পুনৰ ৰক্তাক্ত হৈ পৰিছে ছিৰিয়া। নিৰাপত্তা বাহিনী আৰু উৎখাত হোৱা ৰাষ্ট্ৰপতি বাছাৰ আল আছাদৰ সমৰ্থকৰ মাজত সংঘটিত সংঘৰ্ষত উত্তপ্ত হৈ পৰিছে দেশখন। প্ৰায় এক হাজাৰ নাগৰিকৰ মৃত্যু হৈছে। দুগৰাকী মহিলাক বিৱস্ত্ৰ কৰি ৰাজপথত ঘুৰোৱাৰ অভিযোগ উত্থাপন হৈছে।
বাতৰি অনুসৰি, বৰ্তমান ছিৰিয়া চৰকাৰৰ নিৰাপত্তা বাহিনীয়ে বাছাৰ আল আছাদৰ অনুগামী হিচাপে পৰিচিত আলাউই সংখ্যালঘুৰ ওপৰত নিৰ্বিচাৰ গুলীচালনা কৰিছে। আছাদৰ ঘনিষ্ঠ সহযোগীসকলে ইয়াক প্ৰতিশোধমূলক হত্যাকাণ্ড বুলি অভিহিত কৰিছে।
আছাদ চৰকাৰৰ পতনৰ পিছৰে পৰা ছিৰিয়াত সংঘাত অব্যাহত আছে। আছাদ সমৰ্থক আৰু নিৰাপত্তাৰক্ষীৰ মাজত সংঘৰ্ষৰ খবৰ প্ৰায়ে পোহৰলৈ আহিছে। অৱশ্যে ছিৰিয়াৰ প্ৰায় সকলো অঞ্চল বৰ্তমান নতুন চৰকাৰৰ নিয়ন্ত্ৰণত আছে। প্ৰশাসনে উপকূলীয় সকলো পথ বন্ধ কৰি দিছে। চৰকাৰে দাবী কৰিছে যে এই অঞ্চলসমূহত পুনৰ সন্ত্ৰাসবাদৰ উত্থান ঘটিছে।
ছিৰিয়াৰ মানৱ অধিকাৰ আয়োগৰ তথ্য অনুসৰি শেহতীয়া সংঘৰ্ষত ৭৪৫ জন সাধাৰণ নাগৰিক নিহত হৈছে। বেছিভাগেই বন্দুকৰ গুলীত নিহত হয়। খবৰ অনুসৰি আছাদক নিৰাপত্তাত থকা সামৰিক বাহিনীৰ ১৪৮ জন সদস্যও নিহত হৈছে। নাৰীৰ ওপৰত অকথ্য নিৰ্যাতনৰ বিভিন্ন বাতৰিও পোহৰলৈ আহিছে।
দেশখনত স্বাভাৱিক জীৱন বিঘ্নিত হৈ পৰিছে। লাটাকিয়া প্ৰদেশৰ বৃহৎ অংশ বিদ্যুত বিহীন হৈ পৰিছে। খোৱাপানীৰ নাটনিও হৈছে। স্থানীয় বাসিন্দাসকলে কয় যে ৰাস্তাৰ চুকে কোণে বন্দুকধাৰীয়ে ঘূৰি ফুৰিছে। কোনোবা আগবাঢ়ি আহিলে প্ৰথমে তেওঁলোকৰ পৰিচয় পত্ৰ পৰীক্ষা কৰা হয় আৰু দেখুৱাব নোৱাৰিলে বন্দুকেৰে গুলীয়াই হত্যা কৰা হৈছে। এইবোৰক ‘প্ৰতিশোধমূলক হত্যা’ বুলি অভিহিত কৰা হৈছে। ৰাজপথত মৃতদেহৰ দম দেখা গৈছে।
ডিচেম্বৰ মাহত আছাদ চৰকাৰৰ পতনৰ পিছত বিদ্ৰোহী সংগঠন তাহৰিৰ আল-শ্বাম (এইচটিএছ)ৰ শীৰ্ষ নেতা আবু মহম্মদ আল-জোলানীয়ে অন্তৱৰ্তীকালীন চৰকাৰ গঠনৰ কথা ঘোষণা কৰে। অৱশ্যে সেই চৰকাৰৰ প্ৰধানমন্ত্ৰীৰ দায়িত্ব তেওঁ লাভ কৰা নাছিল। আন এজন বিদ্ৰোহী নেতা মহম্মদ আল বছিৰে লাভ কৰিছে।
ইপিনে, চাৰি বছৰৰ ভিতৰত গণতান্ত্ৰিকভাৱে নিৰ্বাচিত চৰকাৰলৈ ক্ষমতা হস্তান্তৰ কৰা হ’ব বুলিও ঘোষণা কৰা হৈছে। আল কায়দাৰ প্ৰাক্তন শীৰ্ষ বিদ্ৰোহী নেতা আহমেদ আল শ্বাৰা যোৱা জানুৱাৰী মাহত অন্তৱৰ্তীকালীন চৰকাৰৰ প্ৰেছিডেন্ট নিৰ্বাচিত হৈছিল।
