চিকিৎসা মহাবিদ্যালয়সমূহত চিকিৎসা বিজ্ঞানৰ ছাত্ৰ-ছাত্ৰীৰ বাবে অধিক আসন বৃদ্ধি কৰা হ’ব। অহা বছৰৰ ভিতৰত দেশজুৰি চিকিৎসা মহাবিদ্যালয়সমূহত ১০ হাজাৰ আসন সংযোজন কৰা হ’ব। শনিবাৰে বাজেট ভাষণত এই কথা ঘোষণা কৰে কেন্দ্ৰীয় বিত্তমন্ত্ৰী নিৰ্মলা সীতাৰমণে। আগন্তুক পাঁচ বছৰত চিকিৎসাৰ আসন ৭৫ হাজাৰ বৃদ্ধিৰ লক্ষ্য নিৰ্ধাৰণ কৰিছে কেন্দ্ৰই। লগতে দেশৰ প্ৰতিখন জিলাতে কৰ্কট ৰোগীৰ চিকিৎসা কেন্দ্ৰ মুকলি কৰা হ’ব বুলিও তেওঁ কয়। বাজেট দাখিলৰ সময়ত নিৰ্মলাই কয় যে অহা তিনি বছৰত ২০০ টা ‘ডে কেয়াৰ কেন্সাৰ চেণ্টাৰ’ নিৰ্মাণ কৰা হ’ব।
দেশবাসীয়ে এইবাৰৰ কেন্দ্ৰীয় বাজেটত ঔষধৰ দাম হ্রাস হ’ব নে নহয় সেই সন্দর্ভতো তীক্ষ্ণ দৃষ্টি ৰাখিছিল৷ নিৰ্মলাৰ বাজেটে কিছু পৰিমাণে হ’লেও মধ্যবিত্ত আৰু নিম্ন মধ্যবিত্ত শ্ৰেণীৰ আকাংক্ষা পূৰণৰ পথ দেখুৱাইছিল। কেন্সাৰকে ধৰি দীৰ্ঘদিনীয়া ৰোগত ব্যৱহাৰ কৰা ৩৬টা জীৱন ৰক্ষাকাৰী ঔষধৰ ওপৰত কৰ ৰেহাই দিয়াৰ সিদ্ধান্ত কেন্দ্ৰই। তদুপৰি ৬টা জীৱন ৰক্ষাকাৰী ঔষধৰ কৰ ৫ শতাংশলৈ হ্ৰাস কৰাৰ সিদ্ধান্ত লোৱা হৈছে। নিৰ্মলা সীতাৰমণে কয় যে কেন্দ্ৰই কৰ্কট ৰোগীৰ উদ্বেগক মনত ৰাখি এই সিদ্ধান্ত গ্ৰহণ কৰিছে।
উল্লেখ্য যে, বিগত তিনি বছৰত চিকিৎসা মহাবিদ্যালয়ৰ আসনৰ সংখ্যা ১ লাখৰো অধিক বৃদ্ধি কৰিছে কেন্দ্ৰই। অহা বছৰ আৰু ১৩০ শতাংশ বৃদ্ধি কৰি ১০ হাজাৰ আসন সংযোজন কৰাৰ পৰিকল্পনা কৰা হৈছে। ইয়াৰ উপৰিও কেন্দ্ৰীয় বিত্তমন্ত্ৰী নিৰ্মলা সীতাৰমণে কয় যে বিভিন্ন ক্ষেত্ৰত ঠিকাভিত্তিক শ্ৰমিককো ‘প্ৰধানমন্ত্ৰী জন আৰোগ্য যোজনা’ৰ অধীনলৈ অনা হ’ব। সীতাৰমণৰ মতে ইয়াৰ দ্বাৰা দেশৰ প্ৰায় এক কোটি ঠিকাভিত্তিক শ্ৰমিক উপকৃত হ’ব।
শনিবাৰে পুৱা ১১ বজাৰ পৰা সংসদত বাজেট ভাষণ আৰম্ভ কৰে নিৰ্মলাই। সংসদলৈ যোৱাৰ আগতে ৰাতিপুৱা ৰাষ্ট্ৰপতি দ্ৰৌপদী মুৰ্মুক সাক্ষাৎ কৰিবলৈ গৈছিল। বাজেট দাখিল কৰাৰ সময়ত সীতাৰমণে কয় যে আমাৰ সকলোৰে লক্ষ্য উন্নয়ন। এইবাৰৰ বাজেটত মধ্যবিত্ত শ্ৰেণীৰ ওপৰত অধিক গুৰুত্ব দিয়া হৈছে বুলিও উল্লেখ কৰে কেন্দ্ৰীয় বিত্তমন্ত্ৰীগৰাকীয়ে।
