শনিবাৰে অষ্ট্ৰেলিয়াৰ পূব উপকূলত ঘূৰ্ণীবতাহ আলফ্ৰেডে আঘাত হানিছে, যাৰ ফলত বানৰ আশংকা বৃদ্ধি পাইছে। ইয়াৰ আক্ৰমণৰ ফলত ৩ লাখ ৩০ হাজাৰ ঘৰ আৰু ব্যৱসায়িক প্ৰতিষ্ঠান বিদ্যুৎ বিচ্ছিন্ন হৈ পৰে।
এই বহিঃক্ৰান্তীয় ঘূৰ্ণীবতাহ এতিয়া গ্রীষ্মমণ্ডলীয় নিম্নচাপলৈ পৰিণত হৈছে৷ আলফ্ৰেডৰ প্ৰভাৱৰ ফলত উপকূলীয় অঞ্চলৰ ওপৰেৰে ধুমুহা বতাহ বলিছে, গছ-গছনি উভালি পেলাইছে, বিদ্যুৎ পৰিবাহী তাঁৰ ছিন্ন কৰিছে আৰু অট্টালিকাসমূহৰ ক্ষতি কৰিছে।
চৰকাৰী বতৰ বিজ্ঞানীসকলে জনোৱা মতে, এতিয়াও প্ৰচণ্ড বৰষুণ হৈ আছে। দক্ষিণ-পূব কুইন্সলেণ্ড আৰু উত্তৰ-পূব নিউ চাউথ ৱেলছৰ ৪০০ কিলোমিটাৰ উপকূলৰ কিছু অংশত নদীৰ জলপৃষ্ঠ বৃদ্ধি পাইছে।
উপভোক্তা কোম্পানীসমূহে জনোৱা মতে, দক্ষিণ-পূব কুইন্সলেণ্ডৰ ২ লাখ ৯৫ হাজাৰ আৰু নিউ চাউথ ৱেলছৰ আন ৪২ হাজাৰ ৬০০ ঘৰ বিদ্যুৎ বিছিন্ন হৈ পৰিছে। কোম্পানীসমূহে সকীয়াই দিছে যে বানপানীয়ে বিদ্যুৎ পৰিবাহী তাঁৰ মেৰামতিৰ কামত ব্যাঘাত জন্মাব পাৰে।
প্ৰদেশখনৰ প্ৰধানমন্ত্ৰী ডেভিদ ক্ৰীছাফুলিয়ে কয় যে প্ৰাকৃতিক দুৰ্যোগৰ বাবে কুইন্সলেণ্ডৰ ইতিহাসত এইটোৱেই আটাইতকৈ ডাঙৰ বিদ্যুৎ বিচ্ছিন্নতা আৰু অনুমান কৰে যে প্ৰায় ৭ লাখ ৫০ হাজাৰ লোক বিদ্যুৎ বিচ্ছিন্নতাৰ ফলত ক্ষতিগ্ৰস্ত হৈছে।
বতৰ বিজ্ঞান ব্যুৰোৱে সতৰ্কবাণী জাৰি কৰি কয় যে গোটেই সপ্তাহটোত প্ৰচণ্ড বৰষুণ আৰু বিধ্বংসী ধুমুহা বতাহৰ আশংকা আছে।
বতৰ বিজ্ঞান বিভাগে এক বিবৃতিত কয় যে ইতিমধ্যে নদীসমূহ প্ৰবল বৰষুণৰ ফলত উফন্দি উঠিবলৈ আৰম্ভ কৰিছে।
