জেফ্ৰিজৰ শেহতীয়া প্ৰতিবেদন অনুসৰি ভাৰতৰ অনুকূল চৰকাৰী নীতি, চাহিদাৰ বৃদ্ধি, কম খৰচী উৎপাদন ক্ষমতা আৰু পশ্চিমীয়া ৰাষ্ট্ৰৰ সৈতে কৌশলগত সংযোগে ভাৰতৰ ছেমি কণ্ডাক্টৰ খণ্ডৰ উন্নতি সাধন কৰিছে।
চৰকাৰৰ পৰা পোৱা বিত্তীয় সহযোগিতা, কম উৎপাদন ব্যয়, প্ৰতিভাম্পন্ন কৰ্মশক্তি আৰু বৰ্ধিত চাহিদাই ভাৰতৰ ছেমি কণ্ডাক্টৰ খণ্ডৰ সফলতাত গুৰুত্ব পূৰ্ণ ভূমিকা পালন কৰিছে বুলি প্ৰতিবেদনত প্ৰকাশ পাইছে ।
ভাৰতে ইতিমধ্যে ছেমি কণ্ডাক্টৰ প্ৰকল্পৰ বাবে ১৮ বিলিয়ন মাৰ্কিন ডলাৰতকৈ অধিক বিনিয়োগ লাভ কৰিছে। ২০৩০ চনৰ ভিতৰত ভাৰতে ইলেক্ট্ৰনিকছৰ উৎপাদন চাৰিগুণ বৃদ্ধি কৰি ৫০০ বিলিয়ন মাৰ্কিন ডলাৰলৈ বৃদ্ধি কৰাৰ লক্ষ্য কৰি লৈছে।
এই প্ৰতিবেদন অনুসৰি, ভাৰতীয় ইলেক্ট্ৰনিক্স খণ্ডত সম্প্ৰতি দ্ৰুত উন্নতি হৈছে। ইয়াৰ প্ৰধান কাৰণ হৈছে বৃদ্ধি পোৱা আয়, ডিজিটেল গ্ৰহণ, আৰু ইলেক্ট্ৰনিক সামগ্ৰীৰ বৰ্ধিত চাহিদা। ২০২৪ চনৰ বিত্তীয় বৰ্ষত, ভাৰতৰ ইলেক্ট্ৰনিক্স আমদানি ৬০ বিলিয়ন মাৰ্কিন ডলাৰ হৈছে, যিটো দেশৰ বাণিজ্যিক ঘাটিৰ ২৫ শতাংশ।
ইয়াৰ ফলত, ভাৰত চৰকাৰে ঘৰুৱা ইলেক্ট্ৰনিক্স উৎপাদনৰ ক্ষেত্ৰত কেইবাটাও পদক্ষেপ আৰু সাহসী স্থিতি গ্ৰহণ কৰিছে। ভাৰতে উৎপাদন বৃদ্ধি আৰু আমদানি হ্ৰাস কৰাতো গুৰুত্ব আৰোপ কৰিছে।
