যোৱা ২০ ফেব্ৰুৱাৰীত নগাঁও জিলাৰ ৰূপহী অঞ্চলত গণ আক্ৰমণৰ সন্মুখীন হয় ধুবুৰী লোকসভা সমষ্টিত সাংসদ ৰকিবুল হুছেইন আৰু তেখেতৰ পুত্ৰ তাঞ্জিল হুছেইন।
এই ঘটনাৰ পিছতেই আৰক্ষী থানাত এজাহাৰ দাখিল কৰে সাংসদ ৰকিবুল হুছেইনে।
এই ঘটনাৰ তদন্তৰ দাবী জনোৱাৰ লগতে আক্ৰমণকাৰীক কঠোৰ শাস্তি দিয়াৰ দাবী জনাইছে কংগ্ৰেছকে ধৰি বিৰোধী দলসমূহে।
ইপিনে মুখ্যমন্ত্ৰী হিমন্ত বিশ্বাই অভিযোগ উত্থাপন কৰিছে যে ৰকিবুল হুছেইনে এজাহাৰ দাখিল কৰিছে যদিও কংগ্ৰেছ সাংসদগৰাকীয়ে চিকিৎসা পৰীক্ষা কৰিবলৈ অস্বীকাৰ কৰিছে।
উল্লেখযোগ্য যে চিকিৎসা প্ৰতিবেদন অবিহনে আইন প্ৰয়োগকাৰী কৰ্তৃপক্ষই গোচৰৰ সঠিক মূল্যায়ন কৰিব নোৱাৰে বা ভাৰতীয় ন্যায় সংহিতা (ভাৰতীয় দণ্ডবিধিৰ) সংশ্লিষ্ট ধাৰাসমূহ প্ৰয়োগ কৰিব নোৱাৰে।
এই সম্পৰ্কে হিমন্ত বিশ্ব শৰ্মাই সামাজিক মাধ্যমত লিখিছে – “কংগ্ৰেছৰ মাননীয় সাংসদ ৰকিবুল হুছেইনে কালি সংঘটিত এক আক্ৰমণৰ অভিযোগ উত্থাপন কৰি আজি এজাহাৰ দাখিল কৰিছিল। অৱশ্যে সাংসদগৰাকীয়ে এতিয়ালৈকে চিকিৎসা পৰীক্ষা কৰিবলৈ অস্বীকাৰ কৰিছে। এই পৰীক্ষা অবিহনে আইনী প্ৰক্ৰিয়া সঠিকভাৱে নিৰ্ধাৰণ তথা এজাহাৰত ভাৰতীয় ন্যায় সংহিতাৰ (ভাৰতীয় দণ্ডবিধি) উপযুক্ত ধাৰা প্ৰয়োগ কৰিব পৰা নাযায়। কংগ্ৰেছ দল আৰু বিৰোধী দলৰ দলপতিয়ে এই স্থিতি মন কৰাটো প্ৰয়োজনীয়।”
কিন্তু মুখ্যমন্ত্ৰীৰ এই পোষ্টটোৰ পিছতে সাংসদ গৌৰৱ গগৈয়ে মুখ্যমন্ত্ৰীৰ বিৰুদ্ধে আন এক অভিযোগ দাখিল কৰি সামাজিক মাধ্যমত লিখিছে – “লোকসভাৰ মাননীয় সাংসদ ৰকিবুল হুছেইন ডাঙৰীয়াক দিনদুপৰতে কৰা নিৰ্মম আক্ৰমণৰ বিৰুদ্ধে দিয়া গোচৰৰ অসম ৰাজ্যিক আৰক্ষীক এফআইআৰ ৰুজু কৰিবলৈ দিয়া নাই মুখ্যমন্ত্ৰী হিমন্ত বিশ্ব শৰ্মাই, গুণ্ডাকেইটাই আৰক্ষী বিষয়াকো আক্ৰমণ কৰি তেওঁলোকৰ অস্ত্ৰ–শস্ত্ৰ কাঢ়ি নিবলৈ চেষ্টা কৰিছিল। তৎসত্বেও আক্ৰমণকাৰী দূৰ্বৃত্ত কেইটাই লাভ কৰে মুখ্যমন্ত্ৰীৰ সুৰক্ষা। বিজেপিৰ শাসনত অসম আৰক্ষীৰ এনে দুৰ্দশা চিন্তনীয় ।‘’
উল্লেখ্য যে শুকুৰবাৰে কংগ্ৰেছৰ সাংসদ ৰকিবুল হুছেইনে তেওঁৰ ওপৰত সংঘটিত আক্ৰমণৰ সন্দৰ্ভত ২২ জন লোকৰ নাম উল্লেখ কৰি আৰক্ষীৰ এজাহাৰ দাখিল কৰিছে।
আৰক্ষীৰ এগৰাকী জ্যেষ্ঠ বিষয়াই জনোৱা মতে, হুছেইনৰ অভিযোগ নগাঁও সদৰ থানাত পঞ্জীয়ন কৰা হৈছে। ইফালে, ৰকিবুল হুছেইনৰ ওপৰত সংঘটিত আক্ৰমণৰ অভিযোগত অসম আৰক্ষীয়ে ১০ জন ব্যক্তিক গ্ৰেপ্তাৰ কৰিছে।
