বিয়াৰ পিছত পত্নীয়ে স্বামীৰ লগত থাকিবলৈ অস্বীকাৰ কৰিলেও ভৰণ-পোষণৰ অধিকাৰী হ’ব পাৰে। ৰক্ষণাবেক্ষণৰ বাবে উপযুক্ত আৰু যুক্তিসংগত ভিত্তি থকাটোহে প্ৰয়োজনীয়, সহবাসৰ নহয়। এক গোচৰৰ শুনানিৰ সময়ত এই নিৰ্দেশ দিছে দেশৰ উচ্চতম ন্যায়ালয়ে।
এক নতুন গোচৰত উচ্চতম ন্যায়ালয়ে ঝাৰখণ্ড উচ্চ ন্যায়ালয়ৰ ৰায় বাতিল কৰি পৰিয়াল আদালতৰ নিৰ্দেশ পুনৰ প্ৰৱৰ্তন কৰি এই নিৰ্দেশ জাৰি কৰে।
এই গোচৰত আদালতে স্বামীগৰাকীক প্ৰতিমাহে ১০ হাজাৰ টকাৰ ভৰণ-পোষণ পত্নীক দিবলৈ নিৰ্দেশ দিছে।
জানিব পৰা মতে, ২০১৪ চনৰ ১ মে’ত এহাল দম্পতীৰ বিবাহ হৈছিল যদিও ২০১৫ চনৰ আগষ্ট মাহত তেওঁলোকৰ সম্পৰ্ক বিচ্ছিন্ন হয়। স্বামীয়ে দাবী কৰা মতে, ২০১৫ চনৰ ২১ আগষ্টত পত্নীয়ে ঘৰৰ পৰা ওলাই আহি অকলে থাকিবলৈ লয়।
ইফালে স্বামীয়ে পৰিয়াল আদালতত আৱেদন কৰি একেলগে থাকিবলৈ অনুৰোধ জনায়। পত্নীয়ে আদালতত কয় যে তেওঁক মানসিকভাৱে অত্যাচাৰ কৰা হৈছে আৰু তেওঁৰ পৰা ৫ লাখ টকা দাবী কৰা হৈছে।
লগতে অভিযোগ কৰে যে তেওঁৰ স্বামীৰ বিবাহ বহিৰ্ভূত প্ৰেম আছিল আৰু ২০১৫ চনত তেওঁৰ গৰ্ভপাত হোৱাৰ পিছতো স্বামী তেওঁৰ ওচৰলৈ যোৱা নাছিল।
পত্নীয়ে কয় যে তেওঁ স্বামীৰ ঘৰলৈ উভতি যাবলৈ ইচ্ছুক, কিন্তু চৰ্তৰে। তেওঁক ঘৰৰ শৌচাগাৰ ব্যৱহাৰ কৰিবলৈ দিব লাগিব আৰু খাদ্য ৰন্ধা-বঢ়াৰ বাবে কাঠৰ চৌকা বা কয়লাৰ চৌকাৰ সলনি গেছ ব্যৱহাৰ কৰিবলৈ দিব লাগিব।
উল্লেখ্য যে ২০২২ চনৰ ২৩ মাৰ্চত পৰিয়াল আদালতে দুয়োকে একেলগে থাকিবলৈ নিৰ্দেশ দিছিল যদিও পত্নীয়ে সেই নিৰ্দেশ পালন নকৰিলে। তাৰ পৰিৱৰ্তে তেওঁ ঝাৰখণ্ড উচ্চ ন্যায়ালয়ত ৰক্ষণাবেক্ষণৰ বাবে আবেদন জনায়।
উচ্চ ন্যায়ালয়ে ৰায় দিয়ে যে যিহেতু পত্নীয়ে সহবাসৰ আদেশ মানি চলা নাই আৰু আদেশৰ বিৰুদ্ধে আপীল কৰা নাই, সেয়েহে তেওঁ ভৰণ-পোষণৰ অধিকাৰী নহয়।
ইয়াৰ পিছত এই ৰায়ৰ বিৰুদ্ধে পত্নীৰ আবেদন মানি ল’লে উচ্চতম ন্যায়ালয়ে। তাত মুখ্য ন্যায়াধীশ সঞ্জীৱ খান্না আৰু ন্যায়াধীশ সঞ্জয় কুমাৰৰ বিচাৰপীঠে শেহতীয়াকৈ কয় যে ৰক্ষণাবেক্ষণ সন্দৰ্ভত সিদ্ধান্ত গোচৰৰ নিৰ্দিষ্ট পৰিস্থিতিৰ ওপৰত নিৰ্ভৰ কৰিব। একেলগে থকা বা নথকাৰ ওপৰত নহয়।
উচ্চতম ন্যায়ালয়ে কয়, ‘ইয়াৰ ক্ষেত্ৰত কোনো চূড়ান্ত নিয়ম প্ৰযোজ্য নহয়, প্ৰতিটো গোচৰৰ পৰিস্থিতি বেলেগ বেলেগ আৰু সেই অনুসৰি বিচাৰ কৰিব লাগিব।’
আদালতে এইটোও ৰায় দিয়ে যে সহবাস আৰু আদেশৰ অমান্যতাই পত্নীক ভৰণ-পোষণৰ অধিকাৰৰ পৰা বঞ্চিত কৰিব নোৱাৰে।
