গাজাত নিশা ইজৰাইলৰ বিমান আক্ৰমণত ৫জন সাংবাদিক নিহত হয়। আল-কুদছ টুডে টেলিভিছনৰ বাহনখন আল-আউদা হাস্পতালৰ বাহিৰত ৰখাই থোৱা আছিল। আল-কুদছ টুডে টেলিভিছন পেলেষ্টাইন ইছলামিক জেহাদ উগ্ৰপন্থী সংগঠনৰ সৈতে জড়িত। বিমান আক্ৰমণৰ সময়ত বাহনখনত শুই থকা আইমান আল জাদি, ফৈছাল আবু আল কুমছান, মহম্মদ আল লাদা’আ, ইব্ৰাহিম আল শ্বেখ আলী, ফাদি হাছৌনা নামৰ যুৱক কেইজনে বাহনখনত শুই আছিল। সেই সময়ত সাংবাদিকসকলে নিজৰ কৰ্তব্য পালন কৰি থকা বুলি উল্লেখ কৰি ঘটনাস্থলীত উপস্থিত থকা সাংবাদিকসকলে এই ঘটনাৰ খবৰ দিয়ে আৰু এই আক্ৰমণক গৰিহণা দিয়ে।
ইয়াৰ পাছৰ ফুটেজত দেখা গৈছে যে বাহনখন জুইত জ্বলি উঠিছে আৰু পিছফালৰ দুৱাৰত “টিভি” আৰু “প্ৰেছ” শব্দ দেখা গৈছিল। আল-কুদছ টুডে টেলিভিছনে এই কাৰ্যক গৰিহণা দি কয় যে সাংবাদিকসকলক সাংবাদিক আৰু মানৱীয় ভূমিকা পালন কৰি থকাৰ সময়তে হত্যা কৰা হৈছে। ইজৰাইলৰ সেনাই নিশ্চিত কৰে যে তেওঁলোকে এই বিমান আক্ৰমণ চলাইছিল আৰু দাবী কৰিছে যে ইয়াৰ দ্বাৰা নুচেইৰাট অঞ্চলৰ এটা “ইছলামিক জেহাদৰ সন্ত্ৰাসবাদী কোষ”ক লক্ষ্য কৰি লোৱা হৈছে। অৱশ্যে সামৰিক বাহিনীয়ে নিজৰ অভিযোগৰ সমৰ্থনত কোনো প্ৰমাণ দাঙি ধৰা নাই।
কমিটী টু প্ৰটেক্ট জাৰ্নেলিষ্ট (চিপিজে)ৰ বাতৰি অনুসৰি, ২০২৩ চনৰ ৭ অক্টোবৰৰ পৰা কমেও ১৪১ জন সাংবাদিক আৰু সংবাদ মাধ্যমৰ কৰ্মীক হত্যা কৰা হৈছে, যিটো ১৯৯২ চনত চিপিজে এনে কাণ্ডৰ সন্ধান আৰম্ভ কৰাৰ পাছত সাংবাদিকৰ বাবে আটাইতকৈ মাৰাত্মক সময়।
চলিত মাহৰ আৰম্ভণিতে গাজাত ইজৰাইলৰ আন এক বিমান আক্ৰমণত আল জাজিৰাৰ ফটো সাংবাদিক আহমদ আল-লৌহৰ লগতে আন চাৰিজন লোকৰ মৃত্যু হৈছিল। গাজাৰ নুচেইৰাট কেম্পৰ অসামৰিক প্ৰতিৰক্ষা কাৰ্যালয়ক লক্ষ্য কৰি এই আক্ৰমণৰ লক্ষ্য লৈছিল, য’ত আল-লৌহে উদ্ধাৰ অভিযানৰ বাতৰি পৰিৱেশন কৰি আহিছিল। আল জাজিৰাই এই আক্ৰমণক নৃশংস হত্যা বুলি গৰিহণা দিয়ে। ইজৰাইলৰ সেনাই অসামৰিক প্ৰতিৰক্ষা কাৰ্যালয়সমূহক লক্ষ্য কৰি লোৱাটো নিশ্চিত কৰি এই স্থানক হামাছে “কমাণ্ড-এণ্ড-কণ্ট্ৰল চেণ্টাৰ” হিচাপে ব্যৱহাৰ কৰা বুলি দাবী কৰে আৰু আল-লৌহৰ ইছলামিক জেহাদৰ সৈতে সম্পৰ্ক থকাৰ অভিযোগ উত্থাপন কৰে যদিও এই দাবীৰ কোনো প্ৰমাণ দিয়া হোৱা নাই।
