ডব্লিউ পি এলৰ ফাইনেলত পুনৰ ছিন্নভিন্ন হৈ পৰিল দিল্লী কেপিটেলছৰ সপোন। শনিবাৰে ব্ৰেবৰ্ণ ষ্টেডিয়ামত অনুষ্ঠিত হোৱা ৰোমাঞ্চকৰ ফাইনেলত দিল্লীক পৰাস্ত কৰি দ্বিতীয়বাৰৰ বাবে মহিলা প্ৰিমিয়াৰ লীগৰ চেম্পিয়ন হ’ল মুম্বাই ইণ্ডিয়ানছ। হৰমনপ্ৰীতৰ দলটোৱ ফাইনেলত ৮ ৰাণত জয়লাভ কৰে।
শনিবাৰে ব্ৰেবৰ্ণ ষ্টেডিয়ামত টছত জয়লাভ কৰি দিল্লী কেপিটেলে প্ৰথমে বলিং কৰাৰ সিদ্ধান্ত লয়। প্ৰথমে বেটিং কৰাৰ পিছত মুম্বাইৰ আৰম্ভণি অস্বস্তিকৰ আছিল যদিও অধিনায়ক হৰমনপ্ৰীত কৌৰৰ অনবদ্য অৰ্ধশতকৰ ওপৰত নিৰ্ভৰ কৰি দিল্লীৰ বাবে ১৫০ ৰানৰ লক্ষ্য নিৰ্ধাৰণ কৰিছিল মুম্বাই ইণ্ডিয়ানছে।
হৰমনপ্ৰীতে ৪৪টা বলত ৬৬ ৰান সংগ্ৰহ কৰে। মুম্বাইৰ ইংৰাজ তাৰকা নাটালি স্কাইভাৰ ব্ৰাণ্টেও ভাল ইনিংছ খেলে। তেওঁ ২৮টা বলত ৩০ ৰান সংগ্ৰহ কৰে। দিল্লীৰ হৈ মাৰিজান কাপে দৰ্শনীয় বলিং কৰে। তেওঁ চাৰি অভাৰত মাত্ৰ ১১ ৰানত ২ উইকেট দখল কৰে।
ইয়াৰ প্ৰত্যুত্তৰত দিল্লীয়েও বেটিং কৰিবলৈ নমাৰ সময়ত আৰম্ভণি বৰ স্বস্তিকৰ নাছিল। দ্ৰুত একেৰাহে ৩টা উইকেট হেৰুৱাই চাপত পৰিছিল মেগ লেনিংছৰ দলটো। তিনিটা উইকেট পতনৰ পাছত জেমাইমা ৰড্ৰিগেজ আৰু মাৰিজান কাপে যুঁজ আৰম্ভ কৰে।
জেমাইমাই ২১টা বলত ৩০ ৰান সংগ্ৰহ কৰে। ২৬টা বলত ৪০ ৰানৰ বিধ্বংসী ইনিংছ খেলিও কাপে নিজৰ দলটোক জয়ৰ দিশে আগবঢ়াই নিব নোৱাৰিলে। শেষত দিল্লীৰ ইনিংছ ১৪১ ৰানতে সমাপ্ত হয়। হৰমনপ্ৰীতৰ মুম্বাই ইণ্ডিয়ানছে কৌৰে স্নায়ুযঁজ চম্ভালি পুনৰবাৰ WPL খিতাপ দখল কৰে।
সংক্ষিপ্ত স্কোৰঃ
মুম্বাই ইণ্ডিয়ানছ- ১৪৯/৭ (হৰমনপ্ৰীত কৌৰ-৬৬, নাটালি স্কাইভাৰ-ব্ৰেণ্ট-৩০)
দিল্লী কেপিটেলছ- ১৪১/৯ (মাৰিজন কাপ-৪০, জেমাইমা ৰড্ৰিগেজ-৩০)
মুম্বাই ইণ্ডিয়ানছে ৮ ৰানত জয়লাভ কৰে।
