মহাকুম্ভত স্নান কৰিবলৈ গৈছিল। কিন্তু কোনে জানিছিল যে পবিত্ৰ স্নান কৰিবলৈ গৈ ইমান ডাঙৰ অঘটন ঘটিব? স্নান কৰিবলৈ পানীত নমাৰ সময়তে হৃদৰোগত আক্ৰান্ত হৈ মৃত্যু ঘটে এন চি পিৰ নেতা মহেশ কোঠেৰ। মৃত্যুৰ সময়ত তেওঁৰ বয়স আছিল ৬০ বছৰ।
জানিব পৰা মতে, শৰদ পাৱাৰৰ শিবিৰৰ নেতা তথা সোলাপুৰৰ প্ৰাক্তন মেয়ৰ মহেশ কোঠে মঙলবাৰে প্ৰয়াগৰাজৰ ত্ৰিবেনী সংগমত পবিত্ৰ পূণ্যস্নান কৰিবলৈ গৈছিল। পানীত নমাৰ লগে লগে তেওঁৰ হাৰ্ট এটেক ঘটে।
তাৰ পিছত বুকুখন খামুচি ধৰি যন্ত্ৰণাত ছটফটাবলৈ ধৰে। এনচিপি নেতাজনক খৰধৰকৈ পানীৰ পৰা তুলি আনি মেডিকেল কেম্পলৈ লৈ যোৱা হয় যদিও কোনো লাভ নহ’ল। অলপ সময়ৰ ভিতৰতে চিকিৎসকসকলে তেওঁক মৃত বুলি ঘোষণা কৰে। মাত্ৰ ৬০ বছৰ বয়সতে প্ৰাণ গ’ল এন চি পি নেতাজনৰ।
সূত্ৰ অনুসৰি, মহেশ কোঠেই মঙলবাৰে পুৱা প্ৰায় ৭:৩০ বজাত ত্ৰিবেনী সংগমত পবিত্ৰ স্নান কৰিবলৈ গৈছিল। ইফালে এন চি পিৰ মুৰব্বী শাৰদ পাৱাৰে দলৰ নেতাজনৰ মৃত্যুত শোক প্ৰকাশ কৰিছে। তেওঁ পৰিয়াল আৰু আত্মীয়ৰ কাষত থাকিব বুলি আশ্বাস দিছে।
সোলাপুৰৰ প্ৰাক্তন মেয়ৰৰ সহায়কে জানিবলৈ দিয়ে যে মহেশ কোঠে মকৰ সংক্ৰান্তি উপলক্ষে প্ৰয়াগৰাজলৈ আহিছিল। উদ্দেশ্য আছিল ১৪৪ বছৰৰ পাছত বিশেষ দিনত অমৃত স্নান কৰা। তেওঁ পুণ্য লাভৰ আশাত পানীতো নামিছিল। তেতিয়াই অঘটনটো ঘটে।
জানিব পৰা মতে, আজি (বুধবাৰে) প্ৰয়াগৰাজৰ পৰা এন চি পি নেতাজনৰ মৃতদেহ সোলাপুৰলৈ অনা হ’ব। বিয়লিৰ ভিতৰত শেষকৃত্য সম্পন্ন হোৱাৰ কথা। মৃত্যুৰ সময়ত তেওঁ পত্নী আৰু পুত্ৰক এৰি থৈ গৈছে। কিন্তু দলৰ নেতাগৰাকীৰ এইদৰে হঠাৎ বিদায় যেন মানি ল’ব পৰা নাই এন চি পিৰ নেতাসকলে।
