নব্বৈৰ দশকত বিশ্বক স্তম্ভিত কৰি তোলা ঘটনাটো আছিল বিশ্বৰ এক নম্বৰ শাসক, তেতিয়াৰ আমেৰিকাৰ ৰাষ্ট্ৰপতি বিল ক্লিণ্টন আৰু তেতিয়াৰ হোৱাইট হাউছৰ ইন্টাৰ্ণ মনিকা লিউইনস্কিৰ বিবাহ বহিৰ্ভূত প্ৰেম। যাৰ বাবে আন্তঃৰাষ্ট্ৰীয় পৰ্যায়ত এক বৃহৎ চাঞ্চল্যৰ সৃষ্টি হয়। পিছলৈ সময়ৰ লগে লগে ক্ষমতা চক্ৰৰ পৰিৱৰ্তনত ক্লিণ্টনে আমেৰিকাৰ ৰাষ্ট্ৰপতি পদৰ পৰা আঁতৰি যায়।
ইমান দিনৰ পিছত ২০২৫ চনত মনিকাই এই ঘটনাৰ বিষয়ে মুকলিকৈ কৈছে । শেহতীয়াকৈ এটা প’ডকাষ্ট চেনেলত দিয়া এক সাক্ষাৎকাৰত মনিকা লিউইনস্কিয়ে কয় যে সেই সময়ত তেওঁ (ক্লিন্টনে)পদত্যাগ কৰিব লাগিছিল।
১৯৯৫ চনৰ কথা। সেই সময়ত বিল ক্লিণ্টন আছিল হোয়াইট হাউছৰ শাসনকৰ্তা, আমেৰকাৰ ৰাষ্ট্ৰপতি। ২৪ বছৰীয়া মনিকা লিউইনস্কিয়ে অ’ভাল অফিচত ইন্টাৰ্ণ হিচাপে যোগদান কৰিছিল। সেই সময়ত ক্লিণ্টনৰ বয়স আছিল ৪৯ বছৰ।
অসমান বয়সৰ পুৰুষ-মহিলা দুজনৰ মাজত প্ৰেমৰ ৰসায়ন গঢ় লৈ উঠক বা নুঠক, অসাধাৰণ ধুনীয়া মনিকাৰ প্ৰতি ক্লিন্টনৰ আকৰ্ষণ অৱশ্যেই আছিল। দুয়োৰে যৌন সম্পৰ্ক গঢ়িবলৈ বেছি সময় নালাগিল। সেয়া পোহৰলৈও আহিল। বিশ্বৰ আটাইতকৈ শক্তিশালী দেশখনৰ শাসকক জড়িত কৰা এনে যৌন কেলেংকাৰী নিমিষতে চৰ্চাৰ বিষয় হৈ পৰিল। ক্লিণ্টনৰ সংসাৰতোতো জোকাৰণিৰ সৃষ্টি হ’বলৈ ধৰে।
মাজে মাজে বিতৰ্ক আৰু আলোচনা কমি গ’লেও ক্লিণ্টনৰ বিষয়টো আহিলে ধুনীয়া মনিকাৰ কথা নোলোৱা মানুহ কমেইহে পোৱা যায়। সেয়ে, ৫১ বছৰীয়া মনিকাই ইমান দিনৰ পাছত এই কেলেংকাৰীৰ বিষয়ে মুকলিকৈ ক’লে। সেই সময়ৰ এই কেলেংকাৰীৰ কথা এলেক্স কুপাৰৰ প’ডকাষ্ট চেনেল ‘কল হাৰ ডেডী’ত মনিকা লিউইনস্কিৰ সৈতে হোৱা এক সাক্ষাৎকাৰত দেখা গ’ল।
মনিকাৰ ভাষাত ক’বলৈ গ’লে “সেই সময়ত তেওঁ পদত্যাগ কৰিব লাগিছিল। মই ভাবো যে সেই সময়ত ঘটা পৰিস্থিতিৰ সৈতে মোকাবিলা কৰাৰ সময়ত তেওঁ ক’ব লাগিছিল – এইবোৰ কাৰো মূৰ ঘমোৱাৰ বিষয় নহয়, নহ’লে তেওঁ চিধাই ৰাষ্ট্ৰপতি পদৰ পৰা পদত্যাগ কৰিব লাগিছিল। নহ’লে পৃথিৱীৰ আটাইতকৈ প্ৰভাৱশালী কাৰ্যালয়ৰ এজন ইন্টাৰ্ণৰ বিষয়ে আলোচনাৰ কেন্দ্ৰৰ পৰা তেওঁক আঁতৰাই দিব লগা হ’লহেঁতেন। সেই সময়ত মই নিজৰ বিষয়ে বহুত কথা শুনিছিলো।”
তেওঁ লগতে দাবী কৰে যে, “আচলতে সেই সময়ত সকলোৱে পৰিস্থিতিৰ বিষয়ে আলোচনা কৰাত ব্যস্ত আছিল। আৰু ইয়াৰ প্ৰভাৱ বহু লোকৰ ওপৰত পৰে।”
লণ্ডন স্কুল অৱ ইকনমিক্সৰ পৰা মনোবিজ্ঞানৰ স্নাতক মনিকা লিউইনস্কি পিছলৈ আমেৰিকাৰ এগৰাকী সমাজ কৰ্মীত পৰিণত হয়। পেছাত তেওঁৰ মোটামুটি ভাল সুনাম আছে। এতিয়া নিজৰ জীৱনৰ বিয়লিলৈ ঢাপলি মেলাৰ সময়ত মনিকাই তেওঁৰ প্ৰথম যৌবনৰ যৌন সম্পৰ্কক কেনে দৃষ্টিৰে চায়, ৫১ বছৰীয়া সমাজকৰ্মীগৰাকীয়ে সাক্ষাৎকাৰত প্ৰকাশ কৰিলে।
