চেম্পিয়নছ ট্ৰফীৰ ছেমি ফাইনেলত মেচ ফিক্সিঙৰ অভিযোগত মুঠ ৫ গৰাকী বুকীক গ্ৰেপ্তাৰ কৰিছে দিল্লী আৰক্ষীৰ ক্ৰাইম ব্ৰাঞ্চে। তেওঁলোকক সোধা-পোছা কৰাৰ অন্তত পোহৰলৈ আহিছে যে দিল্লীৰ এনচিআৰৰ পৰা ডুবাইলৈ এই বেটিং চক্ৰৰ জাল বিয়পি আছে।
ভাৰত-অষ্ট্ৰেলিয়াৰ চেম্পিয়নছ ট্ৰফীৰ ছেমি ফাইনেল মেচত বাজি ধৰাৰ অপৰাধত দিল্লী আৰক্ষীয়ে প্ৰথমে গ্ৰেপ্তাৰ কৰিছিল দুজন লোকক। ইয়াৰ পিছত নিউজিলেণ্ড আৰু দক্ষিণ আফ্ৰিকাৰ মাজত অনুষ্ঠিত চেম্পিয়নছ ট্ৰফীৰ দ্বিতীয়খন ছেমি ফাইনেল খেলত কোটি কোটি টকাৰ বাজি ধৰাৰ অপৰাধত আৰু তিনিজন লোকক গ্ৰেপ্তাৰ কৰা হয়।
ডুবাইত অনুষ্ঠিত হ’বলগীয়া চেম্পিয়নছ ট্ৰফীৰ ফাইনেল মেচখনত ৫ হাজাৰ কোটি টকা পৰ্যন্ত বাজি ধৰা হৈছে। বেটিং চক্ৰটো নিৰীক্ষণ কৰা সূত্ৰই দাবী কৰিছে যে আন্তঃৰাষ্ট্ৰীয় বুকীৰ বাবে ভাৰত প্ৰিয় দল। সূত্ৰটোৱে লগতে কয় যে বহু বুকী আণ্ডাৰৱৰ্ল্ডৰ সৈতে জড়িত। কাকতলীয়াকৈ ক’বলৈ গ’লে প্ৰতিখন ডাঙৰ মেচৰ সময়ত ডুবাইত বিশ্বৰ বিভিন্ন প্ৰান্তৰ পৰা অহা ডাঙৰ ডাঙৰ বুকী গোট খায়। এনডিটিভিয়ে এক প্ৰতিবেদনত দাবী কৰিছে যে ডাউদ ইব্ৰাহিমৰ গেং ‘ডি কোম্পানী’ও ডুবাইৰ ডাঙৰ ডাঙৰ ক্ৰিকেট মেচত বাজি ধৰাৰ কামত জড়িত।
দিল্লী আৰক্ষীৰ ক্ৰাইম ব্ৰাঞ্চে প্ৰথমে মেচ বেটিঙৰ লগত জড়িত এটা ছিণ্ডিকেট আৱিষ্কাৰ কৰে। পাৰবীন কোছাৰ আৰু সঞ্জয় কুমাৰকে ধৰি ৫জন অভিযুক্তক গ্ৰেপ্তাৰ কৰা হয়। এই ছিণ্ডিকেটৰ মূল বছ হৈছে পাৰবীন কোছাৰ। লেপটপ আৰু মোবাইল ফোনযোগে লাইভ বেটিং চলাই থকা অৱস্থাত ধৰা পৰে অভিযুক্ত। ঘটনাস্থলীৰ পৰা বহু ইলেক্ট্ৰনিক সঁজুলি আৰু বাজি সম্পৰ্কীয় সামগ্ৰী জব্দ কৰা হৈছে।
পাৰবীণ কোছাৰে বেটিং ৱেবছাইটৰ পৰা মাষ্টাৰ আইডি কিনি ছুপাৰ মাষ্টাৰ আইডি তৈয়াৰ কৰি আন বুকীক বেটিং আইডি বিক্ৰী কৰিছিল। এই ছিণ্ডিকেটে প্ৰতিটো লেনদেনৰ ওপৰত ৩% কমিচন লয়। অফলাইন জুৱাত অভিযুক্তই ফোন কলৰ জৰিয়তে লাইভ বাজি ধৰে আৰু বাজিৰ মূল্য অনুসৰি নোটপেডত এন্ট্ৰি কৰা হয় ।
ছোটু বনচাল পশ্চিম দিল্লীৰ বাসিন্দা, তেওঁ দিল্লীৰ বুকী, যিয়ে এটা বেটিং এপ প্ৰস্তুত কৰিছে আৰু এই এপটো কানাডাত নিৰ্মিত। ডুবাইত আছে ছোটু বনচাল। পাৰবীণ কোছাৰে প্ৰথমে ছ’চিয়েল মিডিয়াত যোগাযোগ কৰিছিল ছোটু বনচালৰ সৈতে। ইয়াৰ পিছত তেওঁৰ পৰা এপ এটা ভাড়া কৰি ক্ৰিকেট মেচ ঠিক কৰিবলৈ আৰম্ভ কৰিলে।
দিল্লীৰ মতিনগৰৰ বাসিন্দা বিনয়ো ডুবাইত আছে। দিল্লীৰ এই বুকীয়ে আগতে ক্ৰিকেট খেলপথাৰৰ পৰা লাইভ খবৰ দিছিল। এজেন্সীয়েও এই বুকীক বিচাৰিছে। এই ব্যৱসায়টো ৪০ শতাংশ কমিচনত চলি থাকে আৰু যিসকলে বাজি ধৰিছে তেওঁলোকে এপটোত ক্ৰেডিট পইণ্ট কিনিব লাগে, যিবোৰ কেৱল এপ ডেভেলপাৰ বা এপটো ভাড়াত লোৱা ব্যক্তিজনেহে প্ৰদান কৰে, এইদৰেই এই চক্ৰটোৱে কাম কৰিছিল।
ইয়াৰ উপৰিও দিল্লীত বসবাস কৰা আন কেইবাগৰাকীও বুকী এই ছিণ্ডিকেটৰ সৈতে জড়িত। তাৰ ভিতৰত ববি, গোলু, নীতিন জৈন, জীতু উল্লেখযোগ্য।
নিউজিলেণ্ড আৰু দক্ষিণ আফ্ৰিকাৰ মাজত অনুষ্ঠিত চেম্পিয়নছ ট্ৰফীৰ ছেমি ফাইনেল মেচত কোটি কোটি টকাৰ বাজি ধৰাৰ অভিযোগত কৰমপুৰা অঞ্চলৰ পৰা তিনিজন লোকক গ্ৰেপ্তাৰ কৰিছে দিল্লী আৰক্ষীৰ ক্ৰাইম ব্ৰাঞ্চে। তেওঁলোকৰো ডুবাইৰ সৈতে সংযোগ থকা দেখা গৈছে। গ্ৰেপ্তাৰ হোৱা লোকসকলৰ ভিতৰত আছে মনীষ চাহানী, যোগেশ কুকেজা আৰু সুৰজ।
জেৰাৰ সময়ত এই চক্ৰৰ মূল অপাৰেটৰ মণিষ চাহানী বুলি জানিব পৰা গৈছে। তেওঁ জুৱাত অংশগ্ৰহণ কৰাসকলৰ ভইচ ৰেকৰ্ড কৰি বেংক একাউণ্ট বা নগদ ধনৰ জৰিয়তে লেনদেন চলায়। মনীষেও কয় যে তেওঁ এই কাম কোনো মধ্যস্থতাকাৰীৰ সহায়ত কৰা নাছিল। সমগ্ৰ বাজিৰ কামটো তেওঁ নিজেই নিয়ন্ত্ৰণ কৰিছিল। জেৰাৰ সময়ত তিনিওজন অভিযুক্তই সত্তা বেটিং এপৰ সৃষ্টিকৰ্তা বুলি উল্লেখ কৰে। তেওঁলোকে ভাৰতৰ বাহিৰত কাম কৰে। আৰু অভিযুক্তসকলৰ মাজৰ এজন ৰিংকুৱে ডুবাইৰ পৰা সকলো পৰিচালনা কৰে। তেওঁলোকৰ পৰা প্ৰায় ২২ লাখ টকা উদ্ধাৰ কৰা হয়।
