৬ বাতিল কৰাৰ দাবীত হাতীঘুলি আঞ্চলিক ছাত্ৰ সন্থাৰ আহ্বানত তথা হাতীঘুলি অঞ্চলৰ বিভিন্ন দল-সংগঠনৰ সহযোগত আজি শিলপুখুৰী উচ্চ মাধ্যমিক বিদ্যালয় প্ৰাঙ্গণৰ পৰা এক প্ৰতিবাদী সমদল বাহিৰ কৰা হয়।
নাগৰিকত্ব সংশোধনী বিধেয়কৰ বিৰোধিতা কৰি আজি দিনৰ ১১:৩০ বজাত শিলপুখুৰী উচ্চ মাধ্যমিক বিদ্যালয় প্ৰাঙ্গণৰ পৰা খনামুখ- হাতীঘুলি পথেৰে আহি পুনৰ শিলপুখুৰী উচ্চ মাধ্যমিক বিদ্যালয়ত সামৰণি পৰা উক্ত সমদলটোত অঞ্চলটোৰ শতাধিক ৰাইজ আৰু বিভিন্ন বিদ্যালয়ৰ ছাত্ৰ-ছাত্ৰীয়ে অংশগ্ৰহণ কৰে।
প্ৰতিবাদকাৰী সকলে ‘নৰেন্দ্ৰ মোদী হায় হায়’, ‘কেন্দ্ৰীয় চৰকাৰ হায় হায়’, ‘জাতি ধবংসী নাগৰিক সংশোধনী বিধেয়ক, ২০১৬ বাতিল কৰক’, ‘অসম চৰকাৰ হায় হায়’, ‘জাতীয় নায়ক সবৰ্বানন্দ সোণোৱাল হায় হায়’, ‘অবৈধ বাংলাদেশী বহিস্কৰণৰ বাবে ভাৰত-বাংলাদেশৰ মাজত দ্বিপাক্ষিক চুক্তি সম্পাদন কৰক’, ‘খিলঞ্জীয়া মানুহক সাংবিধানিক ৰক্ষা কৱচ প্ৰদান কৰক’ আদি বিভিন্ন শ্লোগানেৰে আকাশ- বতাহ মুখৰিত কৰি তোলে।
হাতীঘুলি আঞ্চলিক ছাত্ৰ সন্থাৰ সম্পাদক জীৱনজ্যোতি চুতীয়াই আঁত ধৰা অনুস্থানটোত খনামুখ আঞ্চলিক কৰ্মচাৰী পৰিষদৰ সভাপতি তথা খনামুখ বালিকা উচ্চ মাধ্যমিক বিদ্যালয়ৰ প্ৰধান শিক্ষক ৰবীন হাজৰিকা, হাতীঘুলি নাগৰিক মঞ্চৰ সভাপতি কুলধৰ বৰা হাতীঘুলী গাঁও পঞ্চায়তৰ সভাপতি প্ৰফুল্ল গগৈ, অঞ্চলটোৰ বয়োজ্যেষ্ঠ নাগৰিক চেনীৰাম নাথ, ডিম্বেশ্বৰ বড়া, ধনীৰাম দত্ত, ৰঞ্জিত আৰন্ধৰা, হিমেন নাথ, আপকুৰ জিলা সমিতিৰ সভাপতি পদুম কুমাৰ শইকীয়া, কেন্দ্ৰীয় সমিতিৰ সদস্য নয়নমণি বৰুৱা, গৌৰীসাগৰ প্ৰেছ ক্লাবৰ সম্পাদক ৰাজীৱ দত্ত, নৱজ্যোতি ওজা, হাতীঘুলি আঞ্চলিক ছাত্ৰ সন্থাৰ প্ৰাক্তন নেতা পুলিন নেওগ, জ্যোতিপ্ৰসাদ নাথ, নীলমণি গগৈ, ভাৰপ্ৰাপ্ত সাধাৰণ সম্পাদক জীৱনজ্যোতি চুতীয়া, শিৱসাগৰ জিলা ছাত্ৰ সন্থাৰ সাংগঠনিক সম্পাদক দেবব্ৰত দাস, হাতীঘুলি আঞ্চলিক ছাত্ৰ সন্থাৰ উপদেষ্টা গোবিন ফুকন, ভাস্কৰ নাথ, মানস প্ৰতীম নাথ আদি কৰি বহুতো গণ্য মান্য ব্যক্তি উপস্থিত থাকি নাগৰিক সংশোধনী বিধেয়ক খনৰ বিৰোধিতা কৰি বক্তব্য প্ৰদান কৰে।
