দ্বিতীয়বাৰৰ বাবে আমেৰিকাৰ ৰাষ্ট্ৰপতি পদলৈ ঘূৰি অহাৰ পিছৰে পৰা ড’নাল্ড ট্ৰাম্পে ‘অবৈধ অনুপ্ৰৱেশকাৰী’ আৰু অনুপ্ৰৱেশৰ দৰে বিষয়ত কঠোৰ স্থিতি গ্ৰহণ কৰিছে। এই পৰিস্থিতিত ট্ৰাম্প প্ৰশাসনে কিছুদিন পূৰ্বে কলম্বিয়াকে ধৰি কেইবাখনো দেশলৈ ‘অবৈধ অনুপ্ৰৱেশকাৰী’ক ঘূৰাই দিছিল। এইবাৰ সামৰিক বিমানেৰে ভাৰতীয়ক ঘৰলৈ পঠিয়াইছে ট্ৰাম্পে।
ভাৰতীয় অবৈধ অনুপ্ৰৱেশকাৰীক আমেৰিকাই প্ৰথমবাৰৰ বাবে এনেদৰে ‘বিতাড়ন’ কৰিছে। ইয়াৰ পূৰ্বে ট্ৰাম্প প্ৰশাসনে গুৱেটামালা, পেৰু, হণ্ডুৰাছৰ দৰে দেশলৈ সামৰিক বিমানেৰে অবৈধ অনুপ্ৰৱেশকাৰীক ঘূৰাই পঠিয়াইছিল।
ইফালে, শেহতীয়াকৈ হোৱাইট হাউছে সামৰিক বিমানেৰে উভতাই পঠোৱা অবৈধ অনুপ্ৰৱেশকাৰীৰ কেইবাখনো ফটো প্ৰকাশ কৰিছে। ইয়াত মানুহক শাৰী পাতি বিমানত উঠাই দিয়া দেখা গৈছিল। সকলোৰে কঁকালত শিকলি বান্ধি থোৱা আছে। যাক লৈ সমালোচনাৰ জোৱাৰ উঠিছিল।
বাতৰি অনুসৰি, ট্ৰাম্পে ইয়াৰ পূৰ্বে আমেৰিকাত ভাৰতীয় অবৈধ অনুপ্ৰৱেশকাৰীক লৈ উদ্বেগ প্ৰকাশ কৰি প্ৰধানমন্ত্ৰী নৰেন্দ্ৰ মোডীৰ সৈতে কথা পাতিছিল। এই সন্দৰ্ভত আমেৰিকাৰ ৰাষ্ট্ৰপতিয়ে কৈছিল, ‘ভাৰতে সঠিক কাম কৰিব’।
ইফালে, আমেৰিকাৰ বিদেশ মন্ত্ৰী মাৰ্কো ৰুবিঅ’ইও এই সন্দৰ্ভত ভাৰতৰ বৈদেশিক মন্ত্ৰী এছ জয়শংকৰৰ সৈতে বাৰ্তালাপ কৰে। এই প্ৰসংগত বৈদেশিক পৰিক্ৰমা মন্ত্ৰালয়ে উল্লেখ কৰিছিল যে আমেৰিকাত অবৈধভাৱে বাস কৰা কোনো ভাৰতীয় নাগৰিকক ঘূৰাই লোৱাত ভাৰতৰ কোনো আপত্তি নাই।
শেহতীয়াকৈ আমেৰিকাৰ ইমিগ্ৰেচন এণ্ড কাষ্টমছ এনফৰ্চমেণ্টে নিউয়ৰ্ক আৰু নিউ জাৰ্চিৰ একাধিক গুৰদ্বাৰত অভিযান চলাইছিল। আমেৰিকাত অবৈধভাৱে বসবাস কৰা শিখসকলক চিনাক্ত কৰিবলৈ এই অভিযান চলোৱা হৈছিল।
উল্লেখ্য যে পূৰ্বে নিয়ম আছিল যে অবৈধ অনুপ্ৰৱেশকাৰীক গ্ৰেপ্তাৰ কৰিবলৈ কোনো ধৰ্মীয় বা শিক্ষানুষ্ঠানত অভিযান চলাব নোৱাৰিব। অৱশ্যে ক্ষমতালৈ অহাৰ পাছত ট্ৰাম্পে সেই আমেৰিকান নিয়ম বাতিল কৰে। তাৰপিছতে অবৈধ ভাৰতীয় অনুপ্ৰৱেশকাৰীক ধৰিবলৈ আমেৰিকাৰ গুৰুদ্বাৰত অভিযান চলোৱা হৈছিল।
উল্লেখ্য যে ড’নাল্ড ট্ৰাম্পে আমেৰিকাৰ ৰাষ্ট্ৰপতি হিচাপে কাৰ্যভাৰ গ্ৰহণ কৰাৰ পিছৰে পৰা অনুপ্ৰৱেশ আৰু নাগৰিকত্বৰ ক্ষেত্ৰত এক ধাৰাবাহিক কঠোৰ নীতি ৰূপায়ণ কৰিছে। ট্ৰাম্পে কাৰ্যভাৰ গ্ৰহণৰ প্ৰথম দিনাই কেইবাটাও কাৰ্যবাহী আদেশত স্বাক্ষৰ কৰে।
বহু ভাৰতীয় ইয়াৰ দ্বাৰা প্ৰভাৱিত হ’বলৈ গৈ আছে। বহু ভাৰতীয় অনুপ্ৰৱেশকাৰীৰ মনত গভীৰ উদ্বেগ চলি আছে। এনে পৰিস্থিতিত এছ জয়শংকৰক ৱাশ্বিংটন ডি চি ভ্ৰমণৰ সময়ত এই বিষয়ে সোধা হৈছিল। ট্ৰাম্প প্ৰশাসনে ‘বিতাড়িত’ কৰিলে ভাৰতে আমেৰিকাত অবৈধ ভাৰতীয় অনুপ্ৰৱেশকাৰীক গ্ৰহণ কৰিবনে? ইয়াৰ উত্তৰত জয়শংকৰে অকপটে কয় যে ভাৰতীয় প্ৰব্ৰজনকাৰীক নিজৰ দেশলৈ ঘূৰি অহাৰ ক্ষেত্ৰত ভাৰত চৰকাৰৰ সদায় ইতিবাচক মনোভাৱ আছে।
অৱশ্যে সামৰিক বিমানেৰে ভাৰতীয়ক এনেদৰে ‘বিতাড়ন’ কৰা বিষয়টোক দিল্লীয়ে কেনেদৰে চাব সেই সন্দৰ্ভত আলোচনা আৰম্ভ হৈছে। ইফালে ১৩ ফেব্ৰুৱাৰীত পুনৰ ড’নাল্ড ট্ৰাম্পক সাক্ষাৎ কৰাৰ কথা আছে প্ৰধানমন্ত্ৰী নৰেন্দ্ৰ মোদীয়ে। তাৰ আগেয়ে ভাৰতীয়সকলক এনেদৰে আমেৰিকাৰ পৰা ‘বিতাড়ন’ কৰাৰ বিষয়টো বহুতে যথেষ্ট তাৎপৰ্যপূৰ্ণ বুলি ভাৱে।
