ৰাজনৈতিক লাভৰ বাবে ছাত্ৰ-ছাত্ৰীৰ শৈক্ষিক জীৱনলৈ অন্ধকাৰ ভৱিষ্যত কঢ়িয়াই অনাৰ লগতে মাতৃভাষা মাধ্যমৰ চৰকাৰী বিদ্যালয়সমূহ নি:শেষ কৰাৰ গভীৰ ষড়যন্ত্ৰত লিপ্ত হৈছে হিমন্ত বিশ্ব শৰ্মা নেতৃত্বাধীন বিজেপি চৰকাৰ। বিশ্বমানৰ শিক্ষাৰ প্ৰতিশ্ৰুতি দিয়া বিজেপি চৰকাৰখনে এইবাৰ ডেৰৰ পৰা দুই শতাধিক শিক্ষকক অৰুণোদয় আঁচনিৰ হিতাধিকাৰীৰ নথিপত্ৰ পৰীক্ষণৰ (ভেৰিফিকেশ্বন) কামত নিয়োজিত কৰিবলৈ ওলাইছে।
ভাৰতৰ গণতান্ত্ৰিক যুৱ ফেডাৰেছন চমুকৈ ডি ৱাই এফ আইৰ অসম ৰাজ্যিক কমিটিয়ে চৰকাৰৰ এনে ছাত্ৰ-ছাত্ৰী বিৰোধী পদক্ষেপত স্তম্ভিত হৈ পৰিছে আৰু এয়া মাতৃভাষা মাধ্যমৰ চৰকাৰীখণ্ডৰ বিদ্যালয়সমূহ ধ্বংসৰ গভীৰ ষড়যন্ত্ৰ বুলি অভিহিত কৰিছে। খবৰ অনুসৰি গুৱাহাটীৰ প্ৰতিখন বিদ্যালয়ৰ পৰা দুই-তিনিজনকৈ শিক্ষকক এই কামৰ বাবে বাছনি কৰি আজিৰে পৰা প্ৰশিক্ষণ আৰম্ভ কৰিছে। শিক্ষকসকলে ৫/৬ দিন শিক্ষাদানৰ পৰা বিৰত থাকি অৰুণোদয় আঁচনিৰ হিতাধিকাৰীৰ নথিপত্ৰ পৰীক্ষা কৰিব লাগিব। এনে অনাশৈক্ষিক কামৰ বাবে শিক্ষকসকলক নিৰ্বাচিত কৰাক লৈ গভীৰ ৰহস্য সৃষ্টি হৈছে। শিক্ষাদানৰ গুণগত মান উন্নত কৰা, বিদ্যালয়ৰ ফলাফল বেয়া হ’লে শিক্ষকক ৰাজহুৱাভাৱে ককৰ্থনা কৰি ৰাইজৰ বাহ: বাহ: লোৱাৰ চেষ্টা কৰাৰ সময়তে শিক্ষকক আঁচনিৰ কামত জড়িত কৰা কাৰ্যত চৰকাৰখনৰ প্ৰকৃত স্বৰূপ ওলাই পৰিছে।
আন এক আজব ঘটনা অনুসৰি আজি প্ৰায় ডেৰ-দুই মাহ ধৰি গুৱাহাটীৰ ডেৰ শতাধিক শিক্ষকক ই-কক্ষৰ টিউটৰিয়েল ক্লাছৰ ভিডিও ৰেকৰ্ডিঙৰ নামত শিক্ষাদানৰ পৰা আঁতৰাই ৰাখিছে। এটা ব্যক্তিগত বেচৰকাৰী প্ৰতিষ্ঠান (এনজিও)ৰ কামত চৰকাৰী শিক্ষানুষ্ঠানৰ শিক্ষকক ব্যস্ত ৰখাৰ বিষয়টো আশ্চৰ্যজনক। ব্যক্তিগত উক্ত প্ৰতিষ্ঠানৰ মূৰব্বীৰ সৈতে শিক্ষা বিভাগৰ বৰমূৰীয়াৰ সু-সম্পৰ্ক থকাৰ বাবেই এনেদৰে শ্ৰেণীকোঠা এৰি কোনো বিকল্প ব্যৱস্থা নকৰাকৈ বৃহৎ সংখ্যক শিক্ষকে এন জি অ’ৰ কামত নিয়োজিত হৈ থাকিব পাৰিছে। এই শিক্ষকসকলে শীঘ্ৰে এন জি অ’ৰ কামৰ পৰা মুক্ত হোৱাৰ সম্ভাৱনা কম। ইয়াৰ ফলত পাঠদানৰ পৰা বঞ্চিত ছাত্ৰ-ছাত্ৰীসকলে অন্ধকাৰ ভবিষ্যতৰ দিশে আগবাঢ়িছে।
আচৰিত কথা যে যোৱা ১৫ ফেব্ৰুৱাৰী তাৰিখে হাইস্কুলৰ ঠিকাভিত্তিক শিক্ষকসকলক স্থায়ী নিযুক্তি পত্ৰ বিতৰণৰ দিনাও প্ৰতিখন উচ্চ আৰু উচ্চতৰ মাধ্যমিক বিদ্যালয়ৰ পৰা কমেও দুজনকৈ শিক্ষক উপস্থিত হ’বলৈ এক অলিখিত নিৰ্দেশ দিয়া হৈছিল। এনেবোৰ কাৰ্যই প্ৰমাণ কৰিছে যে হিমন্ত বিশ্ব শৰ্মা আৰু তেওঁৰ চৰকাৰে ৰাজহুৱা মাতৃভাষা মাধ্যমৰ বিদ্যালয়সমূহ ধ্বংসৰ গভীৰ ষড়যন্ত্ৰত লিপ্ত হৈছে। ৰাজ্যৰ লাখ লাখ ছাত্ৰ-ছাত্ৰীৰ শৈক্ষিক ভবিষ্যতৰ লগত জড়িত আৰু ৰাজহুৱা শিক্ষা ব্যৱস্থাৰ প্ৰতি প্ৰত্যাহ্বান আনিব পৰা এনে কাৰ্যৰ বিৰুদ্ধে বিধানসভাত বিষয়টো উত্থাপন কৰি চৰকাৰৰ ওপৰত হেঁচা প্ৰয়োগ কৰিবলৈ ডি ৱাই এফ আইয়ে বিৰোধী সকলো বিধায়কৰ প্ৰতি আহ্বান জনাইছে।
