ভাৰতৰ প্ৰধানমন্ত্ৰী নৰেন্দ্ৰ মোদীয়ে এই সপ্তাহত আমেৰিকাত ভৰি দিলে। যোৱা নিশা আমেৰিকাৰ ৰাষ্ট্ৰপতি ড’নাল্ড ট্ৰাম্পেৰ সৈতে তেওঁৰ বৈঠক হয়। ইফালে এই পৰিস্থিতিত আমেৰিকাৰ পৰা বিতাড়িত ভাৰতীয়ক লৈ এই সপ্তাহত আৰু দুখন বিমান ভাৰতত উপস্থিত হোৱাৰ খবৰ আহিছে।
প্ৰসংগক্ৰমে ইয়াৰ পূৰ্বে যোৱা সপ্তাহত আমেৰিকাৰ সামৰিক বিমানে ১০৪ জন ভাৰতীয়ক হেণ্ডকাফ আৰু শিকলি লগাই ভাৰতৰ মাটিত এৰি থৈ যায়। এই ভাৰতীয়সকলৰ বিৰুদ্ধে আছে আমেৰিকালৈ অবৈধ অনুপ্ৰৱেশৰ অভিযোগ।
জানিব পৰা মতে, বিতাড়িত ভাৰতীয়ক লৈ আমেৰিকাৰ বিমান চলিত সপ্তাহৰ শনিবাৰে পুনৰ ভাৰতৰ মাটিত অৱতৰণ কৰিব। সূত্ৰ অনুসৰি বিমানখন অমৃতসৰত অৱতৰণ কৰাৰ কথা। এইবাৰ এখন নহয়, দুখন বিমানত ভাৰতীয়ক আনিব। ইয়াৰ পূৰ্বে আমেৰিকাই এই দীঘলীয়া যাত্ৰাত ১০৪ জন ভাৰতীয়ক হেণ্ডকাফ আৰু শিকলি লগাই ইয়ালৈ অনাৰ ফটো প্ৰকাশ কৰিছিল।
উক্ত ঘটনাক লৈ বিৰোধী দলৰ পৰা তীব্ৰ প্ৰতিবাদ জনোৱা হয়। বিৰোধীৰ চাপত পৰি সংসদত মুখ খোলেবৈদেশিক মন্ত্ৰী এছ জয়শংকৰে। তেওঁ সংসদত কয় যে আমেৰিকাৰ পৰা প্ৰত্যাৰ্পণ কৰাটো নতুন কথা নহয়। ২০০৯ চনৰ পৰাই এনেকুৱা হৈ আহিছে। জয়শংকৰে কয় যে যদি কোনো নাগৰিকে অবৈধভাৱে বিদেশত বাস কৰে তেন্তে তেওঁলোকক ঘূৰাই লোৱাটো সকলো দেশৰ বাধ্যবাধকতা।
ইপিনে, পঞ্জাৱৰ বিত্তমন্ত্ৰী হৰপাল চিমাই কয় যে অমৃতসৰত এই বিমান অৱতৰণ কৰাৰ উদ্দেশ্য হৈছে বাৰে বাৰে এই ৰাজ্যৰ ভাবমূৰ্তি কলংকিত কৰাৰ চেষ্টা। কেন্দ্ৰত এন ডি এ চৰকাৰক তীব্ৰ সমালোচনা কৰি তেওঁ কয়, ‘হাৰিয়ানা বা গুজৰাটত কিয় নহয়?’ বিজেপিয়ে পঞ্জাৱৰ ভাবমূর্তি কলংকিত কৰিবলৈ চেষ্টা চলাইছে৷ এই বিমানখন আহমেদাবাদত অৱতৰণ কৰা উচিত।‘
উল্লেখ্য যে কালি মোডী-ট্ৰাম্পৰ হাই-ভল্টেজ বৈঠক আৰম্ভ হৈছে ৷ প্ৰত্যাৰ্পণৰ বিষয়টো তাত আলোচনাত আহিছে বুলি ধাৰণা কৰা হৈছে। তাৰ মাজতে এই প্ৰত্যাৰ্পণৰ খবৰ পোহৰলৈ আহিল। ইপিনে, যোৱা সপ্তাহত আমেৰিকাৰ পৰা ভাৰতলৈ ৪০ ঘণ্টীয়া বিমান যাত্ৰাত অবৈধ ভাৰতীয় অনুপ্ৰৱেশকাৰীক শিকলিৰে বান্ধি পঠিওৱাৰ পিছত মোডী-ট্ৰাম্পৰ বৈঠকত কি উত্থাপন হৈছে, সেই বিষয়ে এতিয়াও জানিব পৰা হোৱা নাই।
