উত্তৰ প্ৰদেশৰ পিলিভিটত এনকাউণ্টাৰত নিহত হৈছে ৩ খালিস্তানী উগ্ৰপন্থী। জানিব পৰা মতে, পঞ্জাৱৰ গুৰদাসপুৰত তেওঁলোকৰ বিৰুদ্ধে আৰক্ষীক আক্ৰমণ কৰাৰ অভিযোগ উত্থাপন হৈছিল। ইয়াৰ পিছতে উত্তৰ প্ৰদেশ আৰক্ষী আৰু পঞ্জাৱ আৰক্ষীয়ে যৌথ অভিযান আৰম্ভ কৰে।
সোমবাৰে পুৱা পিলিভিটত ৩জন উগ্ৰপন্থীৰ সৈতে আৰক্ষীৰ সংঘৰ্ষ হয়। ইয়াৰ পিছতে আৰক্ষীৰ এনকাউণ্টাৰত উগ্ৰপন্থী ৩জন নিহত হয়।
জানিব পৰা মতে, মৃত উগ্ৰপন্থীকেইজনৰ নাম গুৰৱিন্দৰ সিং, জছনপ্ৰীত সিং আৰু বীৰেন্দ্ৰ সিং। আটাইকেইজনেই খালিস্তান সমৰ্থক নিষিদ্ধ সংগঠন খালিস্তান কমাণ্ডো ফৰ্চৰ সদস্য বুলি জনা গৈছে।
মৃত উগ্ৰপন্থীকেইজনৰ পৰা আৰক্ষীয়ে উদ্ধাৰ কৰে AK 47 ৰাইফল, দুটা পিষ্টল, কেই ৰাউণ্ডমান গুলী। উত্তৰ প্ৰদেশ আৰু পঞ্জাৱ আৰক্ষীৰ যৌথ অভিযানত এই তিনি উগ্ৰপন্থীৰ নিহত হোৱাৰ পিছত অঞ্চলটোত কটকটীয়া নিৰাপত্তা বেহু গঢ়ু তোলা হৈছে।
বাতৰি অনুসৰি, পঞ্জাৱ আৰক্ষীয়ে গোপন সূত্ৰৰ পৰা তথ্য লাভ কৰিছিল যে ৩ খালিস্তানী উগ্ৰপন্থীয়ে উত্তৰ প্ৰদেশৰ পিলিভিটত আশ্ৰয় লৈছে। সেই তথ্য পাই তেওঁলোকে উত্তৰ প্ৰদেশ আৰক্ষীক খবৰ দিয়ে। উত্তৰ প্ৰদেশৰ পুৰানপুৰ আৰক্ষী থানাই এই উগ্ৰপন্থীৰ উপস্থিতিৰ তথ্য লাভ কৰে। এই থানাৰ অঞ্চলত উগ্ৰপন্থীয়ে বিচৰণ কৰি থকা বুলি খবৰ পোৱা গৈছিল।
পুৰাণপুৰত সেই ৩ জন লোকে কিছু সন্দেহজনক বস্তু লৈ ঘূৰি ফুৰাৰ তথ্যও আৰক্ষীয়ে লাভ কৰে। ইফালে এই খবৰ পোৱাৰ লগে লগে আৰক্ষীয়ে ৩ অভিযুক্তক পৃথক কৰি পেলায়। সোমবাৰে পুৱা দুয়োপক্ষৰ মাজত গুলীয়াগুলি হয়। তেতিয়াই ৩ জন উগ্ৰপন্থী আৰক্ষীৰ গুলীত নিহত হয়।
পিলিভিট আৰক্ষীয়ে জনোৱা মতে, অভিযুক্তই আৰক্ষীৰ দলটোক প্ৰত্যাহ্বান জনাই গুলীচালনা কৰে আৰু প্ৰত্যুত্তৰত গুলীচালনাত তেওঁলোক নিহত হয়। পঞ্জাৱ আৰক্ষী আৰু উত্তৰ প্ৰদেশ আৰক্ষীৰ এটা দলে যৌথ অভিযান চলাইছিল। পঞ্জাৱ আৰক্ষীৰ দলটোৱে তেওঁলোকৰ (অভিযুক্তৰ) বিদেশী সংযোগৰ কথাও উল্লেখ কৰে। সমগ্ৰ ঘটনাৰ তদন্ত আৰম্ভ হৈছে।
ইয়াৰ পূৰ্বে শুকুৰবাৰে পঞ্জাৱৰ গুৰদাসপুৰ জিলাৰ কালানৌৰ মহকুমাৰ এটা পৰিত্যক্ত আৰক্ষী চকীত বিস্ফোৰণ সংঘটিত হোৱা বুলি জানিব পৰা গৈছে। আৰক্ষীৰ সতৰ্কতা বৃদ্ধিৰ মাজতে সংঘটিত এই আক্ৰমণৰ ফলত কোনো লোকৰ প্ৰাণ বা সা-সম্পত্তিৰ ক্ষতি হোৱা নাই। তাৰপিছতে এই ৩ খালিস্তানী উগ্ৰপন্থীৰ এনকাউণ্টাৰৰ খবৰ আহিল।
