আমেৰিকাৰ ৰাজধানী ৱাশ্বিংটন ডি চিত বিমান দুৰ্ঘটনাক লৈ চৰ্চা অব্যাহত থকাৰ সময়তে দেশখনত আন এক বিমান দুৰ্ঘটনা সংঘটিত হৈছে। খবৰ অনুসৰি আমেৰিকাৰ ফিলাডেলফিয়াত এখন সৰু বিমান দুৰ্ঘটনাগ্ৰস্ত হৈ অগ্নিকাণ্ড সংঘটিত হয়। কমেও দুজন যাত্ৰী থকা বিমানখন শ্বপিং মলৰ সমীপত দুৰ্ঘটনাগ্ৰস্ত হয়।
এই দুৰ্ঘটনাত কেইবাজনো লোক আহত হ’ব পাৰে বুলি সংবাদ সংস্থা ৰয়টাৰে প্ৰকাশ কৰিছে। ইফালে, ফিলাডেলফিয়া অফিচ অৱ ইমাৰ্জেন্সি মেনেজমেণ্টে ছ’চিয়েল মিডিয়াত নিশ্চিত কৰিছে যে দুৰ্ঘটনাস্থলীত এটা “বৃহৎ কাণ্ড” সংঘটিত হৈছে যদিও ইয়াৰ বিষয়ে অধিক সবিশেষ প্ৰকাশ কৰা নাই।
বিমান দুৰ্ঘটনাৰ সন্দৰ্ভত চহৰখনৰ জৰুৰীকালীন ব্যৱস্থাপনা কাৰ্যালয়ে এক্সত লিখিছে, “উত্তৰ-পূব ফিলাডেলফিয়াৰ কটমেন আৰু বাষ্টলেটন এভিনিউৰ ওচৰত, ৰুজভেল্ট মলৰ বিপৰীতে এটা ডাঙৰ কাণ্ড সংঘটিত হৈছে। ৰুজভেল্ট বলিভাৰ্ডৰ কিছু অংশকে ধৰি অঞ্চলটোৰ পথসমূহ বন্ধ কৰি দিয়া হয়। সদ্যহতে সেই অঞ্চলটো এৰাই চলিব।”
ইফালে ছ’চিয়েল মিডিয়াত প্ৰচাৰিত এক ভিডিঅ’ত দেখা গৈছে যে বিমানখন লানি লানিকৈ থকা ঘৰৰ সমীপত দুৰ্ঘটনাগ্ৰস্ত হয়। ঘটনাস্থলীত কেইবাজনো অগ্নিনিৰ্বাপক বাহিনী আৰু জৰুৰীকালীন বিভাগৰ কৰ্মী আছে।
বিমানৰ তথ্য অনুসৰি স্থানীয় বিমানবন্দৰৰ পৰা ৬:০৬ বজাত এখন সৰু বিমান উৰা মাৰিছিল আৰু প্ৰায় ৩০ ছেকেণ্ডৰ পিছত ৰাডাৰৰ পৰা নোহোৱা হৈ ১৬০০ ফুট উচ্চতালৈ উঠিছিল। নৰ্থ-ইষ্ট ফিলাডেলফিয়া বিমানবন্দৰৰ পৰা প্ৰায় ৪.৮ কিলোমিটাৰ দূৰত্বত দুৰ্ঘটনাস্থলীটো অৱস্থিত।
স্থানীয় এজন বাসিন্দাই এ পি নিউজ এজেন্সীক এই দুৰ্ঘটনা সন্দৰ্ভত জনাইছে যে ‘এটা প্ৰচণ্ড শব্দ শুনি তেওঁৰ ঘৰ কঁপি উঠিল। ডাঙৰ বিস্ফোৰণ হৈছিল, গতিকে এক চেকেণ্ডৰ বাবে মই ভাবিছিলো যে আক্ৰমণ হৈছে।’
কিছুদিন পূৰ্বে ৱাশ্বিংটন ডি চিৰ সমীপৰ ৰ’নাল্ড ৰেগান ৰাষ্ট্ৰীয় বিমানবন্দৰৰ সমীপত এখন সামৰিক হেলিকপ্টাৰ যাত্ৰীবাহী বিমানৰ সৈতে সংঘৰ্ষত লিপ্ত হয়। তাক লৈ আমেৰিকাত তোলপাৰ লাগিছে। সেই দুৰ্ঘটনাত বিমানখনত থকা ৬৪ জন যাত্ৰীয়ে প্ৰাণ হেৰুৱাইছিল। মাজ আকাশত হেলিকপ্টাৰৰ সৈতে খুন্দা মৰাৰ ফলত দুৰ্ঘটনাগ্ৰস্ত বিমানখন নদীত পৰে। ইফালে সামৰিক হেলিকপ্টাৰখনত থকা তিনিজন লোকৰো মৃত্যু হয়।
এই দুৰ্ঘটনাক লৈ বৰ্তমান ৰাষ্ট্ৰপতি ড’নাল্ড ট্ৰাম্পে পূৰ্বৰ বাইডেন আৰু ওবামা প্ৰশাসনৰ নীতিক দোষাৰোপ কৰি আক্ৰমণ চলাইছে। ইফালে, কেনেদৰে এখন হেলিকপ্টাৰ আৰু এখন বিমান আকাশত একে উচ্চতাত থাকিল আৰু কিয় এই দুৰ্ঘটনা সংঘটিত হ’ল, সেই বিষয়ে বিতং তদন্ত আৰম্ভ কৰা হৈছে।
